Read Fulfulded Roma'en 1 Bible Online

Roma'en 1 - Fulfulded bible

Roma'en 1

¹Min Pol, maccuɗo Yeesu Almasiihu, mi ɗon winndana on, onon jama'aare nuɗɗinɓe wonɓe haa Roma: Allah ewni yam, waɗi yam nelaaɗo muuɗum, suɓi yam ngam haa mi waazina Linjiila maako.

²Diga ɓooyma Allah iini Linjiila ka'a bee kunnduɗe annabi'en nder defte ceniiɗe.

³Ka ɗon wolwa dow Ɓiɗɗo maako. Yeesu Almasiihu iwi haa danygol laamiiɗo Daawuda.

⁴Ammaa fodde Ruuhu Ceniiɗo, Allah tabitini mo o Ɓiɗɗo maako bee baawɗe saa'i o ummitini mo diga maayde, kaŋko woni Yeesu Almasiihu Jawmiraawo meeɗen.

⁵Ngam barka maako min keɓi mo'ere, min laati nelaaɓe haa ummaatooje fuu nuɗɗina Linjiila, ɓe ɗowtano Allah, ɓe teddina innde maako.

⁶Onon boo on ɗon nder yimɓe ɓe'e ngam Allah ewni on, wartiri on yimɓe Yeesu Almasiihu.

⁷Mi ɗon hoofna yiɗaaɓe Allah wonɓe haa Roma fuu, ewnaaɓe ngam laataago senaaɓe. Allah, Baabiraawo men e Yeesu Almasiihu, Jawmiraawo men ndokka on mo'ere e jam.

⁸Aran, mi yetti Allah am bee innde Yeesu Almasiihu ngam mooɗon fuu, ngam koo toy nder duniyaaru yimɓe ɗon mbolwa haala nuɗɗinki mon.

⁹Foroy mi ɗon toro ngam mooɗon: Allah woni ceedoowo yam! Kaŋko mi huuwanta bee ɓernde woore bee waazingo Linjiila Ɓiɗɗo maako.

¹⁰Koo ndey mi toroto mo fuu, mi ɗon toro mo haa mi heɓa laawol yahugo haa mooɗon to o muuyi.

¹¹Mi yenwi on masin, mi yiɗi yi'ugo on ngam mi sennda bee mooɗon dokkal ngal Ruuhu Allah hokki yam ngam semmbiɗingo on.

¹²Mi yiɗi ma taweego caka mooɗon ngam haa cemmbiɗindiren nder nuɗɗinki.

¹³Deerɗiraaɓe am, annde mi waɗi anniya nde ɗuuɗɗum yahugo haa mooɗon ammaa haa jonta mi heɓaay yahugo tawon. Mi ɗon yelo nii kuugal am waɗa nafuuda caka mooɗon boo, bana ko laati haa ummaatooje goɗɗe nder duniyaaru.

¹⁴Doole mi suklano yimɓe koo ɓeye: Ferɓe e ɓen peraay, jaŋnguɓe e ɓe njaŋngaay.

¹⁵Ngam maajum mi yeli waazingo on Linjiila, onon wonɓe haa Roma boo.

¹⁶Mi semtaay waazingo Linjiila ngam ɗum baawɗe Allah: Ka waawi hisnugo nuɗɗinɓe ka fuu, aran Yahuudu'en, nden yimɓe ummaatooje goɗɗe boo.

¹⁷Bee Linjiila ka'a, Allah ɗon waŋginana yimɓe fuu no ɓe laatorto adili'en yeeso muuɗum. Ɗum laatoto bee nuɗɗinki tan, diga fuɗɗam haa timmoode. Bana ko winnda: “Adiliijo yeeɗiran bee nuɗɗinki.”

¹⁸Ngam tikkere Allah waŋgi diga asama dow geddal yimɓe e sooynde adilaaku maɓɓe, bee maare ɓe kaɗi yimɓe anndugo gooŋga.

¹⁹Ko goɗɗo waawi anndugo dow Allah, ɗum waŋgani ɓe, ngam Allah bee hoore mum waŋginani ɓe ɗum.

²⁰Ngam koo nde neɗɗo waawataa yi'ugo Allah, o anndi bee laaɓɗum kanyum woni Allah fakat, o anndi boo baawɗe maako timmataa, ngam ɗum waŋgi nder tagdi fuu, diga Allah tagi duniyaaru. Ngam maajum ɓe ngalaa hujja sam.

²¹Ngam ɓe anndi Allah, ammaa ɓe teddinaay mo bana no haandani mo, ɓe ngettaay mo boo. Ngam maajum numooji maɓɓe ndaayi gooŋga, faamu wurti hakkiilooji maɓɓe, nyiɓre nasti.

²²Ɓe tammi ɓe ngoodi hikma, ammaa ɓe faataaɓe.

²³Ɓe acci Allah tedduɗo, duumiiɗo, ɓe ɗakkotiri bee suuraaji neɗɗo maayanɗo e colli e dabbaaji e ladooji.

²⁴Ngam maajum Allah yoofi ɓe ɓe tokko suunooji ɓerɗe maɓɓe, ɓe coɓnindira ɓalli maɓɓe bee kuuɗe cemtiniiɗe.

²⁵Ɓe ngayliti gooŋga Allah bee fewre, ɓe cujidani e ɓe ndewi tagle, ɓe acci tagɗo mo haandi yetteego haa foroy. Aamiina!

²⁶Ngam maajum Allah yoofi ɓe haa suunooji cemtiniiɗi. Rewɓe maɓɓe cannji baaldal fodde ɗabiya, mbaɗi ko luuti ɗabiya.

²⁷Bana non worɓe boo acci waaldugo bee rewɓe, ɗon mbaalda bee worɓe, ɗon kuuwindira cemtiniiɗum. Bana nii ɓe keɓani ko'e maɓɓe ngeenaari daliila majjere maɓɓe.

²⁸Nde ɓe cali anndititgo Allah, Allah yoofi ɓe ɓe tokko hakkiilooji maɓɓe paataaɗi, ɓe mbaɗa ko fottaay.

²⁹Ɓe ɗon keewi sooynde adilaaku e halleende e suuno e nganyaandi e kaajal. Ɓe mbarooɓe ko'e, jokkirooɓe, waɗooɓe rikici e tufle.

³⁰Ɓe ɗon kallina woɗɓe, ɓe ɗon nganya Allah, ɓe toonyooɓe, mawnitittooɓe, jurotooɓe meere. Tum ɓe ɗon tefa laabi kesi ngam haa ɓe mbaɗa kuuɗe kalluɗe. Ɓe ɗowtantaako saaro'en maɓɓe.

³¹Ɓe faataaɓe, ɓe kebbintaa kunayeeje maɓɓe, ɓe ngalaa yiide koo enɗam.

³²Ɓe anndi fakat tawreeta Allah hiiti waɗanɓe irin kuuɗe ɗe'e kiita mbareego. Bee man fuu ɓe ɗon tokko waɗgo ɗe. Ko tulliti boo, ɓe ɗon ngerdo waɗanɓe ɗe fuu.