Read Fulfulded Yuhanna 9 Bible Online

Yuhanna 9 - Fulfulded bible

Yuhanna 9

¹Nde Yeesu ɗon saalo, o yi'i goɗɗo bumɗo diga danyeeki mum.

²Pukara'en maako ƴami mo: “Moodibbo, ngam ɗume gorko oo o danya o bumɗo? Ngam daliila hakke maako na? Malla ngam hakke saaro'en maako?”

³Yeesu jaabi: “Naa ngam hakke maako, naa ngam hakke saaro'en maako boo o danya o bumɗo. Ɗum waɗi ngam haa baawɗe Allah mbaŋga haa maako.

⁴Nde nyalawma ɗon tawon, sey en kuuwa kuuɗe nelɗo yam. Jemma ɓadake, wakkati man walaa mo waawata huuwugo.

⁵Yaake mi ɗon nder duniyaaru, mi annoora maaru.”

⁶Nde Yeesu wolwi bolle ɗe'e, o tuuti tuuɗe haa lesdi, o jiiɓi loope seɗɗa bee maaje, o takki ɗum haa gite bumɗo,

⁷nden o wi'i mo: “Yah, sulmoya haa weendu Silowam.” Silowam yiɗi wi'go: Nelaama. Bumɗo yehi ton, sulmi. Nde o lori, o ɗon yi'a.

⁸Heeddiɗɗiraaɓe maako e yi'nooɓe mo o ɗonno rooko, mbi'i: “Naa gorko oo ɗonno jooɗi, rooko[13]?”

⁹Woɗɓe mbi'i: “Ɗum kaŋko.” Woɗɓe boo mbi'i: “Aa'a, ɗum nannduɗo bee maako.” Ammaa kaŋko o wi'i: “Ɗum min.”

¹⁰Ɓe mbi'i mo: “Noy gite maaɗa mbumtiri?”

¹¹O jaabi ɓe: “Goɗɗo bi'eteeɗo Yeesu jiiɓi loope, takki haa gite am, wi'i yam: Yah, sulmoya haa weendu Silowam. Mi yehi ton, mi sulmi, mi wumti.”

¹²Ɓe mbi'i mo: “Toy goɗɗo man woni?” O jaabi ɓe: “Mi anndaa.”

¹³Ɓe njahri bumtuɗo man haa Farisa'en.

¹⁴Ɗum nyalaade siwtorde Yeesu jiiɓi loope, takki haa gite bumɗo, wumtini mo.

¹⁵Ngam maajum, Farisa'en ƴami bumtuɗo: “Noy ɗum laatori, a ɗon yi'a jonta?” O wi'i ɓe: “O takki loope haa gite am, mi sulmi, mi wumti.”

¹⁶Woɗɓe nder Farisa'en mbi'i: “Gorko oo iwaay diga Allah, ngam o hakkilanaay nyalaade siwtorde.” Ammaa woɗɓe mbi'i: “Noy goɗɗo waawrata waɗugo irin kaayeefiiji ɗi'i to o hakkeejo?” Cenndol waɗi hakkunde maɓɓe.

¹⁷Farisa'en ƴami bumtuɗo fahin: “A wi'i o wumtini ma, kadi ɗume a wi'ata dow maako?” O jaabi: “O annabiijo.”

¹⁸Ammaa mawɓe Yahuudu'en njaɓaay o bumɗono, o wumti jonta, haa ɓe ewni saaro'en maako.

¹⁹Ɓe ƴami ɓe: “Oo o ɓiɗɗo mooɗon na? On ɗon tabitini o danyaaɗo o bumɗo na? Kadi noy o yi'ri jonta?”

²⁰Saaro'en maako njaabi: “Min anndi o ɓiɗɗo amin, o danya o bumɗo.

²¹Ammaa min anndaa noy o wumtiri, min anndaa boo moy wumtini mo. Ƴame mo, kaŋko boo o mawni, o jaabano hoore maako.”

²²Saaro'en maako mbolwi bana non ngam ɓe ɗon kula mawɓe Yahuudu'en. Ngam mawɓe Yahuudu'en narrino, to goɗɗo seedake Yeesu woni Almasiihu, ɓe ngurtinan mo diga suudu dewal Yahuudu'en.

²³Ngam maajum saaro'en maako mbi'i: “O mawni. Ƴame mo!”

²⁴Farisa'en ewniti bumtuɗo go, mbi'i mo: “Allah ɗon nane, wi' gooŋga! Minin min anndi gorko oo o hakkeejo.”

²⁵O jaabi: “To o hakkeejo malla naa non, min mi anndaa. Ammaa huunde woore anndumi: Mi bumɗono, jonta mi ɗon yi'a.”

²⁶Ɓe mbi'i mo: “Ɗume o waɗani ma? Noy o wumtiniri gite ma?”

²⁷O jaabi: “Mi biiɗo on ɗum diga naane, ammaa on nanaay yam. Ngam ɗume on ngiɗi nanugo ɗum fahin? Malla onon boo, on ngiɗi laataago pukara'en maako?”

²⁸Ɓe kuɗi mo, ɓe mbi'i: “An woni pukaraajo maako, minin kam min pukara'en Muusa.

²⁹Min anndi Allah wolwani Muusa, ammaa goɗɗo oo kam, min anndaa haa toy o iwi!”

³⁰O jaabi ɓe: “Asee, ɗum kaayeefi! On anndaa haa toy o iwi, ndaa boo o wumtini gite am.

³¹En anndi Allah nanantaa hakkeejo, ammaa o ɗon jaɓana hulɓe mo, waɗooɓe muuyo maako.

³²Diga puɗɗuki duniyaaru, walaa meeɗɗo nanugo goɗɗo wumtini gite danyaaɗo bee mbumndam.

³³To gorko oo iwaayno diga Allah, o waawataano waɗugo koo ɗume.”

³⁴Ɓe mbi'i mo: “A ɗon nder hakke tum diga a danya! An ekkitinta min na?” Nden ɓe ngudini mo yaasi.

³⁵Yeesu nani ɓe ngurtini mo, o tefi mo, o ƴami mo: “A nuɗɗini Ɓii-neɗɗo na?”

³⁶O jaabi: “Jawmiraawo, wi'am, ɗum moy ngam haa mi nuɗɗina mo.”

³⁷Yeesu wi'i mo: “A giiɗo mo, mo ɗon wolwana ma jonta, ɗum kaŋko.”

³⁸O wi'i: “Jawmiraawo, mi nuɗɗini.” O tuggani Yeesu koppi.

³⁹Nden Yeesu wi'i: “Mi wari nder duniyaaru ndu ngam waɗugo kiita, ngam haa wumɓe ngi'a, yi'anɓe boo mbuma.”

⁴⁰Woɗɓe nder Farisa'en wonduɓe bee maako ton mbi'i mo: “Minin boo min wumɓe na?”

⁴¹Yeesu jaabi ɓe: “To on laatino wumɓe, nden kam on maraayno aybe. Ammaa jonta on ɗon mbi'a: Min ɗon ngi'a. Ngam maajum aybe mon ɗon tabiti.”