Read Fulfulded Yuhanna 19 Bible Online

Yuhanna 19 - Fulfulded bible

Yuhanna 19

¹Nden Pilaatu umri yimɓe mum ɓe kooca Yeesu, ɓe ɓocca mo.

²Sooje'en mbami meetaleewol gi'e, ɓe njo'ini ɗum dow hoore Yeesu, ɓe moji mo mojaare woɗeere.

³Ɓe ɓaditi mo, ɓe mbi'i: “Allah woonane, laamiiɗo Yahuudu'en!” Ɓe maari mo.

⁴Pilaatu wurti fahin, wolwani yimɓe, wi'i: “Ndaa, mi wurtinan mo haa mooɗon, ngam haa on paama mi tawaay daliila hiitaago mo.”

⁵Nden Yeesu wurti, meetaleewol gi'e ɗon dow hoore maako, o ɗon moji mojaare woɗeere go. Pilaatu wi'i ɓe: “Ndaa mo.”

⁶Ammaa nde liman'en e aynooɓe ngi'i mo, ɓe ngooki, ɓe mbi'i: “Ɓil mo haa leggal gaafaaŋgal! Ɓil mo!” Pilaatu wi'i ɓe: “Kooce mo onon, ɓile mo, ngam min mi tawaay daliila hiitaago mo.”

⁷Yahuudu'en mbi'i mo: “Min ngoodi umroore woore. Fodde umroore man sey o maaya, ngam o waɗi hoore maako o Ɓiɗɗo Allah.”

⁸Nde Pilaatu nani wolde nde'e, kulol maako ɓesdi.

⁹O nasti saare fahin, o ƴami Yeesu: “Toy iwɗaa?” Ammaa Yeesu jaabaaki mo sam.

¹⁰Pilaatu wi'i mo: “A jaabataako yam na? A anndaa mi woodi baawɗe yoofugo ma, mi woodi boo baawɗe ɓilugo ma haa leggal gaafaaŋgal na?”

¹¹Yeesu jaabi mo: “A walaano baawɗe dow am koo seɗɗa, to Allah hokkaayno ma ɗe. Ngam maajum mo hokki yam haa juŋngo ma, hakke maako ɓuri mawnugo.”

¹²Diga saa'i man Pilaatu tefi dabare yoofugo Yeesu. Ammaa Yahuudu'en ngooki, mbi'i: “To a yoofi mo, nden kam naa a soobaajo Kaysara laamiiɗo Roma. Koo moy waɗi hoore muuɗum laamiiɗo, o konneejo Kaysara laamiiɗo Roma.”

¹³Nde Pilaatu nani bolle ɗe'e, o wurtini Yeesu fahin, o jooɗi dow koromwal kiita, haa nokkuure wi'eteende bee Ibraniŋkeere Gabbata, waato Taŋkol-kaa'e.

¹⁴Ɗum nyalaade taaskara juulde Paska, deydey caka nyalawma. Pilaatu wi'i Yahuudu'en: “Ndaa laamiiɗo mooɗon!”

¹⁵Ɓe ngooki, ɓe mbi'i: “Mbar mo, mbar mo, ɓil mo haa leggal gaafaaŋgal.” Pilaatu wi'i ɓe: “Kadi mi ɓila laamiiɗo mooɗon na?” Mawɓe liman'en njaabi: “Min ngalaa laamiiɗo feere, sey laamiiɗo Kaysara.”

¹⁶Nden, Pilaatu hokki ɓe Yeesu haa ɓe ɓila mo haa leggal gaafaaŋgal. Ɓe ndilliri mo.

¹⁷Yeesu wurti yaasi berniwol, o ɗon roondi gaafaaŋgal maako, haa o yotti nokkuure wi'eteende bee Ibraniŋkeere Golgota, waato Gumbal-hoore.

¹⁸Haa ton sooje'en ɓili Yeesu haa leggal gaafaaŋgal. Ɓe ɓildi worɓe ɗiɗo bee Yeesu, gooto haa wakeere nyaamre, gooto boo haa wakeere nannde, Yeesu ɗon haa caka.

¹⁹Pilaatu winndi dow alluha, o ɓili ɗum haa gaafaaŋgal. Ndaa ko o winndi: “Yeesu mo Nasaratu, laamiiɗo Yahuudu'en.”

²⁰Yahuudu'en ɗuuɗɓe njaŋngi ɗum, ngam nokkuure man daayaaki bee berniwol. Binndi man winndaama bee Ibraniŋkeere e Romaŋkeere e Yunaniŋkeere.

²¹Ammaa mawɓe liman'en Yahuudu'en mbi'i Pilaatu: “Taa winndu: Laamiiɗo Yahuudu'en, ammaa winndu: O wi'i o laamiiɗo Yahuudu'en.”

