Read Fulfulded Yuhanna 21 Bible Online

Yuhanna 21 - Fulfulded bible

Yuhanna 21

¹Ɓaawo maajum fahin Yeesu waŋgani pukara'en muuɗum haa kommbi weendu Tiberiyas. Ndaa no o waŋgirani ɓe:

²Simon Piyer e Tomas bi'eteeɗo Ciwto e Natanayel mo wuro Kana nder lesdi Galiili e ɓiɓɓe Zebede e pukara'en Yeesu woɗɓe ɗiɗo, fuu ɗon kawti.

³Simon Piyer wi'i ɓe: “Mi dillan waawoygo liɗɗi.” Ɓe mbi'i mo: “Minin boo min njahdan bee maaɗa.” Ɓe ndilli, ɓe nasti koommbowal[23]. Ammaa jemmaare man fuu ɓe naŋngaay koo liiŋgu.

⁴Nde fuɗɗi weetugo, Yeesu dari haa fomoonde, ammaa pukara'en anndaa ɗum kaŋko.

⁵Nden Yeesu ƴami ɓe: “Ɓikkoy, on keɓi nyaamdu na?” Ɓe njaabi mo: “Aa'a.”

⁶O wi'i ɓe: “Cakkine zubaawol haa wuttudu koommbowal nyaamru, on keɓan.” Ɓe cakkini zubaawol, ɓe naŋngi liɗɗi ɗuuɗɗi masin haa ɓe mbaawaay nastingo zubaawol nder koommbowal.

⁷Nden pukaraajo mo Yeesu yiɗi ɗum wi'i Simon Piyer: “Ɗum Jawmiraawo!” Nde Simon Piyer nani ɗum, o ɓorni limce maako, ngam o ɓortino ɗe, o diwi nder ndiyam.

⁸Pukara'en woɗɓe ngari bee koommbowal, ɓe ɗon ndasa zubaawol keewŋgol liɗɗi go, ɓe ndaayaakino fomoonde, ɓuraay meetir teemerre.

⁹Nde ɓe ngurti, ɓe njippi haa lesdi, ɓe ngi'i yiite bee liɗɗi dow maage e tamseeje.

¹⁰Yeesu wi'i ɓe: “Ngadde liɗɗi seɗɗa nder ko on naŋngi jonta.”

¹¹Simon Piyer nasti koommbowal, wurtini zubaawol keewŋgol liɗɗi mawɗi mawɗi, limgal maaji teemerre e cappanɗe jowi e tati (153). Koo nde ɗi ɗuuɗɗi bana non, zubaawol seekaay.

¹²Yeesu wi'i ɓe: “Ngare, nyaame.” Walaa koo gooto nder pukara'en numi ƴamugo mo: “An a moy?” Ngam ɓe anndi ɗum Jawmiraawo.

¹³Yeesu ɓaditi ɓe, hoo'i tamseere, hokki ɓe, o hokki ɓe liɗɗi boo.

¹⁴Kanjum woni waŋgannde tataɓre nde Yeesu waŋgani pukara'en muuɗum, ɓaawo o ummitinaama caka maayɓe.

¹⁵Ɓaawo ɓe nyaami, Yeesu wi'i Simon Piyer: “Simon ɓii Yuhanna, a yiɗi yam ko ɓuri ɓe'e ɗo na?” O jaabi: “Ooho, Jawmiraawo, a anndi mi yiɗi ma.” Yeesu wi'i mo: “Duru ɓiɓɓe baali am.”

¹⁶Nden o wolwani mo ɗiɗawre, o ƴami: “Simon ɓii Yuhanna, a yiɗi yam na?” O jaabi mo: “Ooho, a anndi mi yiɗi ma.” Yeesu wi'i mo: “Laata gaynaako baali am.”

¹⁷O wolwani mo tataɓre: “Simon ɓii Yuhanna, a yiɗi yam na?” Piyer suni nde Yeesu ƴami mo ƴamol tataɓol: “A yiɗi yam na?” O jaabi mo: “Jawmiraawo, an a anndi koo ɗume fuu, a anndi mi yiɗi ma.” Yeesu wi'i mo: “Duru baali am.

¹⁸Gooŋga mi ɗon wi'e: Yaake a derkeejono, an bee hoore ma a ɗon taado taadorgol ma, a ɗon yaha haa a yiɗi fuu. Ammaa to a ndottidi, a fortanan goɗɗo feere juuɗe ma, kaŋko boo o taadante taadorgol, o yahrete haa a yiɗaa.”

¹⁹Bee bolle ɗe'e Yeesu yiɗi tinndingo irin maayde nde Piyer tammi maayugo ngam teddingo Allah. Nden Yeesu wi'i mo: “Tokkam.”

²⁰Piyer yeesiti, yi'i pukaraajo mo Yeesu yiɗi ɗum ɗon wara ɓaawo maɓɓe, kaŋko ɓaarino Yeesu yaake ɓe ɗonno nyaama, ƴamno mo: “Jawmiraawo, moy zammboto ma?”

²¹Nde Piyer yi'i mo, o wi'i Yeesu: “Jawmiraawo, e noy oo ɗo, ɗume waɗata mo?”

²²Yeesu jaabi mo: “To mi yiɗi o yeeɗa haa to mi lori, ko yaalu ma? An kam tokkam!”

²³Haala man saŋkiti caka nuɗɗinɓe, ɓe ɗon mbi'a pukaraajo oo maayataa. Alhaali boo Yeesu wi'aay Piyer: “Pukaraajo oo maayataa.” Ammaa o wi'i mo: “To mi yiɗi o yeeɗa haa to mi lori, ko yaalu ma?”

²⁴Pukaraajo oo, kaŋko woni ceedoowo kubaruuji ɗi'i, o winndi ɗi boo, min anndi seedamku maako ɗum gooŋga.

²⁵Yeesu huuwi kuuɗe goɗɗe ɗuuɗɗe. To ɗe mbinndano gootal gootal fuu, mi tammi duniyaaru waawataa jogaago defte man.