Read Fulfulded Kuuɗe Nelaaɓe 1 Bible Online

Kuuɗe Nelaaɓe 1 - Fulfulded bible

Kuuɗe Nelaaɓe 1

¹Yaa Teyofilus, nder deftere am arannde, mi winndi ko Yeesu fuɗɗi waɗugo e ekkitingo fuu,

²haa nyannde o eeŋga haa asama. Diga o siwaa eeŋgineego, bee baawɗe Ruuhu Ceniiɗo o anndini umrooje maako haa nelaaɓe ɓe o suɓno.

³Ɓaawo boneeji ɗi o yari, o waŋgani ɓe o geeto fakat bee alaamaaji ɗuuɗɗi laaɓɗi. Baakin nyalɗe cappanɗe nayi, ɓe ngi'i mo, ɓe mbolidi haala laamu Allah.

⁴Yaake o ɗon bee maɓɓe, o wi'i ɓe: “Taa cotte Urusaliima, ammaa ndeene ko Baabiraawo iinani on, bana mbi'mi on.

⁵Ngam Yuhanna waɗani yimɓe baptisma bee ndiyam, ammaa onon, on njaɓan yeeso seɗɗa, baptisma bee Ruuhu Ceniiɗo.”

⁶Nden mooɓtiiɓe ton ƴami mo, ɓe mbi'i: “Jawmiraawo, a wo'itinan laamu ngam Isra'iila jonta na?”

⁷Yeesu jaabi ɓe: “Baabiraawo am bee baawɗe mum ta'i wakkatiiji e saa'iiji man, on mbaawataa anndugo ɗi,

⁸ammaa to Ruuhu Ceniiɗo jippake dow mooɗon, on keɓan baawɗe, nden on laatoto seedantooɓe yam haa Urusaliima, haa lesdi Yahudiya fuu bee Samariya e haa keerol duniyaaru fuu.”

⁹Nde o timmini wolwugo bolle ɗe'e, o eeŋgi. Ɓe ɗon ndaara, haa ruuldere suddi mo.

¹⁰Nde pukara'en ɗon tijjo heedi asama haa Yeesu ɗon eeŋgo, law worɓe ɗiɗo ɓorniiɓe limce daneeje mbaŋgani ɓe,

¹¹mbi'i ɓe: “Onon Galiili'en, koni on ɗon ndari, tijjo dow? Yeesu oo, mo eeŋgi, acci on, o loroto bana on ngi'i o dilliri asama.”

¹²[1] Nden nelaaɓe njippi hooseere wi'eteende Hooseere Jaytunje, ɓe lori haa Urusaliima, ɗum daayi baakin kilomeetir gootel.

¹³Nde ɓe nasti Urusaliima, ɓe mba'i suudu dowru, haa weerde maɓɓe bana ko woowa. Ɗum Piyer, Yuhanna, Yaakuba, Andire, Filip, Tomas, Bartolome, Matta, Yaakuba ɓii Alfa, Simon mo goɗɗo yeɓre Jelot'en e Yahuuda ɓii Yaakuba.

¹⁴Nder anniya ngoota, ɓe fuu ɓe ɗon kawta tum ngam toraago Allah hawtaade bee Mariyama, daada[2] Yeesu e deerɗiraaɓe Yeesu e rewɓe woɗɓe boo.

¹⁵Nyannde feere, nde nuɗɗinɓe baakin teemerre e noogas (120) ɗon kawti, Piyer ummi caka deerɗiraaɓe, wi'i:

¹⁶“Deerɗiraaɓe am, doole ko Deftere Allah aartuno wi'go dow Yahuuda, gooŋɗa. Bee hunnduko Daawuda, Ruuhu Ceniiɗo wi'no ɗum dow Yahuuda, mo ɗowi naŋnguɓe Yeesu,

¹⁷ngam Yahuuda laatino mo amin, ngam Yeesu suɓi mo haa min kuuwda kuugal nga'al.”

¹⁸Yahuuda soodi ngesa bee ngeenaari ndi o heɓri bee kuugal maako kalluŋgal. Ton o do'ori hoore hoore, reedu maako seeki, teteki maako fuu ndufi yaasi.

¹⁹Yimɓe Urusaliima fuu nani haala ka'a. Kanjum waɗi ɓe inndi ngesa ka'a Hakeldama bee wolde maɓɓe, bana wi'go Ngesa-ƴiiƴam.

²⁰Ngam ɗum winndaama haa deftere Jabuura: Saare maako laato winnde, taa goɗɗo jooɗo ton. Sey goɗɗo feere hoosa babal maako.

²¹Ngam maajum, sey goɗɗo caka yahduɓe bee amin nder jahaale bee Yeesu Almasiihu fuu,

²²diga nyannde nde Yuhanna waɗani mo baptisma haa nyannde nde o eeŋga haa asama, ceediiɗo ummitineeki maako bee amin, foti hawtana min.

²³Nden ɓe mbaŋgini inɗe yimɓe ɗiɗo: Yusufu bi'eteeɗo Barsabas, coometeeɗo Yustus bee Mattiyas.

²⁴Nden ɓe tori Allah, ɓe mbi'i: “Yaa Jawmiraawo, a anndi ɓerɗe yimɓe fuu. Ngam maajum hollu min hakkunde yimɓe ɗiɗo ɓe'e, moy cuɓɗa

²⁵ngam haa o hoosa kuugal nelal ngal Yahuuda acci haa o dilli haa pellel maako.”

²⁶Ɓaawoɗon ɓe mbaɗi kur'u[3] ngam suɓugo caka inɗe ɗe'e. Kur'u man waŋgini Mattiyas, o laati sappo e ɗiɗaɓo nelaaɓe go.