Read Fulfulded Kuuɗe Nelaaɓe 3 Bible Online

Kuuɗe Nelaaɓe 3 - Fulfulded bible

Kuuɗe Nelaaɓe 3

¹Nyannde feere Piyer bee Yuhanna njehi haykaliiru ngam waɗugo do'a asiri.

²Haa dammugal bi'eteeŋgal Dammugal-Booɗŋgal, woodi goɗɗo boosɗo[5] diga danyeeki mum. Nde weeti fuu yimɓe maako ɗon ndoondo mo, njo'ina mo ton ngam o rooko nastanɓe haykaliiru.

³Nde o laari Piyer e Yuhanna ɗon nasta, o rooki ɓe.

⁴Ɓe cuti mo, nden Piyer wi'i: “Laar min!”

⁵Boosɗo laari ɓe booɗɗum, ngam o tammino ɓe ndokkan mo huunde.

⁶Ammaa Piyer wi'i mo: “Mi walaa ceede, mi walaa boo kaŋŋeeri, ammaa mi hokkete ko marmi: Bee innde Yeesu Almasiihu mo Nasaratu, umma, yah!”

⁷Nden Piyer naŋngi juŋngo maako nyaamo, ummini mo. Law, kosɗe maako keɓi semmbe,

⁸o hafti, o dari, o fuɗɗi yahugo. O nastidi bee Piyer e Yuhanna nder haykaliiru, o ɗon yaha, o ɗon diwa, o ɗon yetta Allah.

⁹Ummaatoore fuu yi'i mo o ɗon yaha, o ɗon yetta Allah.

¹⁰Nde ɓe annditi ɗum boosɗo mo jooɗino haa Dammugal-Booɗŋgal ngal haykaliiru ngam rookaago, ɓe kayɗini masin dow ko saali.

¹¹Nde nii gorko go accaay Piyer e Yuhanna, ummaatoore fuu doggi, yehi haa maɓɓe haa daŋki bi'eteeki Daŋki Suleymaanu, ngam ɗum hayɗini ɓe masin.

¹²Nde Piyer yi'i ɓe, o wi'i: “Onon Isra'iila'en, ko hayɗini on, koni cutiiɗon min? On tammi gorko oo fuɗɗi yahugo bee baawɗe amin malla kuuɗe amin booɗɗe na?

¹³Allah mo Ibrahiima, mo Isiyaaku, mo Yaakubu, Allah kaakiraaɓe meeɗen teddini suka muuɗum Yeesu mo on ndokki haa juuɗe mawɓe, on ngeddi mo yeeso Pilaatu, koo nde Pilaatu yiɗino yoofugo mo.

¹⁴On ngudini Ceniiɗo, Adiliijo, on tori Pilaatu o yoofana on mbaroowo ko'e.

¹⁵Non on mbari jawmu ngeendam, ammaa Allah ummitini mo diga maayde. Minin boo min seedooɓe haala ka'a.

¹⁶Boosɗo mo ngi'oton e mo annduɗon oo heɓti semmbe mum ngam daliila nuɗɗinki nder innde Yeesu. Nuɗɗinki ki'i hokki mo njamu yeeso mooɗon fuu.

¹⁷Deerɗiraaɓe am, mi anndi, onon e mawɓe mon, on mbaɗi ɗum ngam on paamaayno.

¹⁸Diga ɓooyma bee kunnduɗe annabi'en fuu, Allah anndini no Almasiihu muuɗum torroto. Bana nii o gooŋɗiniri ko o wi'no.

¹⁹Tuube! Ngartane Allah, ngam haa o yaafano on hakkeeji mon fuu,

²⁰o suusɗina ɓerɗe mon, o neldana on Yeesu Almasiihu mo o suɓani on diga ɓooyma.

²¹Doole Yeesu jooɗo haa asama, haa wakkati Allah tammi hesɗitingo kuuje fuu yotto, bana no o wi'i diga ɓooyma bee kunnduɗe annabi'en senaaɓe.

²²Muusa wi'i: Allah, Jawmiraawo mooɗon umminanan on annabiijo bana am nder deerɗiraaɓe mooɗon. Sey on nana ko o wi'ata on fuu.

²³Mo nananaay annabiijo oo fuu, o gurtinteeɗo e o nattinteeɗo diga caka ummaatoore.

²⁴Annabi'en fuu, diga Samuyila e annabi'en warɓe ɓaawo maako, mbolwi dow balɗe ɗe'e, ngooyni ɗe.

²⁵Onon ngoni ɓiɓɓe annabi'en e ɓiɓɓe alkawal ngal Allah haɓɓi bee kaakiraaɓe mooɗon, o wi'i Ibrahiima: Daliila danygol maaɗa, ummaatooje duniyaaru fuu keɓan barka.

²⁶Non Allah ummini suka mum, aarti nelugo mo haa mooɗon, haa keɓon barka, haa koo moy mooɗon waylito, acca kuuɗe mum kalluɗe.”