Read Fulfulded 2 Korintu'en 11 Bible Online

2 Korintu'en 11 - Fulfulded bible

2 Korintu'en 11

¹Ko ngiɗmi kam, haa on munyanammi, koo to mi laatake paataaɗo seɗɗa. Useni munyaneeɗam.

²Mi yiɗi on bee yiide haajunde, iwnde haa Allah. Mi haɓɓani on bana paanyo debbo haa gorko gooto tan, waato Almasiihu. Mi yiɗi mi yahra on bana paanyo debbo laaɓɗo yeeso maako.

³Ammaa ciftore no mboodi estiri Hawwa bee ƴoyre mum. Nden mi ɗon hula ngam taa hakkiilooji mooɗon mbonno bana non, on acca yiɗugo Almasiihu bee laaɓeeŋga e ɓernde woore.

⁴Ngam to goɗɗo wari waazini on Yeesu feere mo min ngaazinaay malla haa njaɓon ruuhu ngu laataaki Ruuhu Ceniiɗo mo on njaɓi malla kubaruwol ngol laataaki Linjiila ka on njaɓi, on munyanan mo bee koyɗum.

⁵Mi anndi mi famɗanaay nelaaɓe wi'eteeɓe mawɓe ɓe'e.

⁶Teema mi laataaki wela-ɗemŋgaljo, ammaa marugo anndal kam ɗum huunde feere. Koo toy e koo noy fuu min mbaŋginani on anndal nga'al laaɓɗum tal.

⁷Nde ngaazumi on Linjiila Allah, mi waɗi ɗum caahu. Mi leesni hoore am ngam ɓaŋgtugo on. Kanjum ɗum aybe na?

⁸Mi ɓilli jama'aaje nuɗɗinɓe goɗɗe bee jaɓugo ngeenaari haa maaje ngam haa mi huuwana on.

⁹Yaake mi ɗonno wondi bee mooɗon, mi teddanaay goɗɗo koo nde mi ɓilliiɗo. Ngam deerɗiraaɓe warɓe diga Makedoniya kumtani yam haaje am fuu. Mi yiɗaano teddango on nder koo ɗume. Koo yeeso ɗo boo mi yiɗaa.

¹⁰Bee gooŋga Almasiihu ngonka nder ɓernde am mbi'anmi on: Walaa koo gooto nder lesɗe Akaya haɗatammi juro am ngo'o.

¹¹Ngam ɗume mbi'mi ɗum? Ngam mi yiɗaa on na? Aa'a, Allah anndi mi yiɗi on!

¹²Mi tokkoto huuwugo bana no kuuwranmi jonta. Kanjum ngam taa mawnitittooɓe ɓe'e, wi'anɓe ɓe poti bee amin keɓa daliila juraago.

¹³Kamɓe ɓe laataaki nelaaɓe bee gooŋga, ɓe fewooɓe. Ɓe mbaɗi ko'e maɓɓe bana ɓe nelaaɓe Almasiihu.

¹⁴Walaa kaayeefiijum haa ton! Ngam Sayɗaanu boo ɗon waɗa hoore mum bana o malaa'ikaajo annoora.

¹⁵Ngam maajum saɗanaaki jagganiiɓe Sayɗaanu haa mbaɗa ko'e muuɗum'en bana ɓe huuwanooɓe adilaaku. Ammaa timmoode maɓɓe laatanto ɓe fodde kuuɗe maɓɓe.

¹⁶Sey mi wi'ta ɗum fahin: Taa goɗɗo laarammi bana mi paataaɗo. Malla njaɓeeɗam bana mi paataaɗo ngam haa min boo mi heɓa mi juro seɗɗa.

¹⁷Ko mbolwanmi jonta, mi wi'ataa ɗum fodde ko Jawmiraawo yiɗi. Mi wolwan bana mi walaa hakkiilo. Fakat mi tabitini, mi woodi daliila juraago.

¹⁸Ngam ɗuuɗɓe ɗon njuro fodde ɗabiya yimɓe duniyaaru. Ngam maajum min boo mi fuɗɗan juraago.

¹⁹Fakat onon laatiiɓe hakkilɓe, on ɗon munyana faataaɓe bee seyo!

²⁰On ɗon munyana koo ɓeye wartiranɓe on maccuɓe, naftortooɓe on, jaɓtanɓe jawdi mooɗon, yawotooɓe on, maaranɓe on.

²¹Mi ɗon semta wi'go ɗum: Nder kuuɗe bana ɗe'e, min tampuɓe masin! Ammaa to woɗɓe ɗon njuro, min boo mi juroto — Jonta mi ɗon wolwa bana paataaɗo!

²²Ɓe Ibraniŋke'en na? Min boo mi Ibraniŋkeejo. Ɓe Isra'iila'en na? Min boo mi Isra'iilaajo. Ɓe danygol Ibrahiima na? Min boo mi danygol Ibrahiima.

²³Ɓe huuwanooɓe Almasiihu na? Sey mi wolwa bana mi ginnaaɗo: Mi ɓuri ɓe. Mi ɓuri ɓe huuwugo piw: Mi ɓuri ɓe nastineego nder cuuɗi fursina[8]. Mi ɓuri ɓe ɓocceego. Mi ɓuri ɓe nastugo joote maayde.

²⁴Nde jowi Yahuudu'en ɓocci yam ɓocci cappanɗe tati e joweenayi.

²⁵Nde tati Roma'en paɗɗi yam bee cabbi. Nde woore yimɓe piɗi yam bee kaa'e. Nde tati koommbowal yooli bee am, nde woore mi jooɗi jemmaare e nyalawmaare nder ndiyam.

²⁶Nder jahaale am ɗuuɗɗe bee kosɗe, mi ɗonno yeeso joote maayde daliila maaje, fasooɓe, yimɓe asŋgol am e heefeerɓe. Mi ɗonno yeeso joote maayde nder berniiji, nder gure, nder laɗɗe, nder mbeela e caka fewooɓe wi'anɓe ɓe deerɗiraaɓe boo.

²⁷Mi maati comri e torra. Ndego mi heɓataa ɗaanaago, mi maati dolo e ɗomka. Nde ɗuuɗɗum mi heɓaay nyaamdu sam, jaaŋgol torri yam, mi sooyi limce boo.

²⁸Taa mi limta luttuɗum fuu. Ammaa woodi ko ɓuri ɓillugo yam nyalɗe fuu: Ɗum suklanaago jama'aaje nuɗɗinɓe fuu.

²⁹To goɗɗo maati tampere, min boo mi maatan nde. To goɗɗo do'ake, waɗi aybe, ɗum naawatam masin.

³⁰To haani mi juro, nden kam mi jurorto tampere am.

³¹Allah, Baabiraawo Jawmiraawo Yeesu meeɗen anndi mi fewataa. Yettoore laatano mo haa foroy!

³²Saa'i mi ɗonno haa Damas, ngomnaajo kuuwananɗo laamiiɗo Aretas jo'ini aynooɓe haa dammuɗe berniwol haa ɓe naŋngammi.

³³Ammaa deerɗiraaɓe nastini yam nder silaawo, ndiirtini yam haa wurdere mahol taariiŋgol berniwol. Bana nii kisrumi juuɗe ngomnaajo oo.