Read Fulfulded 1 Korintu'en 11 Bible Online

1 Korintu'en 11 - Fulfulded bible

1 Korintu'en 11

¹Tokke misaalu am, bana min mi tokkori misaalu Almasiihu.

²Mi ɗon mana on ngam on ɗon ciftorammi foroy, on ɗon tokko ekkitinol ngol mi ekkitini on boo.

³Ammaa woodi ko ngiɗmi faamtingo on: Almasiihu woni hooreejo gorko fuu, gorko woni hooreejo debbo mum, Allah boo woni hooreejo Almasiihu.

⁴Nden kadi to nder mooɓtorde gorko ɗon waɗa do'a malla ɗon waɗa annabaaku bee hoore mum ɗon suddi, nden kam o teddinaay hooreejo maako, waato Almasiihu.

⁵Ammaa to nder mooɓtorde debbo ɗon waɗa do'a malla ɗon waazo suddaay hoore mum, nden kam o teddinaay hooreejo maako, waato goriiko. O laati bana laɓɗo hoore mum.

⁶To debbo suddataa hoore muuɗum, koni o laɓataa hoore maako? Ammaa to ta'ugo gaasa malla laɓugo hoore debbo ɗum cemtuɗum, nden kam sey o sudda hoore.

⁷Gorko suddataa hoore mum, ngam o ɗon waŋgina jaati e tedduŋgal Allah. Ammaa debbo ɗon waŋgina tedduŋgal gorko.

⁸Gorko tagaaka diga debbo, ammaa debbo tagaama diga gorko.

⁹Gorko tagaaka ngam debbo, ammaa debbo tagaama ngam gorko.

¹⁰Ngam daliila malaa'ika'en, debbo mara suddaare dow hoore mum. Kanjum waŋginta baawɗe goriiko.

¹¹Ammaa haa Jawmiraawo kam, gorko jooɗataako bilaa debbo, debbo boo jooɗataako bilaa gorko.

¹²Bana debbo tagaama diga gorko, bana non boo gorko danyaama diga debbo. Tagle fuu boo haa Allah iwi.

¹³Nume bee ko'e mooɗon: To debbo nder mooɓtorde ɗon toro Allah suddaay hoore mum, ɗum pottuɗum na?

¹⁴Koo ɗabiya yimɓe boo ɗon anndina on, to gorko yoofti gaasa hoore mum juuti, ɗum cemtuɗum.

¹⁵Ammaa ɗum daraja ngam debbo to yoofti gaasa hoore mum. Ngam gaasa njuutka hokkaama haa debbo bana suddaare.

¹⁶To goɗɗo yiɗi waabaago dow haala ka'a, sey o annda: Gikku ngu'u walaa haa amin, walaa boo haa jama'aaje yimɓe Allah.

¹⁷Woodi haala feere boo. Ngam daliila maaka mi manataa on. To on ɗon mooɓto, ɗum laatataako ngam hayru mon, ammaa ngam sarru mon.

¹⁸Aran, mi nani on cenndaama geɓe feere feere nder kawtal mon. Goɗɗum haala ka'a mi tammi ɗum gooŋga.

¹⁹Haani cenndol laato caka mooɗon ngam haa yerdaaɓe mbaŋga.

²⁰Yaake mooɓtotooɗon, naa kiirtaari Jawmiraawo nyaamoton.

²¹Ngam koo moy mooɗon ɗon yaawana nyaamugo nyaamdu muuɗum. Bana nii goɗɗo feere lutti bee dolo, goɗɗo boo ɗon wuyki.

²²Kadi, on ngalaa ci'e ngam nyaamugo e yarugo na? Malla on ɗon njawa jama'aare yimɓe Allah? On ngiɗi semtingo ɓe ngalaa koo ɗume na? Ko ngiɗɗon mi wi'a on? Mi mana on na? Aa'a, mi manataa on dow haala ka'a.

²³Ndaa ko mi heɓi diga Jawmiraawo, kanjum anndinmi on boo: Jawmiraawo Yeesu, nder jemmaare nde o hokkano haa juuɗe konne'en maako, o hoo'i tamseere,

²⁴o yetti Allah ngam maare, o yewi nde, o wi'i: “Ɗo ɗum ɓanndu am, hokkaandu ngam mooɗon. Mbaɗe ɗum ngam haa on ciftorammi.”

²⁵Ɓaawo nyaamugo maɓɓe, o hoo'i jardugel boo, o wi'i: “Jardugel nge'el woni alkawal kesal ngal Allah tabitiniri bee ƴiiƴam am. Koo ndey njaroton nder maagel fuu, mbaɗe ɗum ngam haa on ciftorammi.”

²⁶Koo ndey nyaamoton tamseere nde'e e njaroton nder jardugel nge'el boo, on ɗon ngaazina kubar maayde Jawmiraawo haa yotto loraaki maako.

²⁷Ngam maajum mo nyaami tamseere e mo yari nder jardugel Jawmiraawo bilaa samɗingo ɗum, o waɗi aybe dow ɓanndu e ƴiiƴam Jawmiraawo.

²⁸Nden kam, sey koo moy linya hoore mum hiddeko o nyaama tamseere e o yara nder jardugel boo.

²⁹Ngam to goɗɗo nyaami tamseere, yari nder jardugel bilaa senndindirgo ɓanndu Jawmiraawo bee nyaamduuji goɗɗi, o fooɗani hoore maako kiita.

³⁰Ngam daliila maajum ɗuuɗɓe caka mooɗon tampi, ɗuuɗɓe boo nyawi e woɗɓe ɗuuɗɓe boo maayi.

³¹To en linyi ko'e meeɗen, Allah hiitataako en.

³²Ammaa Jawmiraawo ɗon elta en bee kiita mum, ngam taa o do'a en kiita hawtaade bee duniyaaru.

³³Ngam maajum, deerɗiraaɓe am, to on ɗon mooɓto ngam nyaamugo kiirtaari Jawmiraawo, munye haa to on fuu on kawti.

³⁴To goɗɗo maati dolo, sey o aarta o nyaama diga saare maako, ngam taa pooɗanon ko'e mooɗon kiita Allah nder mooɓtorde mooɗon. Ko laarani haalaaji goɗɗi kam, mi ta'an ɗi to mi yottake haa mooɗon.