Read Fulfulded Kuuɗe Nelaaɓe 17 Bible Online

Kuuɗe Nelaaɓe 17 - Fulfulded bible

Kuuɗe Nelaaɓe 17

¹Nde ɓe caali Amfipolis e Apolloniya, ɓe njotti haa Tessaloniiki. Woodi suudu dewal Yahuudu'en ton.

²Pol yehi haa suudu man bana ko woowa. Nyalɗe ciwtorɗe tati o ɗon hujjotira bee Yahuudu'en dow Deftere Allah.

³O ɗon faamtina, o ɗon holla ɓe bee laaɓɗum ko wolde Allah wi'i dow Almasiihu: Sey o yara bone, o ummito diga maayde. Pol wi'i: “Kaŋko woni Almasiihu Yeesu mo mi waazata on.”

⁴Woɗɓe maɓɓe njaɓi bolle ɗe'e, kawtani Pol e Silas. Non boo Yunaniŋke'en hulɓe Allah ɗuuɗɓe e rewɓe tedda-asli'en woɗɓe.

⁵Ammaa Yahuudu'en kaaji ɓe, kawti buuɗaaje wonɓe haa luumo, ɓe ummini fitina nder wuro. Ɓe kippi saare Yason, ɓe ɗon ɗaɓɓita Pol e Silas haa ɓe ngurtina ɓe, ɓe ngara yeeso mooɓre.

⁶Ammaa nde ɓe tawaay ɓe, ɓe ndasi Yason e deerɗiraaɓe woɗɓe yeeso mawɓe wuro, ɓe kooli, ɓe mbi'i: “Yimɓe ɓe'e, ummini jiiɓre nder duniyaaru fuu! Jonta ɓe ngari haa wuro meeɗen,

⁷Yason boo weerni ɓe haa saare mum. Ɓe ngewi umrooje laamiiɗo Roma bee wi'go woodi laamiiɗo goɗɗo, bi'eteeɗo Yeesu.”

⁸Ɓe cakli ɓerɗe yimɓe e ɓerɗe mawɓe wuro nanɓe haala ka'a.

⁹Yason e woɗɓe ndokki ceede, nden ɓe njoofi ɓe.

¹⁰Nde jemma waɗi, deerɗiraaɓe neli Pol e Silas haa Bereya. Nde ɓe njotti ton, ɓe njehi suudu dewal Yahuudu'en.

¹¹Yimɓe Bereya laataaki bana yimɓe Tessaloniiki. Kamɓe ɓe njaɓi wolde Allah law. Balɗe fuu ɓe ɗon linya defte Allah, haa ɓe ngooŋɗina ko Pol wolwi.

¹²Ɗuuɗɓe maɓɓe nuɗɗini. Rewɓe Yunaniŋke'en[34] tedda-asli'en e Yunaniŋke'en worɓe ɗuuɗɓe nuɗɗini.

¹³Ammaa nde Yahuudu'en iwɓe Tessaloniiki nani Pol waazi wolde Allah haa Bereya boo, ɓe ngari, ɓe njiiɓi yimɓe, ɓe ummini ɓerɗe maɓɓe.

¹⁴Law deerɗiraaɓe boo ɗofti Pol haa fomoonde weendu, ammaa Silas e Timote lutti ton.

¹⁵Ɗoftuɓe Pol njahdi bee maako haa yotti Ateena, nden ɓe lori Bereya. Pol neli ɓe haa Silas e Timote haa ɓe ngara haa maako law.

¹⁶Yaake Pol ɗonno reena Silas e Timote haa Ateena, ɓernde mum metti nde o yi'i wuro man ɗon heewi labbi.

¹⁷Ngam maajum o hujjotiri bee Yahuudu'en e Yunaniŋke'en hulɓe Allah nder suudu dewal Yahuudu'en. Nyalaade fuu o ɗon hujjotira bee yimɓe ɓe o tawi haa luumo boo.

¹⁸Marɓe annde wi'eteeɓe Epikuri'en e Sitoyki'en woɗɓe boo kujjotiri bee maako. Woɗɓe mbi'i: “Ɗume ɗuuɗa-haalaajo oo yiɗi wi'go?” Woɗɓe boo mbi'i: “Teema o ɗon wolwa haala ɗowanteeɓe jananɓe.” Ɓe mbi'i ɗum ngam Pol ɗon waazina Linjiila Yeesu e ummitineeki maayɓe.

¹⁹Ngam maajum ɓe naŋngi mo, ɓe njahri mo haa nokkuure wi'eteende Areyopagus, ɓe mbi'i: “Min ngiɗi ekkitinol kesol ngol a ekkitinta.

²⁰A ɗon waŋgina haala kesa ka min meeɗaay nanugo ɗum, min ngiɗi faamugo ka.”

²¹Yimɓe Ateena e jananɓe jooɗiiɓe caka maɓɓe ɗonno cukli limtugo e nanugo haalaaji kesi.

²²Pol dari yeeso jama'aare haa Areyopagus, wi'i: “Yaa worɓe Ateena! Mi yi'i on ɗon tiini suklanaago haala diina mon jamum.

²³Ngam nde mi ɗon waanca nder wuro mon, mi yi'i kuuje ɗe on ɗon ndewa, mi tawi nokkuure diina mooɗon bee binndi ɗi'i: Ngam ɗowanteeɗo mo anndaaka. Kadi mo on ndewata, koo nde on anndaa mo, haala maako mi waazinta on.

²⁴Allah tagɗo duniyaaru e ko woni nder maaru fuu, kaŋko woni Jawmiraawo asama e lesdi, o jooɗataako nder cuuɗi diina ɗe juuɗe yimɓe mahi.

²⁵O maraay haaje yimɓe mbaɗana mo koo ɗume, ngam kaŋko hokkata koo moy yoŋki e poofɗe e koo ɗume fuu.

²⁶Diga goɗɗo gooto o tagri asli yimɓe fuu haa ɓe njooɗo haa duniyaaru ndu'u fuu. O darni wakkatiiji e keeri joonde maɓɓe boo.

²⁷O waɗi ɗum haa ɓe ɗaɓɓita mo, teema ɓe maata mo ɓe tawa mo ngam bee gooŋga Allah daayaaki koo moy meeɗen,

²⁸ngam ɗum wi'a: Yeeɗugo meeɗen, dimmbaago meeɗen, laataago meeɗen, fuu haa maako ɗum iwi. Bana woɗɓe haa yimooɓe mon mbi'i: Enen boo en danygol maako.

²⁹Nde nii en danygol maako, taa en numa Allah nanndi bee suuraaji ɗi kaŋŋeeri e cardi malla hayre ko yimɓe mbaɗata bee hakkiilo e baawal muuɗum'en.

³⁰Ɓooyma Allah munyani yimɓe nde ɓe anndaano haala muuɗum, ammaa jonta o umri yimɓe koo toy fuu ɓe tuuba.

³¹Ngam o darni nyannde nde o hiitorto duniyaaru fuu bee adilaaku, bee goɗɗo mo o suɓi. O gooŋɗiniri ɗum yeeso yimɓe fuu bee ummitingo mo diga maayde.”

³²Nde ɓe nani Pol ɗon wolwa haala ummitineeki diga maayde, woɗɓe njanci mo, ammaa woɗɓe mbi'i: “Min ngiɗi a wolwana min haala ka'a fahin.”

³³Nden Pol wurti caka maɓɓe.

³⁴Worɓe woɗɓe boo nuɗɗini, tokki mo. Ɗum Diyonisiyus, goɗɗo Areyopagus e debbo bi'eteeɗo Damaris e yimɓe feere.