Read Fulfulded Yuhanna 5 Bible Online

Yuhanna 5 - Fulfulded bible

Yuhanna 5

¹Ɓaawo man, juulde Yahuudu'en waɗi, Yeesu boo yehi Urusaliima.

²Haa Urusaliima ton, kommbi Dammugal Baali, woodi weendu wi'eteendu Baytijata bee Ibraniŋkeere, ndu woodi daŋɗe jowi.

³Les daŋɗe ɗe'e, nyawɓe ɗuuɗɓe ɗon mbaali: Wumɓe e woosɓe e waata-terɗe'en. [Ɓe ɗon ndeena haa to ndiyam fuɗɗi dimmbaago,

⁴ngam saa'i feere malaa'ikaajo Jawmiraawo ɗon jippo nder weendu man, dimmba ndiyam. Nyawɗo mo aarti nastugo ndiyam ɓaawo ɗam dimmbake fuu, yamɗiti nyawu muuɗum koo nguye fuu.]

⁵Woodino ton nyawɗo mo waɗi baakin duuɓi cappanɗe tati e joweetati.

⁶Nde Yeesu yi'i mo o ɗon waali, Yeesu anndi o duuri bee nyawu maako, o ƴami mo: “A yiɗi yamɗitineego na?”

⁷Nyawɗo jaabi mo: “Moodibbo, mi walaa goɗɗo mo nastintammi nder ndiyam saa'i ɗam ɗon dimmbo. Yaake mi ɗon haɓda yahugo ton, goɗɗo feere ɗon aartammi nastugo ndiyam.”

⁸Yeesu wi'i mo: “Umma, hoocu leeso ma, yah!”

⁹Law goɗɗo oo yamɗiti, o hoosi be'itte maako, o ɗon yaha. Ammaa nyalaade man ɗum nyannde siwtorde.

¹⁰Ngam maajum Yahuudu'en mbi'i jamɗitinaaɗo man: “Hannde ɗum nyannde siwtorde, tawreeta duŋanaaki ma roondaago be'itte ma.”

¹¹O jaabi ɓe: “Mo yamɗitini yam, wi'i yam: Hoocu be'itte ma, yah!”

¹²Nden ɓe ƴami mo: “Ɗum moyjo wi'i ma hoocu be'itte ma, yah?”

¹³Ammaa o anndaa moy yamɗitini mo, ngam Yeesu acci nokkuure man, dilli, ngam yimɓe ɗuuɗɓe ɗonno ton.

¹⁴Ɓaawoɗon Yeesu tawi mo nder haykaliiru, wi'i mo: “Ndaa, jonta a yamɗiti, taa meetu waɗugo hakke, ngam taa ko tulli wara dow maaɗa.”

¹⁵Goɗɗo oo yehi, o wi'i Yahuudu'en, ɗum Yeesu yamɗitinno mo.

¹⁶Ngam man Yahuudu'en puɗɗi toonyaago Yeesu, ngam o waɗi ɗum nyalaade siwtorde.

¹⁷Ammaa Yeesu jaabi ɓe: “Baabiraawo am ɗon huuwa foroy, min boo mi huuwan.”

¹⁸Ngam daliila bolle ɗe'e Yahuudu'en ɓurti waɗugo anniya mbarugo mo, naa ngam o luuti umroore nyalaade siwtorde tan, ammaa ngam o ɗonno wi'a Allah woni Baabiraawo maako, o fotni hoore maako kal-kal bee Allah.

¹⁹Ngam man Yeesu wi'i ɓe: “Gooŋga mi wi'ata on, Ɓiɗɗo waawataa waɗugo koo ɗume bee hoore muuɗum, ammaa sey ko o yi'i Baabiraawo ɗon waɗa. Ko Baabiraawo waɗata fuu, kanjum Ɓiɗɗo boo waɗata.

²⁰Ngam Baabiraawo yiɗi Ɓiɗɗo, o ɗon holla mo ko o waɗata fuu. O hollan mo kuuɗe ɓuranɗe ɗe'e mawnugo boo, ngam haa on kayɗina.

²¹Bana Baabiraawo ɗon ummitina maayɓe, yeeɗitina ɓe, bana non Ɓiɗɗo boo hokkirta ngeendam haa mo o yiɗi fuu.

