Read Fulfulded Kuuɗe Nelaaɓe 23 Bible Online

Kuuɗe Nelaaɓe 23 - Fulfulded bible

Kuuɗe Nelaaɓe 23

¹Pol suti dawrooɓe, wi'i: “Deerɗiraaɓe am! Min mi ɗowtani Allah haa hannde bee numo ɓernde laaɓŋgo.”

²Hooreejo liman'en bi'eteeɗo Ananiyas umri wonɓe kommbi Pol ɓe piya mo haa hunnduko.

³Pol wi'i mo: “Fakat Allah fiyete, an naafikiijo! A ɗon jooɗi ngam hiitaago yam fodde tawreeta, ammaa a luuti tawreeta nde a ɗon umra ɓe piyammi!”

⁴Wonɓe kommbi maako mbi'i mo: “A ɗon huɗa hooreejo liman'en mo Allah darni!”

⁵Pol jaabi: “Deerɗiraaɓe am, mi anndaa o hooreejo liman'en. Ngam Deftere Allah wi'i: Taa wolwu kalluka dow ardiiɗo ummaatoore mon.”

⁶Nde Pol anndi woɗɓe maɓɓe ɓe Saduki'en, woɗɓe boo Farisa'en, o wolwi nder dawriinde bee sawtu, o wi'i: “Deerɗiraaɓe am! Min mi Farisaajo, ɓii Farisaajo. Ɓe ngulli yam haa ɗo ngam mi woodi tammunde maayɓe ummititto diga maayde!”

⁷Nde o wi'i ɗum, Farisa'en e Saduki'en puɗɗi ngaaba, ɓe cenndi geɓe ɗiɗi.

⁸Ngam Saduki'en ɗon mbi'a ummitineeki diga maayde woodaa, ɓe ɗon mbi'a boo woodaa malaa'ikaajo, woodaa ruuhu. Ammaa Farisa'en ɗon mbi'a ɗum fuu ɗum ɗon.

⁹Nde hoolo man ɓesdi, woɗɓe haa moodiɓɓe tawreeta ɓe yeɓre Farisa'en ummi, ndartani mo bee caatal: “Min tawaay aybewol koo gootol haa gorko oo! Teema malaa'ikaajo malla ruuhu wolwani mo!”

¹⁰Ngaaba man ummiti bee semmbe haa ardiiɗo dow sooje'en ujineere go huli taa ɓe campita Pol. Ngam maajum o umri sooje'en maako ɓe njaha haa mooɓre, ɓe ngurtina Pol caka maɓɓe bee semmbe, ɓe njahra mo haa saŋngeere.

¹¹Jemmaare man Jawmiraawo waŋgani Pol, wi'i mo: “Tiɗɗin ɓernde ma! Bana a seedi yam haa Urusaliima, sey a seedo yam bana non haa Roma boo.”

¹²Jaŋngo man Yahuudu'en woɗɓe kawti, kaɓɓi dabare mbarugo Pol. Ɓe mbaɗi hunayeere ɓe nyaamataa koo ɗume, ɓe njarataa koo ɗume, sey to ɓe mbari mo.

¹³Hoocuɓe anniya ka'a ɓuri cappanɗe nayo.

¹⁴Ɓe njehi haa mawɓe liman'en e ndotti'en Yahuudu'en, ɓe mbi'i: “Min mbaɗi hunayeere min nyaamataa koo ɗume, sey to min mbari Pol.

¹⁵Jonta, onon bee dawrooɓe, sey on nela haa ardiiɗo dow sooje'en ujineere, o wadda Pol haa mon bana to on ngiɗno linyugo haala maako fahin. Minin boo min ɗon taaski mbarugo mo diga o yottaaki haa mooɗon.”

¹⁶Ammaa ɓii deerɗiraawo Pol debbo nani anniya baaltol man. O yehi, o nasti saŋngeere sooje'en, o yecci Pol haala man.

¹⁷Nden Pol ewni goɗɗo caka ardiiɓe dow sooje'en teemerre, wi'i mo: “Yahru suka oo haa ardiiɗo dow sooje'en ujineere, woodi ko o yeccata mo.”

¹⁸O yahri mo haa mawɗo maɓɓe man, o wi'i: “Pol kaɓɓaaɗo, ewni yam, o wi'i yam mi wadda suka oo haa maaɗa, ngam woodi ko o yiɗi yeccugo ma.”

¹⁹Mawɗo man naŋngi mo juŋngo, yahri mo sera, ƴami mo: “Ɗume a yiɗi yeccugo yam?”

²⁰O jaabi: “Yahuudu'en narri ƴamugo ma jaŋngo a yahra Pol haa dawrooɓe haa ɓe linya haala maako go fahin.

²¹Ammaa taa jaɓan ɓe, ngam worɓe ko ɓuri cappanɗe nayo ɗon mbaaltani mo, ɗon ndeena mo. Ɓe fuu ɓe mbaɗi hunayeere ɓe nyaamataa, ɓe njarataa sey to ɓe mbari mo. Ɓe taaski waɗugo ɗum, ɓe ɗon ndeena jaawaabu maaɗa.”

²²Ardiiɗo dow sooje'en ujineere go wi'i mo: “Taa a wi'a koo moy a yecci yam haala ka'a.” Nden o jaɓɓiti mo.

²³Nden o ewni yimɓe ɗiɗo nder ardiiɓe dow sooje'en teemerre, o wi'i ɓe: “Mooɓe sooje'en teemeɗɗe ɗiɗo e wa'iiɓe pucci cappanɗe njoweeɗiɗo e jogiiɓe labbe teemeɗɗe ɗiɗo, ɓe taaskano dillugo Kaysariya deydey saa'a joweenayi jemma.

²⁴Taaskane boo Pol pucci haa njahron mo jam haa Felikus, ngomnaajo.”

²⁵Nden o winndi bataakewol ngo'ol:

²⁶“Kalawdiyus Lisiyas haa Felikus, ngomnaajo tedduɗo, mi hoofni ma.

²⁷Gorko oo, Yahuudu'en naŋngi mo, ɓe ngiɗi mbarugo mo. Nde mi nani o Romaajo, mi yehi bee sooje'en, mi hisni mo.

²⁸Mi yiɗi anndugo ngam ɗume ɓe ngulli mo, ngam maajum mi yahri mo haa dawrooɓe maɓɓe.

²⁹Mi tawi o waɗaay koo ɗume ko he'i nastingo mo fursina[45] malla mbarugo mo. Ɓe ngulli mo ngam haala tawreeta maɓɓe tan.

³⁰Nde mi nani Yahuudu'en mbaɗi anniya kaɓɓi dabare ngam mbarugo mo, mi neldi mo haa maaɗa. Mi yecci wulliiɓe mo ɓe ngullo mo haa ma.”

³¹Nden sooje'en koo'i Pol bana hooreejo maɓɓe umri ɓe, ɓe njahri mo haa Antipatiris bee jemma.

³²Jaŋngo man sooje'en warnooɓe bee kosɗe kooti, ammaa wa'iiɓe pucci ndilli yeeso bee Pol.

³³Ɓe njahri mo Kaysariya, ɓe ndokki ngomnaajo bataakewol go, ɓe ngaddi Pol yeeso maako.

³⁴Ngomnaajo jaŋngi bataakewol. O ƴami Pol haa lesdi ndiye o iwi. Nde o tawi o Silikiyaajo,

³⁵o wi'i: “Mi nanan haala ma to wulliiɓe ma ngari.” Nden o umri sooje'en ɓe ayna Pol haa saare Hirudus.