Read Fulfulded Yuhanna 6 Bible Online

Yuhanna 6 - Fulfulded bible

Yuhanna 6

¹Ɓaawo man, Yeesu dilli gaɗa weendu Galiili, wi'eteendu boo weendu Tiberiyas.

²Mooɓre ɗuuɗnde ɗonno tokki mo, ngam yimɓe ɗonno ndaara kaayeefiiji ɗi o ɗonno waɗa bee yamɗitingo nyawɓe.

³Yeesu wa'i dow hooseere, o jooɗi ton bee pukara'en maako.

⁴Wakkati Paska, juulde Yahuudu'en ɓadake.

⁵Yeesu ɓaŋgti gite, yi'i mooɓre ɗuuɗnde ɗon wara haa muuɗum. O wi'i Filip: “Toy en coodoyta nyaamdu ngam haa yimɓe ɓe'e nyaama?”

⁶O wi'i ɗum ngam foondugo Filip, ngam o anndi ko o tammi waɗugo.

⁷Filip jaabi mo: “Koo tamseeje ceede cardi teemeɗɗe ɗiɗi boo ke'ataa haa koo moy maɓɓe heɓa nyaamdu seɗɗa!”

⁸Andire, deerɗu Simon Piyer, gooto nder pukara'en maako wi'i mo:

⁹“Ndaa, woodi derkeejo haa ɗo, o woodi tamseeje sa'iiruuri jowi e liɗɗi ɗiɗi, ammaa ɗume ɗum nafata haa yimɓe ɗuuɗɓe ɓe'e?”

¹⁰Yeesu wi'i: “Ngecce yimɓe ɓe'e fuu ɓe njooɗo.” Huɗo ɗuuɗko ɗonno haa nokkuure man. Nden ɓe njooɗi, limgal maɓɓe waɗi worɓe baakin ujine njowo.

¹¹Yeesu hoo'i tamseeje go, yetti Allah, nden o senndani ɗe yimɓe wonɓe ton. O waɗi non bee liɗɗi boo. Koo moy heɓi deydey bana o yiɗi.

¹²Nde ɓe kaari, Yeesu wi'i pukara'en muuɗum: “Mooɓte luttuɗum man ngam taa ɗum wonno.”

¹³Nden ɓe mooɓti luttuɗum tamseeje jowi ɗe yimɓe nyaamino, ɓe kebbini cilaaje sappo e ɗiɗi.

¹⁴Nde yimɓe ɓe'e ngi'i kaayeefiwol ngol Yeesu waɗi, ɓe mbi'i: “Fakat gorko oo woni annabiijo mo tammi wargo nder duniyaaru!”

¹⁵Yeesu anndi ɓe tammi wargo ngam ɓe naŋnga mo bee semmbe, ɓe mbaɗa mo laamiiɗo, o dilli dow hooseere fahin, kaŋko feere maako.

¹⁶Nde hiiri, pukara'en Yeesu ndiirti dow fomoonde mbeela.

¹⁷Ɓe nasti koommbowal[9] ngam yahugo Kafarnahum. Jemma jeŋngi, Yeesu boo waraay haa maɓɓe tawon.

¹⁸Ndiyam dimmbi masin, ngam henndu saatundu ɗon waɗa.

¹⁹Nde ɓe laanyi koommbowal baakin kilomeetir jowi malla joweego, ɓe ngi'i Yeesu ɗon ɓadito koommbowal, o ɗon yaha dow ndiyam bee kosɗe, ɓe kultori.

²⁰Ammaa Yeesu wi'i ɓe: “Taa kultore, ɗum min.”

²¹Ɓe ngiɗino hoosugo mo nder koommbowal, ammaa law ngal dukki lesdi haa nokkuure nde ɓe ngiɗno yahugo.

²²Jaŋngo man, yimɓe nder mooɓre gaɗa mbeela go ndaari walaano koommbowal feere haa ton, sey gootal tan. Ɓe anndi boo Yeesu nastaayno ngal bee pukara'en muuɗum, pukara'en feere muuɗum'en nasti ngal, ndilli.

²³Ammaa koommbooje goɗɗe iwi haa Tiberiyas, ngari haa nokkuure nde Jawmiraawo hokkuno ɓe tamseeje, ɓaawo o yettino Allah ngam maaje.

