Read Fulfulded Kuuɗe Nelaaɓe 5 Bible Online

Kuuɗe Nelaaɓe 5 - Fulfulded bible

Kuuɗe Nelaaɓe 5

¹Ammaa woodi goɗɗo bi'eteeɗo Ananiyas, innde debbo maako boo Safira, o soorri goɗɗum haa maral maɓɓe.

²O narri bee debbo maako, o senndi ceede man, yeɓre o sigi, yeɓre[7] boo o yahri haa nelaaɓe.

³Piyer wi'i mo: “Ananiyas, koni a acci Sayɗaanu nasta ɓernde ma haa a fewana Ruuhu Ceniiɗo, a sigi yeɓre ceede coggu babal mooɗon?

⁴Diga a soorraay ngal, an jeyi. Nde a soorri ngal boo, an mari ceede man. Koni a waɗi anniya huuwugo kuugal nga'al? Allah a fewani, naa yimɓe.”

⁵Nde Ananiyas nani bolle ɗe'e, o do'i, o maayi. Kulol maŋngol naŋngi nanɓe haala ka'a fuu.

⁶Suka'en ngari, kasni mo, koo'i mo, uwoyi mo.

⁷Ɓaawo saa'aaji tati debbo maako wari, o anndaa ko saali.

⁸Piyer wi'i mo: “Yeccam, ceede bana nii coorruɗon babal mon na?” O wi'i: “Ooho, non min coorri ngal.”

⁹Nden Piyer wi'i mo: “Koni on narri, an bee gorko ma ngam jarribaago Ruuhu Jawmiraawo? Suka'en uwɓe gorko ma ɗon haa yolnde jonta, ɓe ndoondete an boo!”

¹⁰Ɗon nii, o do'i, o maayi. Suka'en nasti, tawi o maayi, ɓe ndoondi mo, ɓe uwoyi mo kommbi yenaande goriiko.

¹¹Kulol maŋngol naŋngi jama'aare nuɗɗinɓe e nanɓe haala ka'a fuu.

¹²Nelaaɓe ɗon kuuwa kuuɗe e alaamaaji e kaayeefiiji ɗuuɗɗi caka ummaatoore. Nuɗɗinɓe fuu ɗon kawta les daŋki Suleymaanu.

¹³Yimɓe wuro fuu kuli hawtango ɓe koo nde ummaatoore ɗonno maŋgta ɓe.

¹⁴Tum worɓe e rewɓe ɗuuɗɓe ɗon ɓesdano nuɗɗinɓe Jawmiraawo.

¹⁵Ngam maajum ɓe ɗon njahra nyawɓe haa laabi, ɓe ɗon mballina ɓe haa leese e daage, ngam haa mbeelu Piyer yaala dow woɗɓe maɓɓe, saa'i to o ɗon saalo.

¹⁶Yimɓe ngari diga gure taariiɗe Urusaliima, ɓe ngaddi nyawɓe maɓɓe ɓe ruuhuuji coɓɗi torri. Ɓe fuu ɓe njamɗiti.

¹⁷Nden hooreejo liman'en e wonduɓe bee maako fuu, waato yeɓre Saduki'en, kaaji nelaaɓe masin,

¹⁸ɓe naŋngi ɓe, ɓe nastini ɓe fursina[8].

¹⁹Ammaa jemmaare man malaa'ikaajo Jawmiraawo wari, maɓɓiti pareeje fursina, wurtini nelaaɓe, wi'i ɓe:

²⁰“Njehe, ndare nder haykaliiru, ngecce ummaatoore fuu haala ngeendam kesam ɗa'am.”

²¹Nelaaɓe njaɓi, mbaɗi non. Bee baɓɓol ɓe nasti haykaliiru, ɓe ekkitinani yimɓe kuuje ɗe'e. Hooreejo liman'en e wonduɓe bee maako ngari, ɓe ewni ndotti'en Yahuudu'en fuu ngam dawriinde. Nden ɓe neli haa fursina haa ɓe ngaddana ɓe nelaaɓe go.