²²Baabiraawo hiitataako koo moy, ammaa baawɗe hiitaago, o hokki ɗe fuu haa Ɓiɗɗo,

²³ngam haa yimɓe fuu teddina Ɓiɗɗo bana ɓe teddinirta Baabiraawo nelɗo mo. Koo moy sali teddingo Ɓiɗɗo, teddintaa Baabiraawo nelɗo mo.

²⁴Gooŋga mi wi'ata on: Mo ɗon nana bolle am, mo nuɗɗini nelɗo yam, heɓi ngeendam nduumiiɗam, kiita do'ataa mo, o saalake maayde, o yottake ngeendam.

²⁵Gooŋga mi wi'ata on: Saa'i waran, ɗum waɗi jonta maa, haa maayɓe nana sawtu Ɓiɗɗo Allah, nanɓe mo fuu ngeeɗan.

²⁶Bana Baabiraawo woni seeɓoore ngeendam, bana non o hokki Ɓiɗɗo boo baawɗe laataago seeɓoore ngeendam.

²⁷O hokki Ɓiɗɗo baawɗe hiitaago ngam o Ɓii-neɗɗo.

²⁸Taa ɗum hayɗina on, ngam saa'i waran, haa maayɓe nder genaale fuu nana sawtu maako,

²⁹ngurto ɗe. Waɗooɓe booɗɗum ummititto ngam heɓugo ngeendam, ammaa waɗooɓe kalluɗum ummititto ngam hiiteego.”

³⁰“Min mi waawataa waɗugo koo ɗume bee hoore am. Mi ɗon hiito fodde ko Allah wi'i yam. Kiita ka mi hiitoto, ka adiliiha, ngam mi ɗaɓɓataa waɗugo muuyo am, ammaa muuyo nelɗo yam.

³¹To mi seedanake hoore am, seedamku am laatataako gooŋga.

³²Ammaa woodi ceedoowo yam feere, mi anndi seedamku ngu o seedanto yam, ɗum gooŋga.

³³On neli nelaaɓe haa Yuhanna, kaŋko o seedani gooŋga.

³⁴Min naa diga neɗɗo mi heɓata seedamku, ammaa mi wi'i ɗum bana nii ngam haa on kisa.

³⁵Yuhanna laatino bana pittirla kuɓɓaaŋga, ɗonno yayna, on ceyori annoora maako wakkati seɗɗa.

³⁶Ammaa min mi woodi seedamku ɓurŋgu ngu Yuhanna: Ngam kuuɗe ɗe Baabiraawo hokki yam ngam mi hebbitina ɗe, waato kuuɗe ɗe mi huuwata, kanje seedanto yam, ɗum holli Baabiraawo neli yam.

³⁷Baabiraawo nelɗo yam boo o seedanake yam. On meeɗaay nanugo sawtu maako, on ngi'aay mo boo.

³⁸On njogaaki wolde maako nder ɓerɗe mooɗon, ngam on nuɗɗinaay mo o neli.

³⁹On ɗon njaŋnga Defte Ceniiɗe, ngam on ɗon tammo heɓugo ngeendam nduumiiɗam nder maaje. Defte Ceniiɗe man ɗon ceedano yam.

⁴⁰Ammaa on ngiɗaa wargo haa am ngam on keɓa ngeendam.

⁴¹Mi ɗaɓɓataa tedduŋgal haa yimɓe.

⁴²Ammaa mi anndi on, on ngiɗaa Allah.

⁴³Mi wari bee innde Baabiraawo am, onon boo on njaɓaay yam. Ammaa to goɗɗo feere wari bee baawɗe hoore muuɗum, kaŋko on njaɓata.

⁴⁴Bana noy on mbaawrata nuɗɗingo, nde nii on ɗon ɗaɓɓa tedduŋgal diga woɗɓe, ammaa on ɗaɓɓataa tedduŋgal garanŋgal diga Allah gooto?

⁴⁵Taa nume min mi wulloto on yeeso Baabiraawo. Muusa mo on ɗon tammoro, kaŋko wulloto on.

⁴⁶Ngam to on nuɗɗinno Muusa, on nuɗɗintam min boo, ngam dow am o winndi.

⁴⁷Ammaa to on nuɗɗinaay ko o winndi, noy on nuɗɗinirta bolle am?”