²⁴Nde yimɓe mooɓre ngi'i Yeesu walaa ton, koo pukara'en maako boo ngalaa ton, ɓe nasti koommbooje go, ɓe ndilli haa Kafarnahum ngam ɓe tefa mo.

²⁵Ɓe tawi Yeesu gaɗa mbeela, ɓe mbi'i mo: “Moodibbo, ndey ngarɗa haa ɗo?”

²⁶Yeesu jaabi ɓe: “Gooŋga mi wi'ata on: On ɗon tefammi naa ngam on ngi'i kaayeefiiji ɗi mbaɗmi, ammaa ngam on nyaami tamseeje, on kaari.

²⁷Taa kuuwe ngam nyaamdu wonnotoondu, ammaa ngam nyaamdu tabitanndu, hokkanndu ngeendam nduumiiɗam. Nyaamdu ndu'u, Ɓii-neɗɗo hokkata on ndu, fodde baawɗe ɗe o heɓi haa Allah Baabiraawo.”

²⁸Nden ɓe ƴami mo: “Noy min mbaɗata haa min kuuwa kuuɗe ɗe Allah yiɗi?”

²⁹Yeesu jaabi ɓe: “Kuugal ngal Allah yiɗi woni: On nuɗɗina mo o neli.”

³⁰Ɓe ƴami mo: “Kaayeefiwol ngole a waɗata ngam haa min nuɗɗine? Kuugal ngale a huuwata?

³¹Kaakiraaɓe amin nyaami mannu nder ladde, bana ko winnda: O hokki ɓe nyaamdu iwndu diga asama.”

³²Yeesu wi'i ɓe: “Gooŋga mi wi'ata on, naa ɗum Muusa hokki on nyaamdu iwndu diga asama, ammaa Baabiraawo am hokkan on ko woni nyaamdu fakat, iwndu diga asama.

³³Ngam nyaamdu ndu Allah hokkata, kayru jippi diga asama, kayru hokkata duniyaaru ngeendam.”

³⁴Nden ɓe mbi'i mo: “Jawmiraawo, hokku min nyaamdu ndu'u foroy.”

³⁵Yeesu wi'i ɓe: “Min woni nyaamdu ndu hokkata ngeendam. Koo moy wari haa am, meetataa maatugo dolo sam. Koo moy nuɗɗini yam boo, meetataa ɗomɗugo sam.

³⁶Ammaa mi bi'ɗo on ɗum: On ngi'i yam, bee non fuu on nuɗɗinaay.

³⁷Mo Baabiraawo hokki yam fuu, waran haa am. Koo moy wari haa am boo, mi wudintaa mo yaasi.

³⁸Ngam mi jippaaki diga asama ngam waɗugo ko mi yiɗi, ammaa ko nelɗo yam yiɗi.

³⁹Ndaa ko nelɗo yam yiɗi: Taa mi majjina koo gooto nder yimɓe ɓe o hokki yam, ammaa, mi ummitina ɓe diga maayde, nyalaade darŋgal.

⁴⁰Ndaa ko Baabiraawo am yiɗi: Koo moy yi'i Ɓiɗɗo, nuɗɗini mo, heɓi ngeendam nduumiiɗam, mi ummitinan mo diga maayde, nyalaade darŋgal.”

⁴¹Yahuudu'en ngurŋgurti dow Yeesu, ngam o wi'no: “Min, mi nyaamdu jippiindu diga asama.”

⁴²Ɓe ɗonno mbi'a: “Naa kaŋko woni Yeesu, ɓii Yusufu mo en anndi baaba mum e daada mum? Kadi, noy o wi'rata o jippi diga asama?”

⁴³Yeesu jaabi ɓe: “Taa ngurŋgurte hakkunde mooɗon.

⁴⁴Walaa mo heɓata wargo haa am, sonaa to Baabiraawo nelɗo yam fooɗi mo. Koo moy wari haa am, mi ummitinan mo nyalaade darŋgal.

⁴⁵Annabi'en mbinndi: Ɓe fuu ɓe laatoto ekkitinaaɓe Allah. Koo moy heɗiti Baabiraawo, jaɓi ekkitinol maako, waran haa am.

⁴⁶Ɗum yiɗaa wi'go, goɗɗo meeɗi yi'ugo Baabiraawo, sey iwɗo haa Allah, kaŋko feere maako yi'i Baabiraawo.