²²Nde Sooje'en njotti fursina, ɓe tawaay ɓe ton. Nden ɓe lori, ɓe ngecci dawrooɓe:

²³“Min tawi dammuɗe ɗon maɓɓi booɗɗum, aynooɓe boo ɗon ayna, ammaa nde min maɓɓiti, min tawaay koo goɗɗo haa ton.”

²⁴Nde mawɗo aynooɓe haykaliiru e mawɓe liman'en nani ɗum, ɗum sakli ɓe ngam ɓe anndaa ko saali.

²⁵Nden goɗɗo wari, wi'i ɓe: “Ndaa, worɓe ɓe on nastinno fursina ɗon ndari nder haykaliiru, ɗon ekkitina ummaatoore!”

²⁶Nden mawɗo aynooɓe dillidi bee yimɓe mum ton, ɓe ngaddi nelaaɓe, ammaa naa bee semmbe, ngam ɓe kuli taa ummaatoore fiɗa ɓe bee kaa'e.

²⁷Nde ɓe ngaddi nelaaɓe, ɓe ndarni ɓe yeeso dawrooɓe. Hooreejo liman'en feli ɓe,

²⁸wi'i: “Min kaɗi on, taa on ngaazina ummaatoore bee innde gorko oo sam, ammaa ndaa ko on mbaɗi! On caŋkiti waazu mon haa Urusaliima fuu. On ngiɗi yowango min aybe mbareeki maako!”

²⁹Piyer e nelaaɓe woɗɓe njaabi: “Allah min ɗowtanto, naa yimɓe.

³⁰Allah mo kaakiraaɓe meeɗen ummitini Yeesu diga maayde, koo nde on mbarino mo bee ɓilugo mo dow leggal.

³¹Allah boo ɓaŋgti mo, jo'ini mo haa nyaamo muuɗum, laatini mo laamiiɗo, kisnoowo, ngam haa Isra'iila heɓa tuubu e yaafuye hakkeeji.

³²Minin ngoni seedooɓe haala ka'a, non boo Ruuhu Ceniiɗo, mo Allah hokki ɗowtaniiɓe mo.”

³³Nde dawrooɓe nani ɗum, ɓe ɓerni masin haa ɓe mbaɗi anniya mbarugo nelaaɓe.

³⁴Ammaa woodi gooto maɓɓe, Farisaajo mo innde mum Gamaliyel. O moodibbo tawreeta, teddinaaɗo yeeso ummaatoore fuu. O dari, o umri ɓe ngurtina nelaaɓe yaasi ngam wakkati seɗɗa.

³⁵Nden o wi'i dawrooɓe: “Onon Isra'iila'en, kakkilane ko on tammi waɗugo yimɓe ɓe'e.

³⁶Aran boo Tewdas waŋgi, o wi'i o goɗɗo mawɗo. Yimɓe baakin teemeɗɗe nayo tokki mo. Ammaa o mbaraama, tokkiiɓe mo fuu caŋkiti, haala maako waati.

³⁷Ɓaawoɗon Yahuuda Galiiliijo waŋgi yaake limki yimɓe lesdi. Kaŋko boo, yimɓe tokki mo, ammaa nde o mbara, tokkiiɓe mo caŋkiti.

³⁸Ngam maajum mi ɗon wi'a on, ndaaye yimɓe ɓe'e, acce ɓe. Ngam to nufaye man malla kuugal man iwi haa yimɓe, ɗum majjan.

³⁹Ammaa to haa Allah ɗum iwi, on mbaawataa jaalaago ɓe. Kakkile ngam taa on kaɓa bee Allah!” Dawrooɓe njaɓi haala maako.

⁴⁰Ɓe ewniti nelaaɓe, ɓe piyi ɓe, ɓe kaɗi ɓe wolwugo bee innde Yeesu. Nden ɓe njoofi ɓe.

⁴¹Nelaaɓe ummi caka dawrooɓe, ngurti, ndilli. Ɓe seyiiɓe masin ngam Allah heyni ɓe torreego ngam daliila innde Yeesu.

⁴²Nyalaade fuu, ɓe ɗon ekkitina e ɓe ɗon ngaazina yimɓe Linjiila Yeesu Almasiihu nder haykaliiru e haa ci'e[9].