Read Fulfulded 2 Korintu'en 2 Bible Online

2 Korintu'en 2 - Fulfulded bible

2 Korintu'en 2

¹Ngam mi yiɗaa mettingo on ɓerɗe fahin, kanjum waɗi passititmi loraago haa mooɗon.

²Ngam to mi mettini on ɓerɗe, moy seynatammi fahin sonaa ɓe mi mettini ɗum'en ɓerɗe?

³Kanjum mi winndani on ɗum. To mi wari haa mooɗon, mi yiɗaa ɓernde am metta dow seynannooɓe yam. Mi anndi fakat, to min mi heɓi seyo, onon fuu on ceyoto boo.

⁴Nder cakle ɗuuɗɗe e metteeŋga, mi winndanino on bee gonɗi ɗuuɗɗi masin. Naa ngam haa mi mettina on ɓerɗe, ammaa haa mi waŋginana on no mi yiɗiri on masin.

⁵To goɗɗo nder mooɗon laatake daliila metteeŋga, naa min o mettini ɓernde, ammaa onon fuu — Malla ndikka mi wi'a o mettini woɗɓe mooɗon ɓerɗe, ngam taa mi saalitina.

⁶Ɓurna mooɗon peli goɗɗo oo, ɗum he'i.

⁷Ngam man sey on njaafo mo, on cemmbiɗina mo, ngam taa metteeŋga ɗuuɗana mo, nden o itta tammunde.

⁸Nden kam mi ɗon toro on: Kolle mo on ngiɗi mo.

⁹Mi winndani on ngam haa mi foonda on, haa mi heɓta to on ɗon tokko ko mi umri on fuu.

¹⁰To on njaafanake goɗɗo, mi yaafoto mo. To mi woodi haaje yaafaago koo ɗume, mi yaafoto ngam daliila mooɗon, yeeso Almasiihu.

¹¹Bana non Sayɗaanu jaalataako en. Ngam en anndi dabareeji maako bee laaɓɗum.

¹²Nde mi yotti Torowas haa mi waazina Linjiila Almasiihu, tawmi Jawmiraawo maɓɓitani yam laawol ngam kuugal nga'al.

¹³Ammaa mi walaano de'ere, ngam mi tawaay Titus, deerɗiraawo am. Ngam maajum mi jaɓɓotiri bee yimɓe wonɓe ton, mi dilli Makedoniya.

¹⁴Yettoore laatano Allah, ngam barka Almasiihu o ɗon yahra min foroy nder jahaaŋgal jaaliiɗo. O ɗon huuwtinira min ngam anndingo kubar maako koo toy, bana uurdi ndi uureeŋgol mum ɗon saŋkito koo toy.

¹⁵Min laatake bana uurdi marndi uureeŋgol belŋgol, ndi Almasiihu lii'ani Allah. Uureeŋgol man ɗon yotto hisanɓe e majjanɓe fuu.

¹⁶Haa majjanɓe, ɗum uureeŋgol maayde haa ɓe maaya. Haa hisanɓe, ɗum uureeŋgol ngeendam haa ɓe ngeeɗa. Moy he'i huuwgo kuugal nga'al?

¹⁷Minin min laataaki bana ɗuuɗɓe waazotooɓe wolde Allah ngam heɓugo riba. Min ɗon mbolwa gooŋga yeeso Allah, min ɗon mbolwa ko iwi haa Allah nder kawtal bee Almasiihu.