⁴⁷Gooŋga mi wi'ata on: Koo moy nuɗɗini, heɓi ngeendam nduumiiɗam.

⁴⁸Min, mi nyaamdu hokkanndu ngeendam.

⁴⁹Kaakiraaɓe mooɗon nyaami mannu nder ladde, bee non fuu ɓe maayi.

⁵⁰Ammaa koo moy nyaami nyaamdu iwndu haa asama, maayataa sam.

⁵¹Min, mi nyaamdu yeeru, jippiindu diga asama. To goɗɗo nyaami ndu, o yeeɗan haa abada. Nyaamdu ndu mi hokkata mo, ɗum ɓanndu am. Mi hokkan ndu ngam haa duniyaaru yeeɗa.”

⁵²Bolle ɗe'e ummini gaabotiral hakkunde Yahuudu'en. Ɓe ƴamƴamtiri: “Noy o waawrata hokkugo en ɓanndu maako ngam en nyaama?”

⁵³Yeesu wi'i ɓe: “Gooŋga mi wi'ata on: To on nyaamaay ɓanndu Ɓii-neɗɗo, to on njaraay ƴiiƴam maako, on ngalaa ngeendam nder mooɗon.

⁵⁴Mo nyaami ɓanndu am, yari ƴiiƴam am boo, heɓi ngeendam nduumiiɗam, mi ummitinan mo nyalaade darŋgal.

⁵⁵Ngam gooŋga, ɓanndu am woni nyaamdu, ƴiiƴam am boo woni njaram.

⁵⁶Koo moy nyaami ɓanndu am, yari ƴiiƴam am boo, ɗon tabiti nder kawtal bee am, min boo mi ɗon tabiti nder kawtal bee maako.

⁵⁷Baabiraawo nelɗo yam, o geeto, mi ɗon yeeɗa ngam daliila maako. Bana non boo koo moy nyaami ɓanndu am, yeeɗan ngam daliila am.

⁵⁸Kanjum woni nyaamdu jippiindu diga asama. Ndu nanndaay bee ndu kaakiraaɓe mooɗon nyaamno. Ɓe nyaami ɗum, ɓe maayi. Koo moy nyaami nyaamdu ndu'u, yeeɗan haa abada.”

⁵⁹Yeesu wolwi bolle ɗe'e saa'i o ɗon ekkitina nder suudu dewal Yahuudu'en haa Kafarnahum.

⁶⁰Ɗuuɗɓe nder pukara'en Yeesu, nde nani ɗum, mbi'i: “Haala ka saati. Moy waawata jaɓugo ka?”

⁶¹Yeesu anndi pukara'en maako ɗon ngurŋgurta dow maajum, o wi'i ɓe: “Ɗum laatanake on fergere na?

⁶²Kadi noy to on ngi'i Ɓii-neɗɗo ɗon eeŋga haa o wonno aran?

⁶³Ruuhu Allah hokkata ngeendam, ɓanndu neɗɗo nafataa koo ɗume. Bolle ɗe mi wolwani on, kanje ngoni Ruuhu e ngeendam.

⁶⁴Ammaa woodi woɗɓe caka mooɗon nuɗɗinaay.” Ngam diga fuɗɗam Yeesu anndi ɓeye ngoni ɓe nuɗɗintaa mo, o anndi zammbotooɗo mo boo.

⁶⁵O ɓesdi wi'ugo: “Ngam man mbi'mi on, walaa mo waawata wargo haa am sonaa to Baabiraawo hokki yam mo.”

⁶⁶Diga saa'i man ɗuuɗɓe caka pukara'en maako acci yahdugo bee maako.

⁶⁷Nden Yeesu ƴami pukara'en sappo e ɗiɗo: “Noy onon boo, on ngiɗaa dillugo na?”

⁶⁸Simon Piyer jaabi mo: “Jawmiraawo, haa moy min njahata? An a woodi bolle dokkanɗe ngeendam nduumiiɗam.

⁶⁹Minin, min nuɗɗini, min anndi an woni Ceniiɗo iwɗo haa Allah.”

⁷⁰Yeesu jaabi ɓe: “Naa min suɓi on sappo e ɗiɗo fuu na? Ammaa gooto mooɗon o Iblisa.”

⁷¹O wolwi ɗum dow Yahuuda ɓii Simon Iskariyot. Ngam ɗum kaŋko, gooto nder pukara'en sappo e ɗiɗo zammboto mo.