Read Fulfulded Yuhanna 8 Bible Online

Yuhanna 8 - Fulfulded bible

Yuhanna 8

²Ammaa fajiri cub o lorti haa haykaliiru, ummaatoore fuu wari haa maako. O jooɗi, o fuɗɗi ekkitingo ɓe.

³Nden moodiɓɓe tawreeta e Farisa'en ngaddani mo debbo mo ɓe naŋngi nder njeenu. Ɓe ndarni mo yeeso yimɓe fuu,

⁴ɓe mbi'i Yeesu: “Moodibbo, min naŋngi debbo oo nder njeenu.

⁵Muusa umri min nder tawreeta min piɗa irin debbo oo bee kaa'e haa o maaya. E an, ɗume a wi'ata?”

⁶Ɓe mbi'i non ngam foondugo mo, haa ɓe keɓa daliila wullaago mo. Ammaa Yeesu turi, fuɗɗi winndugo haa lesdi bee hoondu muuɗum.

⁷Nde ɓe tokki ƴamugo mo, o dari, o wi'i ɓe: “Goɗɗo mooɗon mo walaa hakke sam, aarta fiɗugo mo bee hayre.”

⁸Nden o turi fahin, o fuɗɗiti winndugo haa lesdi.

⁹Nde ɓe nani bolle ɗe'e, ɓe ndilli gooto gooto, ndotti'en aarti dillugo. Yeesu feere mum lutti, debbo go ɗon dari yeeso maako.

¹⁰Nden Yeesu dari, wi'i mo: “Debbo, toy ɓe? Walaa do'uɗo ma kiita na?”

¹¹Debbo jaabi: “Walaa koo gooto, Jawmiraawo.” Yeesu wi'i mo: “Min boo, mi hiitataako ma. Dillu, ammaa taa meetu waɗugo hakke!”

¹²Yeesu wolwani yimɓe fahin, o wi'i: “Min, mi annoora duniyaaru. Koo moy tokki yam, yahataa nder nyiɓre fahin, ammaa o heɓan annoora ndokkanka ngeendam.”

¹³Farisa'en mbi'i mo: “A ɗon seedano hoore maaɗa, seedamku ma laataaki gooŋga.”

¹⁴Yeesu jaabi ɓe: “Koo to mi ɗon seedano hoore am, seedamku am ɗum gooŋga, ngam mi anndi haa mi iwi, mi anndi haa mi yahata boo. Ammaa onon, on anndaa haa mi iwi, on anndaa haa mi yahata boo.

¹⁵Onon on ɗon mbaɗa kiita fodde numooji neɗɗo, min, mi hiitataako koo moy.

¹⁶Koo to mi hiitake goɗɗo boo, kiita am gooŋɗan, ngam mi hiitataako feere am, ammaa Baabiraawo nelɗo yam ɗon wondi bee am.

¹⁷Ɗum binndaaɗum nder tawreeta mooɗon: To ɗiɗo ceedake, seedamku man ɗum gooŋga.

¹⁸Min, mi ɗon seedano hoore am, Baabiraawo nelɗo yam boo ɗon seedano yam.”

¹⁹Ɓe mbi'i mo: “Toy Baabiraawo ma woni?” Yeesu jaabi ɓe: “On anndaa yam, on anndaa Baabiraawo am boo. To on anndino yam, on anndanno Baabiraawo am boo.”

²⁰Yeesu wolwi bolle ɗe'e saa'i o ɗonno ekkitina yimɓe nder haykaliiru, haa nokkuure sundukru dokke ceede woni. Walaa mo meemi mo, ngam wakkati maako waraay tawon.

²¹Fahin Yeesu wi'i ɓe: “Mi dillan. On tefatam, ammaa on maayan nder hakkeeji mooɗon. On mbaawataa yahugo haa njahanmi.”

²²Yahuudu'en mbi'mbi'tiri hakkunde muuɗum'en: “O mbartoyan na? Ngam o wi'i: On mbaawataa yahugo haa njahanmi.”

²³Yeesu wi'i ɓe: “Onon on iwi haa les, min mi iwi haa dow. Onon on yimɓe duniyaaru ndu, ammaa min mi laataaki mo duniyaaru ndu.

²⁴Ngam maajum mi wi'i on: On maayan nder hakkeeji mooɗon. Ngam to on nuɗɗinaay min woni mo ngonmi[12], on maayan nder hakkeeji mooɗon.”

²⁵Ɓe mbi'i mo: “An, a moy?” Yeesu wi'i ɓe: “Mi tokki wi'ugo on ɗum diga fuɗɗam.

²⁶Woodi kuuje ɗuuɗɗe ɗe mi yiɗi wi'go dow mooɗon e hiitoraago on bee maajum, ammaa nelɗo yam o gooŋgaajo, mi ɗon wolwana duniyaaru ko mi nani haa maako tan.”

²⁷Ɓe paamaay o ɗon wolwana ɓe dow Baabiraawo.

²⁸Nden Yeesu wi'i ɓe: “To on ɓaŋgti Ɓii-neɗɗo, on anndan min woni mo ngonmi, on anndan mi waɗataa koo ɗume bee muuyo am, ammaa mi ɗon wolwa ko Baabiraawo ekkitini yam tan.

²⁹Nelɗo yam ɗon wondi bee am, o accaay yam feere am, ngam foroy mi ɗon waɗa ko fottanta mo.”