²²Pilaatu jaabi ɓe: “Ko mi winndi, ɗum tabiti.”

²³Nde sooje'en timmini ɓilugo Yeesu haa leggal gaafaaŋgal, ɓe kooci limce maako, ɓe cenndi ɗe geɓe nayi, soojeejo fuu heɓi yeɓre woore. Ɓe kooci boo toggoore maako sannyaande diga dow haa les bilaa nyoogol.

²⁴Sooje'en mbi'i hakkunde muuɗum'en: “Taa en ceeka toggoore nde, ammaa en mbaɗa kur'u ngam en ndaara moy heɓata nde.” Bana nii ko Deftere wi'i, gooŋɗiri: “Ɓe cenndi limce am hakkunde maɓɓe, ɓe mbaɗi kur'u ngam limce am.” Bana nii sooje'en mbaɗi.

²⁵Daada Yeesu e deerɗum debbo e Mariyama debbo Kolopas e Mariyama mo Magdala, ɓe ɗon ndari kommbi leggal gaafaaŋgal haa ɓe ɓili Yeesu.

²⁶Yeesu yi'i daada muuɗum e pukaraajo mo o yiɗi ɗum, ɓe ɗon ndarodi ton. O wi'i daada maako: “Debbo, ndaa ɓiɗɗo ma.”

²⁷Nden o wi'i pukaraajo man: “Ndaa daada ma.” Diga saa'i man pukaraajo man hooci Mariyama haa saare muuɗum.

²⁸Ɓaawo maajum, nde Yeesu anndi kuuje fuu kebbitinaama, ngam o gooŋɗina ko winnda nder Deftere, o wi'i: “Mi ɗomɗi.”

²⁹Woodi mbulku ton, kebbinaaŋgu inaboojam lammuɗam. Ɓe cuuwi irin sooso nder maajam, ɓe mbaɗi ɗum haa ƴommbal isop, ɓe ɓaŋgti ɗum haa hunnduko Yeesu.

³⁰Nde Yeesu metti lammuɗam, o wi'i: “Ɗum fuu ɗum timmidi.” Nden o turi hoore maako, o maayi.

³¹Ɗum nyannde taaskara nyalaade siwtorde. Yahuudu'en ngiɗaa ɓalli lutta dow leɗɗe gaafaaɗe nyannde siwtorde ngam nyalaade siwtorde man laati nyalaade mawnde haa maɓɓe. Ngam maajum ɓe tori Pilaatu o umra ɓe ngewa kosɗe ɓilaaɓe, ɓe njippina ɓalli maɓɓe.

³²Nden sooje'en ngari, ɓe ngewi kosɗe arano, nden ɓe ngewi ɗe ɗiɗaɓo haa ɓildaaɓe bee Yeesu dow leɗɗe gaafaaɗe.

³³Nde ɓe njotti haa Yeesu, ɓe tawi o maayi, ngam maajum ɓe ngewaay kosɗe maako.

³⁴Ammaa gooto nder sooje'en yuwi mo wuttudu bee labbo, law ƴiiƴam e ndiyam ngurti.

³⁵Gi'ɗo seedi ɗum, seedamku maako gooŋga, kaŋko boo o anndi gooŋga o wolwi, ngam haa onon boo on nuɗɗina.

³⁶Ɗum laati non ngam hebbitingo ko Deftere wi'i: “Ɓe ngewataa i'e maako koo gootal.”

³⁷Aayaare feere boo wi'i: “Ɓe ndaaran mo ɓe njuwi.”

³⁸Ɓaawo maajum, Yusufu mo wuro Arimatiya tori Pilaatu duŋayeere hoocugo ɓanndu Yeesu. Yusufu boo laatino pukaraajo Yeesu, ammaa bee sirri, ngam o ɗonno hula Yahuudu'en. Pilaatu duŋani mo. O yehi, o hooci ɓanndu Yeesu.

³⁹Nikodemus mo yehino haa Yeesu jemmaare woɗnde, kaŋko boo o wari, o waddi jillindiraaɗum uurdi baɗaadi e leɗɗe uurɗe, baakin kilo cappanɗe tati.

⁴⁰Kamɓe ɗiɗo ɓe kooci ɓanndu Yeesu, ɓe caawi ndu bee leppi, ɓe ndufi nebbam uurɗam dow maaru, bana Yahuudu'en mboowi waɗugo to ɓe ɗon uwa maayɗo.

⁴¹Haa kommbi nokkuure ɓe ɓilno Yeesu, woodi jarne ton. Nder jarne man woodi yenaande hesre nde ɓe meeɗaay wallingo maayɗo nder muuɗum.

⁴²Haa ton ɓe mballini ɓanndu Yeesu, ngam ɗum nyalaade taaskara siwtorde Yahuudu'en e yenaande man boo daayaaki.