Read Fulfulded 1 Korintu'en 4 Bible Online

1 Korintu'en 4 - Fulfulded bible

1 Korintu'en 4

¹Non kadi anndite minin ngoni huuwanooɓe Almasiihu, kaliifa'en halfinaaɓe waŋgingo sirriiji Allah.

²Ko ɓe ƴamata haa kaliifa'en kam, ɗum laataago hoolaaɓe.

³Ngam am kam, to onon aybini yam malla to ɗum hiitooɓe woɗɓe aybini yam, ɗum walaa saman. Min bee hoore am maa mi aybintaa hoore am.

⁴Ɓernde am felaay yam dow koo ɗume, ammaa ɗum wi'aay mi laaɓɗo. Jawmiraawo feere mum woni kiitoowo yam.

⁵Ngam maajum taa kiite koo ɗume diga saa'i man siwaa. Munye haa Jawmiraawo wara, mo waŋginta nder laaɓɗum ko suuɗi nder nyiɓre. O waŋginan boo nufayeeje nyukkiiɗe nder ɓerɗe yimɓe. Nden kadi koo moy heɓan manoore mum bana no fottanta Allah.

⁶Deerɗiraaɓe am, mi huuwtiniri misaaluuji ɗi'i dow Apollos e dow am ngam daliila mooɗon. Mi yiɗi on tokko misaalu amin “bilaa ƴaɓɓaago keerol jo'inaaŋgol fodde ko winnda.” Ngam taa goɗɗo mooɗon tokko oo, yawo oya.

⁷Moy ɓurnu ma dow woɗɓe? Naa Allah hokki ma ko marɗa fuu na? To ɗum dokkal keɓɗa kam, koni jurortoɗa bana a heɓaayno ngal?

⁸Asee! Jonta on keɓi ko ngiɗɗon fuu! On ndiski timmi! On ngarti laamiiɓe, ammaa minin min keɓaay ɗum tawon! To on laatino non bee gooŋga kam, minin boo min laamodotono bee mooɗon.

⁹Ammaa mi tammi minin nelaaɓe, Allah waɗi min ɓaawo'en bana hiitaaɓe ngam mbareego. Min laatake bana huunde fijirteende yeeso duniyaaru, yeeso malaa'ika'en e yimɓe.

¹⁰Ngam daliila Almasiihu, minin min faataaɓe, ammaa onon, on marɓe hikma nder kawtal bee maako. Minin min tampuɓe, ammaa onon on semmbiɗɓe. Onon on horminaaɓe, ammaa minin min yawaaɓe.

¹¹Haa wargo saa'iire nde'e min ɗon maata dolo, min ɗon maata ɗomka, min temmbuɓe, min piyaaɓe, min yiilotooɓe,

¹²min ɗon coma ngam min ɗon kuuwa bee juuɗe amin. To ɓe kuɗi min, min ɗon mbarkiɗina. To ɓe toonyake min, min munyanan ɗum.

¹³To ɓe nyo'i min, min njaabo bee bolle belɗe. Haa jonta min laati bana mbuuwri duniyaaru, bana nyidduɗum ko yimɓe fuu ngudinta.

¹⁴Mi winndani on ɗum naa ngam haa mi semtina on, ammaa ngam mi reentina on ngam on laatake ɓikkoy am ngiɗaakoy.

¹⁵Ngam koo to on ngoodi eltooɓe ujine sappo nder Almasiihu, on ngoodi baaba gooto tan. Ɗum min waddani on ngeendam nder Almasiihu Yeesu nde mi waazini on Linjiila.

¹⁶Ngam man mi ɗon toro on: Tokke misaalu am.

¹⁷Ngam daliila ka'a mi neli Timote, ɓiɗɗo am giɗaaɗo e koolaaɗo nder kawtal bee Jawmiraawo haa mooɗon. O siftinoran on no tokkortoomi Almasiihu. Kanjum mi ekkitinta koo toy nder jama'aaje nuɗɗinɓe fuu.

¹⁸Woɗɓe mooɗon mawniti ngam ɓe tammi mi lorataako haa mooɗon.

¹⁹Ammaa to Jawmiraawo munyi, mi waran nii seɗɗa haa mooɗon. Mi anndan naa bolle mawnitiiɓe ɓe'e tan, ammaa ko ɓe mbaawi waɗugo boo.

²⁰Ngam laamu Allah daraaki dow bolle, ammaa dow baawɗe.

²¹Ɗume ngiɗɗon? Mi warda bee ɓoccol haa mooɗon na malla bee yiide e ɓernde ɗelemnde?