Read Fulfulded 2 Korintu'en 4 Bible Online

2 Korintu'en 4 - Fulfulded bible

2 Korintu'en 4

¹Allah nder enɗam muuɗum, halfini min kuugal nga'al. Ngam maajum min tampataa sam.

²Min cali kuuɗe cuuɗiiɗe, cemtiniiɗe, min kuuwataa bee ƴoyre, min ngaylitittaa wolde Allah boo. Ammaa min ɗon anndina gooŋga laaɓka haa koo moy fuu anndita min hoolaaɓe yeeso Allah.

³To Linjiila ka min ngaazinta laati cuuɗiika, ka suuɗaama haa majjanɓe.

⁴Ɓe nuɗɗintaa, ngam Sayɗaanu, ɗowanteeɗo duniyaaru ndu'u wumni hakkiilooji maɓɓe. O haɗi ɓe yi'ugo jayŋgol Linjiila baŋginanŋgol tedduŋgal Almasiihu, mo laati jaati Allah.

⁵Min ngaazintaa haala ko'e amin, ammaa ɗum Jawmiraawo meeɗen Yeesu Almasiihu min ngaazinta. Minin kam min huuwanooɓe on ngam daliila Yeesu.

⁶Ngam Allah mo wi'no: “Sey annoora yayna nder nyiɓre”, acci annoora mum yayna nder ɓerɗe amin boo, ngam haa min annda tedduŋgal maako jaynanŋgal dow yeeso Almasiihu.

⁷Min ngoodi tedduŋgal nga'al nder amin, bana ndesaari nder payanɗe loope, ngam haa koo moy faama baawɗe kaayeefiije ɗe'e iwi haa Allah, naa haa amin.

⁸Min ɓilliiɓe gal wuttudu nduye fuu, ammaa min nattidinaaka. Min sakliiɓe ɗuuɗɗum, ammaa min ittaay tammunde.

⁹Min toonyaaɓe, ammaa Allah wudinaay min. Min do'aaɓe haa lesdi, ammaa min kalkaay.

¹⁰Foroy min ɗon mari nder ɓalli amin maayde Almasiihu, ngam haa ngeendam maako boo waŋga nder maaji.

¹¹Ngam koo nde min yeeɗɓe, tum min ɓadiiɓe maayde ngam daliila Yeesu, ngam haa ngeendam maako boo waŋga nder ɓalli amin maayanɗi.

¹²Bana non maayde ɗon huuwa nder amin, ammaa ngeendam ɗon huuwa nder mooɗon.

¹³Deftere wi'i: “Mi nuɗɗini Jawmiraawo, ngam maajum mbolwumi.” Minin boo min ngoodi nuɗɗinki man, ngam maajum min ɗon mbolwa.

¹⁴Min anndi Allah ummitinɗo Jawmiraawo meeɗen Yeesu diga maayde, ummitinan min boo bee Yeesu, o darnan min bee mooɗon yeeso maako.

¹⁵Ko heɓata min fuu, ɗum ɗon ngam nafugo on, haa mo'ere Allah yotto yimɓe ɗuuɗɓe, limgal mooɗon ɓesdo yeeso yeeso, ngam haa yettoore Allah e tedduŋgal mum ɗuuɗa.

¹⁶Ngam daliila man min tampataa sam. Koo to ɓalli amin ɗon tampa, ɓerɗe amin ɗon kesɗita nyalɗe fuu[2].

¹⁷Fakat, ɓillaaje amin jontaaje, ɗe koyɗe ɗe nduurataa boo. Ɗe ɗon taaskano min tedduŋgal duumiiŋgal kaayeefiiwal, tedduŋgal nga'al mawni ɓuri ɓillaaje amin piw.

¹⁸Minin, min cuklantaako kuuje gi'eteeɗe, ammaa ɗe ngi'ataake. Ngam kuuje gi'eteeɗe nduurataa, ammaa kuuje ɗe ngi'ataake, nduumoto.