Read Fulfulded Roma'en 14 Bible Online

Roma'en 14 - Fulfulded bible

Roma'en 14

¹Njaɓe tampuɗo nder nuɗɗinki caka mooɗon bilaa hiitaago numooji maako.

²Teema nuɗɗinki goɗɗo duŋanto mo nyaamugo koo ɗume fuu. Ammaa mo nuɗɗinki mum tampi, ɗon nyaama haakooji tan.

³Nyaamanɗo koo ɗume fuu, taa yawo nyaamanɗo haakooji tan. Nyaamanɗo haakooji boo, taa hiita oya, ngam Allah jaɓi mo.

⁴Kadi on poti hiitugo kuuwoowo goɗɗo feere na? Sey jawmiiko tan wi'ata to kuugal maako fotti malla fottaay. Fakat o do'ataako, ngam Jawmiraawo mari baawɗe jogaago mo.

⁵Goɗɗo ɗon wi'a nyalaade kaja ɓuran goɗɗe maŋngu. Goɗɗo boo ɗon wi'a nyalɗe fuu potan kal. Sey koo moy tabita nder faamu mum, tokko ɗum.

⁶To goɗɗo ɗon ɓurna nyalaade woore dow goɗɗe, o ɗon waɗa ɗum ngam haa o teddina Jawmiraawo. Nyaamanɗo koo ɗume fuu ɗon ɗaɓɓa teddingo Jawmiraawo, ɗon yetta Allah ngam nyaamdu. Bana non boo mo sali nyaamugo kuuje goɗɗe, ɗon ɗaɓɓa teddingo Jawmiraawo, ɗon yetta Allah ngam nyaamdu.

⁷Walaa koo gooto meeɗen yeeɗata ngam hoore mum, walaa mo maayata ngam hoore mum boo.

⁸To en ɗon ngeeɗa, ngam teddingo Jawmiraawo ngeeɗeten. To en maayi boo, ngam teddingo Jawmiraawo maayeten. Kaŋko o mari en koo nder ngeendam koo nder maayde.

⁹Ngam Almasiihu maayi, yeeɗiti haa o laato Jawmiraawo maayɓe e yeeɗɓe fuu.

¹⁰To non kam, koni kiitata deerɗa? Malla koni njawotoɗa deerɗa? Enen fuu en daroyto yeeso kiita Allah.

¹¹Ngam Deftere Seniinde wi'i: “Fakat bana mi geeto, koppi fuu tugganto yam, ɗemɗe fuu ceedoto min woni Allah. Non Jawmiraawo wi'i.”

¹²Saa'i maajum koo moy meeɗen jaabanto hoore mum yeeso Allah.

¹³Sey en acca hiitindirgo. Ndikka on mbaɗa anniya taa on ngaɗa ko do'ata deerɗiraawo goɗɗo nder hakke.

¹⁴Barka Jawmiraawo Yeesu, mi anndi e mi tabitini walaa koo ɗume laati coɓɗum bee hoore muuɗum. Sey to goɗɗo laari ɗum bana coɓɗum, nden kam ɗum laatanto mo coɓɗum.

¹⁵To a naawni ɓernde deerɗa bee nyaamdu ma koo nduye, nden kam a tokkaaki yiide. Almasiihu maayi ngam deerɗa. Ngam maajum taa nastin mo nder halkere bee nyaamdu ma.

¹⁶Nden kam taa goɗɗo hallina ko on ndaarata bana booɗɗum.

¹⁷Ngam laamu Allah kam, naa ɗum haala nyaamdu e njaram, ammaa ɗum adilaaku e jam bee Allah e seyo ngo Ruuhu Ceniiɗo hokkata.

¹⁸Koo moy huuwani Almasiihu bana maccuɗo, heɓi yerduye haa Allah e yimɓe fuu.

¹⁹Ngam maajum sey en tiino haa en njooɗodo jam, en cemmbiɗindira nder nuɗɗinki.

²⁰Taa on mbonna kuugal Allah ngam haala nyaamdu. Nyaamduuji fuu laaɓi, ammaa to goɗɗo seki dow nyaamdu mum, nden kam ɗum soɓnan mo.

²¹Ndikka taa on nyaama kusel, taa on njara inaboojam, taa on mbaɗa koo ɗume ko nastinta deerɗiraawo goɗɗo nder hakke.

²²Njoge ko on nuɗɗini nder haala ka'a hakkunde mooɗon bee Allah. Barka woodani goɗɗo to numo ɓernde muuɗum hiitataa ɗum nder ko o waɗata.

²³Ammaa to goɗɗo seki dow nyaamdu mum, Allah hiitoto ɗum, ngam o daraaki dow nuɗɗinki. Ko iwaay haa nuɗɗinki fuu, ɗum aybe.