Read Fulfulded Kuuɗe Nelaaɓe 16 Bible Online

Kuuɗe Nelaaɓe 16 - Fulfulded bible

Kuuɗe Nelaaɓe 16

¹Pol yotti Derbe e Listira. Ton woodi pukaraajo bi'eteeɗo Timote. Daada maako, o Yahuuduujo, nuɗɗinɗo boo, ammaa baaba maako o Yunaniŋkeejo[30].

²Deerɗiraaɓe haa Listira bee Ikoniya fuu mani Timote.

³Pol yiɗi Timote yahda bee maako. Nde o hoosi mo, o juulni mo ngam Yahuudu'en jooɗiiɓe lesɗe man fuu anndi baaba Timote, o Yunaniŋkeejo.

⁴Haa wuro ɓe ngari fuu, ɓe ngecci nuɗɗinɓe umrooje ɗe nelaaɓe e ndotti'en haa Urusaliima ndawri, haa ɓe tokko ɗe.

⁵Jama'aaje nuɗɗinɓe cemmbiɗi nder nuɗɗinki, kala nyalaade fuu limgal nuɗɗinɓe ɗon ɓesdo.

⁶Ɓe caali lesdi Firigiya e Galaatiya ngam Ruuhu Ceniiɗo haɗi ɓe waazaago haa Asiya.

⁷Nde ɓe njotti keerol lesdi Misiya, ɓe ɗaɓɓi nastugo lesdi Bitiniya, ammaa Ruuhu Yeesu duŋanaaki ɓe.

⁸Ngam maajum ɓe caali nder Misiya, ɓe ndiirti haa Torowas.

⁹Bee jemma Pol yi'i wahayu, o yi'i goɗɗo Makedoniya ɗon dari, tori mo: “War haa Makedoniya, yiida min!”

¹⁰Ɓaawo wahayu man, min taaski dillugo Makedoniya, ngam min paami Allah ewni min haa min ngaazo yimɓe ton Linjiila.

¹¹Min nasti koommbowal[31] haa Torowas, min njehi cir haa Samotaras, jaŋngo man boo min njehi Neyapolis.

¹²Min ummi ton, min njehi Filippi, wuro nder yeɓre lesdi Makedoniya aranndeere,[32] laatiinde maral Roma'en. Min njooɗi ton, min paɓɓi balɗe seɗɗa.

¹³Nyannde siwtorde min ngurti wuro, min njehi fomoonde maayo ngam tefugo haa pellel do'a woni. Min njooɗi, min ngeewtidi bee rewɓe mooɓtiiɓe ton.

¹⁴Gooto maɓɓe, Lidiya, iwɗo wuro Tiyatira, o piloowo limce boɗeeje marɗe saman, o dewoowo Allah. Jawmiraawo maɓɓiti ɓernde maako, haa o nani ko Pol wi'i bee hakkiilo.

¹⁵Kaŋko e yimɓe saare maako fuu, ɓe njaɓi baptisma. Nden o wi'i: “To on ndaari yam mi nuɗɗinɗo Jawmiraawo, ngare, mbeere haa saare am.” O dooli min weergo ton.

¹⁶[33] Nyannde feere nde min ɗon ndilla pellel do'a, paanyo debbo korɗo marɗo ginnawol, wari, fotti bee amin. Ginnawol man wartiri mo o daaroowo. Kuugal nga'al heɓani jaagorɓe maako ceede ɗuuɗɗe.

¹⁷O ɗon tokko min, o ɗon wooka, o wi'a: “Yimɓe ɓe'e, ɓe jagganooɓe Allah Ɓaŋiiɗo! Ɓe ɗon ngaaza on Laawol Jawmiraawo!”

¹⁸O waɗi ɗum balɗe ɗuuɗɗe. Ɗum ɓilli Pol, o wayliti, o wi'i ginnawol: “Bee innde Yeesu Almasiihu mi umri ma, wurta haa maako!” Ɗon nii ginnawol wurti.

¹⁹Nde jaagorɓe korɗo go ngi'i seeɓoore keɓal maɓɓe ɗon majja, ɓe naŋngi Pol e Silas, ɓe ndasi ɓe haa luumo, yeeso mawɓe.

