Read Fulfulded 2 Korintu'en 7 Bible Online

2 Korintu'en 7 - Fulfulded bible

2 Korintu'en 7

¹Soobiraaɓe am yiɗaaɓe, iinaaji Allah ɗi'i fuu laatanake en. Ngam maajum laɓɓinen ko'e meeɗen diga ko soɓnata ɓanndu e ruuhu fuu. Sey en laato senaaɓe timmuɓe nder kulol Allah.

²Maɓɓitane min ɓerɗe mooɗon. Min mbaɗaay koo gooto mooɗon aybe[6], min mbonnaay koo gooto mon, min koocaay huunde goɗɗo bee ƴoyre.

³Mi wi'aay ɗum ngam haa mi hiito on. Mi aartuno wi'go ɗum: Ɓerɗe amin maɓɓitani on ngam haa en ngonda koo nder maayde koo nder ngeendam.

⁴Mi ɗon hooli on masin, mi ɗon seyoro on ɗuuɗɗum, mi ɗon heewi de'ere. Nder ɓillaaje amin fuu mi ɗon heewi seyo maŋngo.

⁵Koo wakkati min njotti Makedoniya boo, min keɓaay siwtaago sam. Min potti bee caɗeele ɗuuɗɗe: Woodino jokkirli bee yimɓe e kulol nder ɓerɗe amin.

⁶Ammaa Allah, de'itinoowo sakliiɓe, de'itini min bee garki Titus.

⁷Naa garki maako tan de'itini min, ammaa o yecci min boo no on nde'itiniri mo. Kubaruwol ngo'ol boo de'itini min. O yecci min no on ngenwiri min, non boo metteeŋga nga on ngontiri e no on tiinori jiŋngugo yam. Kanjum ɗum seyni yam masin.

⁸Koo to bataakewol ngol mi winndani on mettini on ɓerɗe, mi mimsitittaako ɗum. Aran nde ngi'mi no ngol mettiniri on ɓerɗe, mi ɓadakeno mimsitaago.

⁹Ammaa jonta kam mi ɗon seyo. Mi seyoraaki mettamɓeram mooɗon, ammaa ngam tuubu ngu bataakewol ngo'ol waɗi nder ɓerɗe mooɗon. Metteeŋga mooɗon fottani Allah, ngam maajum min mbaɗaay on sarru sam.

¹⁰Ngam metteeŋga fodde muuyo Allah ɗon waɗa tuubu, tuubu ngu'u boo waɗan kisndam. Walaa haaje mimsitaago irin metteeŋga nga'a. Ammaa metteeŋga fodde ɗabiya duniyaaru yahran haa maayde.

¹¹Ndaare! Metteeŋga mooɗon fodde muuyo Allah waddani on tiinaare ɗuuɗnde, on ɗon ɗaɓɓa laɓɓingo ko'e mooɗon diga aybe, hakkiilooji mooɗon ummake, kulol mooɗon ɗuuɗi, on ɗon ngenwammi, on ɗon tiino hiitaago halleende. Bee noy fuu on mbaŋgini ko'e mooɗon on laaɓɓe nder haala ka'a.

¹²Nde mi winndani on, mi winndaay ngam daliila baɗɗo aybe malla ngam baɗanaaɗo aybe. Ammaa mi winndi ngam haa on paama, haa on mbaŋgina yeeso Allah boo no on tiinorto ngam amin.

¹³Kanjum de'itini min. Ko ɓuri de'itinki man, min ceyi masin daliila seyo ngo Titus heɓi, ngam onon fuu on ciwtini ɓernde maako.

¹⁴Mi mantorino on yeeso maako, onon boo on cemtinaay yam. Ammaa foroy min mbolwani on gooŋga, non boo ko min mantori on yeeso Titus laatake gooŋga.

¹⁵Yiide maako dow mooɗon ɓesdi koo ndey o siftori ɗowtaare mooɗon, ngam on njaɓɓori mo bee kulol e diwŋgol.

¹⁶Walaa ko haɗatammi hoolaago on, kanjum mi seyorto.