³⁰Nde Yeesu wolwi bana nii, ɗuuɗɓe nuɗɗini mo.

³¹Nden Yeesu wi'i Yahuudu'en nuɗɗinɓe mo: “To on ɗon tabiti nder wolde am, nden kam on laatoto pukara'en am fakat.

³²On anndan gooŋga, gooŋga boo rimɗinan on.”

³³Ɓe njaabi mo: “Minin min ɓiɓɓe Ibrahiima, min meeɗaay laataago jeyaaɓe goɗɗo. Noy a wi'rata min: On laatoto rimɓe?”

³⁴Yeesu wi'i: “Gooŋga mi ɗon wi'a on: Baɗɗo hakke fuu o jeyaaɗo hakke.

³⁵Jeyaaɗo wondataa bee yimɓe saare foroy, ammaa ɓiɗɗo wondan bee yimɓe saare foroy.

³⁶To Ɓiɗɗo rimɗini on, nden kam on laatoto rimɓe fakat.

³⁷Mi anndi on ɓiɓɓe Ibrahiima. Ammaa on ɗon ɗaɓɓa mbarugo yam, ngam on njaɓaay bolle am.

³⁸Min mi ɗon wolwa dow ko mi yi'i haa Baabiraawo am, ammaa onon on ɗon mbaɗa ko nanɗon haa baaba mooɗon.”

³⁹Ɓe mbi'i mo: “Ibrahiima woni baabiraawo amin.” Yeesu wi'i ɓe: “To on ɓiɓɓe Ibrahiima, on kuuwanno kuugal ngal o huuwi.

⁴⁰Ammaa jonta, on ɗon ɗaɓɓa mbarugo yam, min mo wolwani on gooŋga ka nanmi haa Allah. Ibrahiima meeɗaay waɗugo irin maajum.

⁴¹On ɗon kuuwa kuuɗe baaba mooɗon.” Ɓe mbi'i mo: “Minin min laataaki njaalu'en, min ngoodi Baabiraawo gooto, ɗum Allah.”

⁴²Yeesu wi'i ɓe: “To Allah wonno Baabiraawo mooɗon, on ngiɗanno yam, ngam diga Allah iwmi, daliila maako ngarmi. Mi waraay bee ngiɗa am, ammaa kaŋko neli yam.

⁴³Ngam ɗume on paamataa ko mi wi'ata on? Ngam on mbaawataa heɗitaago ko mi wolwanta on.

⁴⁴Iblisa woni baaba mooɗon, on ngiɗi waɗugo ko baaba mooɗon yiɗi. O mbaroowo ko'e diga fuɗɗam, o meeɗaay wolwugo gooŋga, ngam gooŋga walaa nder maako. To o ɗon wolwa fewre, ɗum ɗabiya maako, ngam o pewoowo, o baaba fewre.

⁴⁵Ammaa min, gooŋga mi wi'ata, kanjum waɗi on nuɗɗintaa yam.

⁴⁶Moy nder mooɗon waawata seedaago mi waɗi hakke? Ammaa to gooŋga mi wolwata, koni on nuɗɗintaa yam?

⁴⁷Goɗɗo Allah heɗititto bolle Allah. Ammaa onon on laataaki yimɓe Allah, ngam man, on keɗitataako ɗe.”

⁴⁸Yahuudu'en mbi'i Yeesu: “Naa gooŋga min mbi'i: A Samariyaajo, a ginnaaɗo?”

⁴⁹Yeesu jaabi ɓe: “Naa mi ginnaaɗo. Ammaa mi ɗon teddina Baabiraawo am, onon boo on ɗon njawo yam.

⁵⁰Min, mi ɗaɓɓantaa hoore am tedduŋgal. Woodi mo ɗaɓɓantammi tedduŋgal, kaŋko woni kiitoowo boo.

⁵¹Gooŋga mi wi'ata on: Koo moy ɗowtani wolde am, maayataa sam.”

⁵²Yahuudu'en mbi'i mo: “Jonta min anndi a ginnaaɗo. Ibrahiima maayi, annabi'en boo maayi, nden an a wi'a: Koo moy ɗowtani bolle am, maayataa sam.

⁵³A ɓuri Ibrahiima kaaka amin mo maayi maŋngu kadi na? Kaŋko o maayi. Annabi'en boo maayi. Kadi an a ɗon laara hoore ma a moy?”

⁵⁴Yeesu jaabi: “To mi ɗon teddina hoore am, tedduŋgal am walaa saman. Mo teddintammi woni Baabiraawo am, mo mbi'ɗon o Allah mooɗon.

⁵⁵Ammaa on anndaa mo, min mi anndi mo. To mi wi'no mi anndaa mo, mi laatotono pewoowo bana mooɗon. Ammaa mi anndi mo, mi ɗon ɗowtano bolle maako.

⁵⁶Ibrahiima kaaka mooɗon seyori yi'ugo nyalaade am, o yi'i nde, o seyi.”

⁵⁷Yahuudu'en mbi'i mo: “A waɗaay duuɓi cappanɗe jowi tawon, nden a wi'i a yi'i Ibrahiima?”

⁵⁸Yeesu wi'i ɓe: “Gooŋga mi wi'ata on: Diga Ibrahiima danyaaka, min mi ɗon.”

⁵⁹Nden ɓe koo'i kaa'e ngam ɓe piɗa mo, ammaa Yeesu suuɗi, wurti haykaliiru.