Read Fulfulded Yuhanna 14 Bible Online

Yuhanna 14 - Fulfulded bible

Yuhanna 14

¹Yeesu wi'i pukara'en muuɗum: “Taa ɓerɗe mooɗon caklo. Nuɗɗine Allah, nuɗɗineeɗam min boo.

²Woodi cuuɗi ɗuuɗɗi nder saare Baabiraawo am, mi yahan, mi taaskitinana on joonde. Mi wi'ataano on ɗum to ɗum laataaki non.

³To mi dilli, mi taaskitinani on joonde, mi loroto, mi hoo'a on, mi yahra on haa am, ngam haa on ngona haa ngonmi.

⁴On anndi laawol yahugo haa njahanmi.”

⁵Tomas wi'i mo: “Jawmiraawo, min anndaa haa a yahata, noy min anndirta laawol maajum?”

⁶Yeesu wi'i mo: “Min woni laawol e gooŋga e ngeendam. Walaa mo yahata haa Baabiraawo, sey bee am.

⁷To on anndino yam, on anndanno Baabiraawo am boo. Diga jonta on anndi mo, on ngi'i mo.”

⁸Filip wi'i mo: “Jawmiraawo, hollu min Baabiraawo, ɗum he'an min.”

⁹Yeesu wi'i mo: “Filip, duuri mi ɗon wondi bee mooɗon, nden a anndaa yam na? Koo moy yi'i yam, yi'i Baabiraawo. Noy mbi'rata: Hollu min Baabiraawo?

¹⁰A nuɗɗinaay mi ɗon nder Baabiraawo, Baabiraawo boo ɗon nder am na? Bolle ɗe mi wolwanta on iwaay haa am. Baabiraawo mo ɗon nder am, kaŋko hebbitinta kuuɗe maako.

¹¹Nuɗɗine ko mi wi'i on: Baabiraawo ɗon nder am, min boo mi ɗon nder maako. To naa non, nuɗɗine ngam daliila kuuɗe ɗe'e.

¹²Gooŋga mi wi'ata on: Koo moy nuɗɗini yam, huuwan kuuɗe ɗe mi huuwi, o huuwan ko ɓuri ɗum mawnugo boo, ngam mi ɗon dilla haa Baabiraawo.

¹³Ko on toroto bee innde am fuu, mi waɗan ɗum, ngam haa Baabiraawo teddine nder Ɓiɗɗo.

¹⁴To on torake koo ɗume bee innde am, mi waɗan ɗum.”

¹⁵Yeesu tokki wi'ugo: “To on ngiɗi yam, on njogoto umrooje am.

¹⁶Mi toroto Baabiraawo o hokka on Balloowo feere, ngam o wonda bee mooɗon haa abada.

¹⁷Ɗum Ruuhu mo gooŋga, duniyaaru waawataa heɓugo mo, ngam ndu waawataa yi'ugo mo, ndu anndataa mo boo. Ammaa onon on anndi mo, ngam o ɗon wondi bee mooɗon, o jooɗoto nder mooɗon boo.

¹⁸Mi accataa on bana atiime'en, mi loroto haa mooɗon.

¹⁹Yeeso seɗɗa duniyaaru yi'ataa yam fahin, ammaa onon on ngi'atam, ngam min mi ɗon yeeɗi, onon boo on ngeeɗan.

²⁰Nyalaade man, on anndan min mi ɗon nder kawtal bee Baabiraawo am, onon boo on ɗon nder kawtal bee am.

²¹Mo jogi umrooje am, ɗowtani ɗe, kaŋko woni giɗɗo yam. Baabiraawo yiɗan giɗɗo yam, min boo mi yiɗan mo, mi waŋginanan mo hoore am.”

²²Woodi Yahuuda feere, naa Yahuuda Iskariyot, o wi'i Yeesu: “Jawmiraawo, noy ɗum laatorto, a waŋginana min hoore ma, ammaa a waŋgantaa duniyaaru?”

²³Yeesu jaabi mo: “To goɗɗo yiɗi yam, o ɗowtanto bolle am, Baabiraawo am boo yiɗan mo. Min bee Baabiraawo am, min ngaran, min njooɗodotto bee maako.

²⁴Mo yiɗaa yam, o ɗowtantaako bolle am. Ko on nanata haa am, ɗum iwaay haa am, ammaa haa Baabiraawo nelɗo yam.

²⁵Mi wolwani on ɗum yaake mi ɗon wondi bee mooɗon.

²⁶Balloowo, waato Ruuhu Ceniiɗo mo Baabiraawo neldata on bee innde am, kaŋko ekkitinta on kuuje fuu, o siftinoran on ko mi wi'i on fuu.

²⁷Mi ɗon accana on salaaman[18], mi ɗon hokka on salaaman am. Ko mi hokkata on, ɗum nanndaay bee ko duniyaaru hokkata. Taa ɓerɗe mooɗon caklo, taa kultore!

²⁸On nani mi wi'no on mi dillan, ammaa mi loroto haa mooɗon. To on ngiɗi yam, on ceyoto ngam mi ɗon dilla haa Baabiraawo, ngam Baabiraawo ɓuri yam maŋngu.

²⁹Mi wolwani on ɗum jonta diga ɗum siwaa laataago, ngam haa on nuɗɗina to ɗum waɗi.

³⁰Mi tokkataako wolididgo ɗuuɗɗum bee mooɗon, ngam laamiiɗo duniyaaru ɗon wara. O walaa baawɗe dow am koo seɗɗa.

³¹Ammaa ngam haa duniyaaru annda mi yiɗi Baabiraawo, ngam maajum mi ɗon waɗa ko Baabiraawo umri yam. Umme, ndillen diga ɗo!”