Read Fulfulded 2 Korintu'en 3 Bible Online

2 Korintu'en 3 - Fulfulded bible

2 Korintu'en 3

¹Asee! Min ɗon puɗɗita manugo ko'e amin na? Malla min ngoodi haaje bana yimɓe woɗɓe haa min njahrana on bataakeeji anndinanɗi min na malla min njaɓa irin maaji haa mooɗon na?

²Onon ngoni bataakewol amin, binndaaŋgol nder ɓerɗe amin. Yimɓe fuu anndi ngol, ɗon jaŋnga ngol boo.

³Fakat, on laatake bataakewol Almasiihu ngol min ngaddi. Ngol winndaaka bee dawa, ammaa bee Ruuhu Allah geeto. Ngol winndaaka dow alluhaaje kaa'e, ammaa nder ɓerɗe yimɓe.

⁴Min mbi'i non ngam min ɗon kooli Allah daliila Almasiihu.

⁵Minin bee ko'e amin min ke'aay huuwgo kuugal nga'al bee semmbe amin. Baawal amin iwi haa Allah.

⁶Kaŋko waawni min laataago jagganiiɓe alkawal kesal, ngal daraaki dow umrooje binndaaɗe, ammaa dow Ruuhu. Umrooje binndaaɗe ɗon njahra yimɓe haa maayde, ammaa Ruuhu ɗon yahra yimɓe haa ngeendam.

⁷Umrooje man mbinndaama bee karfeeje dow alluhaaje kaa'e. Saa'i man tedduŋgal Allah waŋgi. Yeeso Muusa yayni daliila maagal, haa yimɓe Isra'iila mbaawaay sutugo mo, koo to jayŋgol man caalotooŋgol. To kuugal umrooje gaddanɗe maayde marno tedduŋgal bana nga'al,

⁸nden kam tedduŋgal kuugal Ruuhu jahranŋgal haa ngeendam ɓurata mawnugo piw na?

⁹Kuugal gaddananŋgal yimɓe do'eeki kiita mari tedduŋgal, sakko kuugal gaddananŋgal ɓe yerduye Allah.

¹⁰Fakat, jonta tedduŋgal ɓooymawal to foondiraama bee tedduŋgal kesal, ngal laatoto meere.

¹¹To koo caaliiɗum maa marino tedduŋgal Allah kam, noy ko duumoto haa foroy?

¹²Ngam daliila tammunde nde'e, min ɗon keewi dartaare.

¹³Min mbaɗataa bana Muusa mo wiirni yeeso mum bee suddaare, ngam taa yimɓe Isra'iila ngi'a no jayŋgol maago jinnirta.

¹⁴Ammaa hakkiilooji maɓɓe mbaawataa faamugo, ngam haa wargo hannde to ɓe ɗon njaŋnga defte alkawal ɓooymawal, suddaare man ɗon tum. Nde ittataake, sey to goɗɗo jaɓi Almasiihu.

¹⁵Koo jonta boo, koo ndey ɓe njaŋngata tawreeta Muusa, suddaare man ɗon haɗa ɓe faamugo.

¹⁶Ammaa to goɗɗo waylitake haa Jawmiraawo, suddaare suddititto.

¹⁷Jawmiraawo, ɗum Ruuhu. Haa Ruuhu Jawmiraawo woni fuu, ton ndimu boo woni.

¹⁸Enen fuu en ɗon ndaara tedduŋgal bee geese cudditaaɗe, en ɗon mbaŋgina ngal bana daarorgal. Bana nii en ngaylorto haa en nannda bee Jawmiraawo, haa tedduŋgal maako ɓesdo waŋgugo nder meeɗen tum. Kanjum woni kuugal Ruuhu Jawmiraawo nder meeɗen.