Read Fulfulded 2 Korintu'en 6 Bible Online

2 Korintu'en 6 - Fulfulded bible

2 Korintu'en 6

¹Nde nii min huuwdooɓe bee Allah, min ɗon toro on: Taa lasbine mo'ere Allah nde keɓɗon.

²Ngam o wi'i: “Wakkati mo'ere mi jaɓi tornde ma, nyalaade kisndam mi walli ma.” Ndaa, jonta woni wakkati mo'ere, hannde woni nyalaade kisndam!

³Min ngiɗaa laatanaago koo moy daliila do'ere mum, ngam taa kuugal amin heɓa feloore.

⁴Ammaa nder koo ɗume fuu min ɗon tiino haa min ngooŋɗina min huuwanooɓe Allah: Bee munyal ɗuuɗŋgal min ɗon munyana caɗeele e torraaji e ɓillaaje.

⁵Ɓe ɓocci min, ɓe nastini min nder fursina[5], ɓe ummini fitinaaji dow amin. Min comi bee kuuɗe, nde ɗuuɗɗum min keɓaay ɗaanaago, min keɓaay nyaamugo.

⁶Min ɗon mbaŋgina min huuwanooɓe Allah bee laaɓeeŋga amin e anndal amin, bee munyal e mbooɗeeŋga, bee Ruuhu Ceniiɗo, bee yiide amin laaɓnde,

⁷bee waazu gooŋga e bee baawɗe Allah. Min njogi gooŋgaaku bana balmol amin ngam fiyugo konne'en e faddaago ko'e amin.

⁸Yimɓe ɗon teddina min, ɓe ɗon njawo min boo. Ɓe ɗon mbolwa booɗɗum dow amin, ɓe ɗon mbolwa kalluɗum boo. Ɓe ɗon ndaara min bana fewooɓe, asee boo gooŋga min mbolwata.

⁹Ɓe ɗon ndaara min bana min anndaaka, asee boo min anndaaɓe. Ɓe ɗon ndaara min bana ɓadiiɓe maayugo, asee boo min yeeɗɓe. Ɓe ɗon ɓocca min, ammaa bilaa mbarugo min.

¹⁰Ɓe mettini min ɓerɗe, ammaa min ɗon ceyi tum. Ɓe ɗon ndaara min bana talaka'en, ammaa min ɗon ndiskina ɗuuɗɓe. Min ɗon bana ɓe ngalaa koo ɗume, ammaa min ɗon mari koo ɗume fuu.

¹¹Onon Korintu'en, min mbolwani on nder feecaare. Min maɓɓitani on ɓerɗe amin jaasɗum.

¹²Min maɓɓanaay on ɗe, ammaa onon on maɓɓani min ɓerɗe mooɗon.

¹³Mi ɗon wolwana on bana ɓikkoy am. Mbaɗe bana amin: Maɓɓitane min ɓerɗe mooɗon jaasɗum.

¹⁴Taa laate huuwdooɓe bee yimɓe ɓe nuɗɗinaay Jawmiraawo. Noy gooŋgaaku hawtirta bee halleende malla ko hawtata annoora bee nyiɓre?

¹⁵Narral ngale waɗete hakkunde Almasiihu e Sayɗaanu? Kawtal ngale laatoto hakkunde nuɗɗinɗo e mo nuɗɗinaay?

¹⁶Ɗume hawtata haykaliiru Allah bee labbi? Ngam enen en haykaliiru Allah geeto, bana o wi'i: “Mi jooɗoto caka maɓɓe, mi wondan bee maɓɓe. Mi laatoto Allah maɓɓe, kamɓe boo ɓe laatoto ummaatoore am.”

¹⁷Ngam maajum, “ngurte caka maɓɓe, cenndire bee maɓɓe. Non Jawmiraawo wi'i. Taa meeme coɓɗum koo seɗɗa. Nden kam mi jaɓan on.

¹⁸Mi laatoto baaba mooɗon, onon boo on laatoto ɓiɓɓe am worɓe e rewɓe. Nii Jawmiraawo Baawɗo wi'i.”