Read Fulfulded Kuuɗe Nelaaɓe 22 Bible Online

Kuuɗe Nelaaɓe 22 - Fulfulded bible

Kuuɗe Nelaaɓe 22

¹“Yaa ndotti'en e deerɗiraaɓe! Nane, jonta haa mi wolwa hujja am nder haala ka'a.”

²Nde ɓe nani o ɗon wolwana ɓe bee Ibraniŋkeere, ɓe ɓesdi sirwaago. Nden Pol wi'i:

³“Min mi Yahuuduujo, danyaaɗo haa Tarsus nder Silikiya. Mi mawni boo haa ɗo, haa berniwol Urusaliima. Gamaliyel boo ekkitini yam fodde dookaaji kaakiraaɓe. Mi tiini nder kuuɗe Allah bee semmbe am fuu bana mbaɗoton hannde.

⁴Mi toonyi tokkiiɓe Laawol Almasiihu haa woɗɓe maayi. Mi naŋngi worɓe e rewɓe, mi nastini ɓe fursina[44].

⁵Hooreejo liman'en e dawrooɓe Yahuudu'en ngoni seedooɓe yam. Ɓe mbinndani yam bataakeeji ngam haa mi yahra ɗi haa deerɗiraaɓe haa Damas. Mi ɗonno yaha ton haa mi naŋngoya yimɓe, mi haɓɓa ɓe, mi wadda ɓe haa Urusaliima haa dawrooɓe kiito ɓe.”

⁶“Nde mi ɗon yaha Damas, mi ɓadake yottaago ton, caka nyalawma, law annoora makka iwi haa asama yaynani yam, taari yam.

⁷Mi do'i haa lesdi, mi nani sawtu wi'i yam: Sol, Sol, koni toonyotoɗa mi?

⁸Mi ƴami: An moy, Jawmiraawo? O wi'i yam: Min woni Yeesu mo Nasaratu, mo toonyotoɗa.

⁹Wondiɗɗiraaɓe am ngi'i annoora, ammaa ɓe nanaay sawtu bolwanɗo yam.

¹⁰Mi ƴami: Ɗume mi waɗata, Jawmiraawo? Jawmiraawo wi'i yam: Umma, yah Damas, ton ɓe ngeccete ko a tammi waɗugo fuu.

¹¹Annoora makka go ɗelki, wumni yam, ngam maajum wondiɗɗiraaɓe am ɗowi yam, njahri yam haa Damas.

¹²Ton woodi goɗɗo bi'eteeɗo Ananiyas, kulɗo Allah, ɗowtaniiɗo tawreeta. Yahuudu'en jooɗiiɓe Damas fuu ɗon mana mo.

¹³O wari haa am, o dari kommbi am, o wi'i: Sol, deerɗam, wumtu! Ɗon nii mi wumti, mi ɗon yi'a mo.

¹⁴O wi'i yam: Allah kaakiraaɓe meeɗen suɓi ma diga ɓooyma haa a faama muuyo maako, a yi'a Adiliijo maako, a nana ko o ɗon wolwa.

¹⁵Ngam a laatoto ceedoowo maako, a yeccan yimɓe fuu ko a yi'i e ko a nani.

¹⁶Ɗume a reenata jonta? Umma, jaɓ baptisma, laaɓa e hakkeeji maaɗa bee ewnaago innde Jawmiraawo.”

¹⁷“Mi lori Urusaliima. Nde mi ɗon waɗa do'a nder haykaliiru, Allah yi'ni yam kaayeefi,

¹⁸ndaa Jawmiraawo ɗon wolwanammi bana ni'i: Yaawɗa law, wurta Urusaliima, ngam yimɓe ɓe'e njaɓataa seedamku maaɗa dow am.

¹⁹Mi jaabi: Jawmiraawo, ɓe anndi fakat mi yehi cuuɗi dewal, mi naŋngi nuɗɗinɓe ma, mi fiyi ɓe.

²⁰Nyannde ɓe mbara ceedoowo ma Etiyen maa, min boo mi ɗon ton. Mi yerdi mbareeki maako, mi ayni limce warɓe mo.

²¹Jawmiraawo wi'i yam: Yah, ngam mi nelete daayiiɗum haa ummaatooje goɗɗe.”

²²Yimɓe munyani mo haa o yotti bolle man. Nde ɓe nani ɗum, ɓe kooli, ɓe mbi'i: “Mbare irin goɗɗo oo, taa acce mo o yeeɗa!”

²³Ɓe ɗon koola, ɓe ɗon cakkina limce maɓɓe dow, ɓe ɗon ukka collaaje.

²⁴Ardiiɗo dow sooje'en ujineere umri yimɓe mum ɓe njahra mo nder saŋngeere maɓɓe, ɓe piya mo, ɓe ndila mo haa o heɓta daliila ɗume Yahuudu'en ɗon koola bana nii dow maako.

²⁵Ammaa nde ɓe ɗon kaɓɓa mo haa ɓe piya mo, Pol wi'i ardiiɗo dow sooje'en teemerre gonɗo ton: “On ngoodi duŋayeere fiyugo Romaajo mo hiitaaka tawon na?”

²⁶Nde ardiiɗo man nani ɗum, o yehi haa ardiiɗo dow sooje'en ujineere go, o ƴami mo: “Ɗume a yiɗi waɗugo? Gorko oo, o Romaajo!”

²⁷Nden ardiiɗo dow sooje'en ujineere yehi haa Pol, ƴami mo: “Yeccam, a Romaajo na?” Pol jaabi: “Ooho, mi Romaajo.”

²⁸Ardiiɗo man wi'i: “Min, bee ceede ɗuuɗɗe keɓmi laataago Romaajo.” Pol wi'i: “Min mi Romaajo diga danyeeki am.”

²⁹Law sooje'en taaskaniiɓe fiyugo e dilugo mo haa o wolwa go, acci mo. Ardiiɗo maɓɓe go boo hultori nde o faami Pol, o Romaajo. Ndaa boo, o haɓɓi mo bee callalluuji.

³⁰Jaŋngo maajum, ardiiɗo sooje'en man yiɗi anndugo bee laaɓɗum daliila hujja kaye Yahuudu'en ngullori Pol. Ngam maajum o fiisti callalluuji Pol, o umri mawɓe liman'en e dawrooɓe fuu ɓe kawta. Nden o waddi Pol, o darni mo yeeso maɓɓe.