²⁰Ɓe njahri ɓe haa mawɓe Roma'en, ɓe mbi'i: “Yimɓe ɓe'e ɓe Yahuudu'en, ɓe ɗon ummina fitina haa wuro meeɗen.

²¹Ɓe ɗon anndina al'aadaaji kaɗaaɗi ɗi en mbaawataa jaɓugo e tokkaago, enen Roma'en!”

²²Mooɓre tuurti dow maɓɓe. Mawɓe Roma'en ɓorti Pol e Silas, umri ɓe piya ɓe.

²³Nde ɓe piyi ɓe piyɗe ɗuuɗɗe, ɓe njahri ɓe haa fursina. Ɓe mbi'i aynoowo fursina o ayna ɓe booɗɗum.

²⁴Nde o nani umroore nde'e, o yahri ɓe haa suudu cakaaru nder saare fursina, o fali kosɗe maɓɓe bee tiggirgal.

²⁵Caka jemma Pol e Silas ɗon mbaɗa do'a, ɓe ɗon maŋgta Allah bee gime, haɓɓaaɓe woɗɓe ɗon nana.

²⁶Ɗon nii dimmbannde lesdi mawnde waɗi haa caɓɓaaje suudu fursina ndimmbi. Dammuɗe fuu maɓɓiti, callalluuji haɓɓaaɓe fuu boo njani.

²⁷Aynoowo fursina fini. Nde o yi'i dammuɗe ɗon maɓɓiti, o losi kaafahi maako haa o mbarto ngam o tammi haɓɓaaɓe ndoggi.

²⁸Ammaa Pol towni sawtu, wi'i: “Taa naawnu hoore ma. Min fuu min ɗon.”

²⁹Aynoowo fursina tefi yiite, ƴaawɗi, nasti ton, o ɗon diwna, o do'i yeeso Pol e Silas.

³⁰Nden o wurtini ɓe yaasi, o ƴami: “Moodiɓɓe, ɗume mbaɗanmi haa mi hisa?”

³¹Ɓe mbi'i: “Nuɗɗin Jawmiraawo Yeesu, nden a hisan, an bee yimɓe saare ma fuu.”

³²Nden ɓe ngaazini mo wolde Jawmiraawo, kaŋko bee yimɓe saare maako fuu.

³³Nder saa'iire man aynoowo fursina hoo'i ɓe, looti kuuduuje maɓɓe. Ɗon nii kaŋko bee yimɓe saare maako fuu, ɓe njaɓi baptisma.

³⁴O yahri Pol bee Silas haa saare maako, o nyaamni ɓe. Kaŋko bee saare maako fuu ɓe ceyi masin, ngam ɓe nuɗɗini Allah.

³⁵Nde weeti, mawɓe Roma'en neli doogari'en haa aynoowo fursina, ɓe mbi'a mo o yoofa yimɓe ɓe'e.

³⁶Nden aynoowo fursina wi'i Pol: “Mawɓe neli, mbi'i min njoofa on. Jonta ngurte, Allah yahru on jam.”

³⁷Ammaa Pol wi'i doogari'en go: “Ɓe piyi min yeeso yimɓe fuu bilaa hiitaago min. Minin boo min Roma'en! Nden ɓe maɓɓi min haa fursina. Jonta nii ɓe ngiɗi wurtingo min bee sirri? Waɗataako! Sey mawɓe Roma'en bee ko'e maɓɓe ngara, njoofta min.”

³⁸Doogari'en lornani mawɓe Roma'en ko Pol e Silas mbi'i. Nde ɓe nani Pol e Silas ɓe Roma'en, ɓe kultori.

³⁹Mawɓe Roma'en ngari, nde'itini ɓe. Nden ɓe ngurtini ɓe fursina, ɓe tori ɓe ɓe cotta wuro maɓɓe.

⁴⁰Nde Pol e Silas ngurti fursina, ɓe njehi haa saare Lidiya. Ton ɓe tawi deerɗiraaɓe, ɓe cemmbiɗini ɓe, nden ɓe ndilli.