Read Fulfulded Yuhanna 15 Bible Online

Yuhanna 15 - Fulfulded bible

Yuhanna 15

¹Yeesu tokki wi'ugo: “Min, mi inabohi gooŋgahi, Baabiraawo am woni jawmu ngesa.

²Lisal koo ngale haa am ngal rimataa ɓiɓɓe, o ta'an ngal. Ammaa lisal dimanŋgal ɓiɓɓe, o mo'inan ngal haa ngal ɓesda rimugo ɓiɓɓe fahin.

³Onon on mo'inaaɓe ngam daliila wolde nde mi wolwani on.

⁴Tabite nder kawtal bee am, nden kam min boo mi tabitan nder kawtal bee mooɗon. Bana no lisal inabohi rimataa ɓiɓɓe, sonaa to ngal hawti bee inabohi, bana non onon boo, on mbaɗataa nafuuda sonaa to on ɗon tabiti nder kawtal bee am.

⁵Min woni inabohi, onon on lice. Mo tabiti nder kawtal bee am, min boo mi tabiti nder kawtal bee muuɗum, kaŋko o waɗan nafuuda. Ammaa to on ngondaay bee am, on mbaawataa waɗugo koo ɗume.

⁶To goɗɗo tabitaay nder kawtal bee am, o wudinteeɗo yaasi bana lisal ta'aaŋgal, ngal yooran, nden ɓe koocan ngal ɓe ngudina ngal nder yiite, ngal wula.

⁷To on ɗon tabiti nder kawtal bee am, bolle am boo ɗon tabiti nder mooɗon, tore ko on ngiɗi fuu, on keɓan ɗum.

⁸Ndaa ko teddinta Baabiraawo am: On mbaɗa nafuuda ɗuuɗka, on laato pukara'en[19] am.

⁹Bana no Baabiraawo yiɗiri yam, non min boo mi yiɗiri on. Tabite nder yiide am.

¹⁰To on ɗon njogo umrooje am, on tabitan nder yiide am, bana no min boo mi jogori umrooje Baabiraawo am, mi ɗon tabiti nder yiide maako.

¹¹Mi wolwani on ɗum bana nii ngam haa seyo am wona nder ɓerɗe mooɗon, seyo mooɗon boo heewa.

¹²Ndaa umroore am: Ngiɗindire bana no mi yiɗiri on.

¹³Walaa yiide ɓurata nde'e: Goɗɗo hokka yoŋki muuɗum ngam soobiraaɓe muuɗum.

¹⁴On soobiraaɓe am, to on ɗon mbaɗa ko mi umri on.

¹⁵Mi ewnataa on huuwooɓe fahin, ngam kuuwoowo anndaa ko jaagorɗo muuɗum waɗata. Mi ewni on soobiraaɓe am, ngam ko mi nani haa Baabiraawo am fuu, mi anndini on ɗum.

¹⁶Naa onon cuɓi yam, ammaa min suɓi on. Mi suɓi on, mi yowani on kuugal, ngam haa on njaha, on mbaɗa nafuuda, nafuuda mooɗon boo tabita, ngam haa ko on ƴamata haa Baabiraawo bee innde am fuu, o hokka on ɗum.

¹⁷Ngiɗindire, kanjum mi umri on.”

¹⁸To duniyaaru wanyi on, annde ndu aarti wanyugo yam min.

¹⁹To on laatino ɓe duniyaaru, ndu yiɗanno on ngam on yimɓe maaru. Ammaa nde nii on laataaki ɓe duniyaaru, mi suɓi on, mi wurtini on diga duniyaaru, ngam maajum, duniyaaru ɗon wanya on.

²⁰Ciftore ko mi wi'i on: Kuuwoowo ɓurataa jaagorɗo muuɗum maŋngu. To ɓe toonyake yam, ɓe toonyoto on onon boo. To ɓe ɗowtanake bolle am, ɓe ɗowtanto bolle mooɗon boo.

²¹Ammaa ɓe mbaɗan on ɗum fuu ngam daliila innde am, ngam ɓe anndaa nelɗo yam.

²²Ɓe ngalaano aybe to mi waraayno, mi wolwanaayno ɓe. Ammaa jonta ɓe ngalaa hujja ngam hakke maɓɓe.

²³Koo moy wanyi yam, wanyi Baabiraawo am boo.

²⁴Ɓe ngalaano aybe to mi huuwaayno kuuɗe caka maɓɓe ɗe goɗɗo meeɗaay huuwugo. Ammaa jonta ɓe ngi'i kuuɗe am, bee non fuu ɓe nganyi yam, min e Baabiraawo am.

²⁵Ɗum laati non, ngam haa ko winnda nder defte maɓɓe, waato tawreeta gooŋɗa: Ɓe nganyi yam bilaa daliila.

²⁶To Balloowo mo mi nelata haa mooɗon diga Baabiraawo wari, waato Ruuhu mo gooŋga garanɗo diga Baabiraawo, kaŋko o seedanto yam.

²⁷Onon boo on ceedanto yam, ngam on ngondi bee am diga fuɗɗam.