Read Fulfulded Roma'en 5 Bible Online

Roma'en 5 - Fulfulded bible

Roma'en 5

¹Allah adilini en ngam en nuɗɗini mo. Jonta salaaman ɗon hakkunde maako bee meeɗen, barka Jawmiraawo men Yeesu Almasiihu.

²En keɓi mo'ere Allah bee laawol nuɗɗinki, en ɗon tabiti nder mo'ere man. En keewi seyo boo, ngam fakat en ɗon bee tammunde heɓugo tedduŋgal Allah.

³En ɗon ceyoro koo ɓillaaje men boo, ngam en anndi ɓillaare waddan munyal,

⁴munyal semmbiɗinan dartaare, dartaare boo tabitinan tammunde.

⁵Bee tammunde man en mbustataake sam, ngam Allah hokki en Ruuhu mum, mo hebbini ɓerɗe meeɗen bee yiide mum.

⁶Saa'i en tampuɓeno waɗgo ko fotti, Almasiihu maayi ngam hakke'en nder saa'iire nde Allah darni.

⁷Caɗɗum goɗɗo jaɓa maayugo mbattudi[2] goɗɗo gooŋgaajo. Teema o jaɓan maayugo mbattudi goɗɗo booɗɗo masin.

⁸Ammaa Almasiihu maayi mbattudi meeɗen yaake en hakke'en no. Bana nii Allah waŋginiri no o yiɗiri en.

⁹Nde nii en adilinaama bee ƴiiƴam maako, o hisnan en diga tikkere Allah boo.

¹⁰Saa'i en konne'en Allah no, en keɓi sulhotiral hakkunde meeɗen bee maako barka maayde Ɓiɗɗo maako. Sakkomaa jonta, ɓaawo sulhotiral nga'al, fakat en keɓan kisndam barka ngeendam Ɓiɗɗo oo.

¹¹Naa ɗu'um tan, ammaa en ɗon ceyoro kawtal bee Allah ngam daliila Yeesu Almasiihu, Jawmiraawo men mo sulhotiri en bee Allah.

¹²Hakke nasti duniyaaru daliila neɗɗo gooto. Hakke man waddi maayde. Ngam maajum yimɓe fuu ɗon maaya, ngam ɓe mbaɗi hakke.

¹³Hakke ɗonno nder duniyaaru diga tawreeta walaano. Ammaa Allah limaayno hakkeeji ɗi yimɓe mbaɗi, ngam walaano umroore tawon.

¹⁴Bee non fuu, diga Aadamu haa wargo Muusa, maayde laami dow yimɓe fuu, koo ɓe mbaɗaay hakke bana Aadamu mo luuti umroore Allah. Aadamu wonno misaalu goɗɗo garanɗo.

¹⁵Ammaa dokkal ngal Allah hokkata en bee goɗɗo oo nanndaay bee aybewol Aadamu sam. Fakat, yimɓe ɗuuɗɓe maayi ngam gooto waɗi aybe. Ammaa mo'ere Allah ɓuri mawnugo piw, non boo dokkal caahu ngal o hokkata yimɓe ɗuuɗɓe ngam daliila mo'ere neɗɗo gooto, waato Yeesu Almasiihu.

¹⁶Dokkal Allah nanndaay bee aybe goɗɗo go. Kiita Allah dow gooto oo aybini yimɓe fuu. Ammaa mo'ere Allah dow aybeeji ɗuuɗɗi adilini yimɓe fuu.

¹⁷Ngam daliila gooto, maayde laami dow yimɓe ngam gooto waɗi aybe. Nden kam, fakat heɓɓe mo'ere Allah ɗuuɗnde e adilaaku muuɗum caahu laamoto bee ngeendam barka gooto boo, waato Yeesu Almasiihu.

¹⁸Ngam maajum, bana no aybe goɗɗo gooto, waato Aadamu jaanyani yimɓe fuu kiita, kuugal goɗɗo gooto, waato Yeesu Almasiihu waddani yimɓe fuu adilaaku e ngeendam.

¹⁹Sooynde ɗowtaare goɗɗo gooto nastini yimɓe ɗuuɗɓe haa hakke. Non boo Allah adilini ɗuuɗɓe daliila ɗowtaare goɗɗo gooto.

²⁰Tawreeta waŋgi haa hakke ɓesda, ammaa haa hakke ɓesdi, mo'ere Allah boo ɓurti ɓesdaago.

²¹Bana no hakke waŋginiri baawɗe mum bee maayde, non boo baawɗe mo'ere Allah waŋgiri bee Yeesu Almasiihu Jawmiraawo meeɗen. Barka maako en laati adili'en yeeso Allah e en keɓi ngeendam nduumiiɗam.