Read Fulfulded Galaatiya'en 5 Bible Online

Galaatiya'en 5 - Fulfulded bible

Galaatiya'en 5

¹Almasiihu rimɗini en haa en njooɗo en rimɓe. Ngam man tabite nder ndimu, taa acce goɗɗo wartira on maccuɓe fahin.

²Naneeɗam! Min Pol ko mbi'anmi on: To on njaɓi juulnaago, nden kam Almasiihu nafataa on sam.

³Koo moy jaɓi juulnaago, gooŋga mi ɗon wi'a mo fahin, doole o ɗowtano tawreeta fuu.

⁴To on ɗon ɗaɓɓita adilaaku Allah dow laawol tawreeta, nden kam on cenndiri bee Almasiihu, on ngalaa geɗal haa mo'ere Allah boo.

⁵Minin kam min ɗon tammi Allah adilinan min. Ɗum iwi haa nuɗɗinki, min ɗon ndeena ɗum bee baawɗe Ruuhu.

⁶Ngam to goɗɗo ɗon nder kawtal bee Almasiihu, juulnol malla saadoniiku walaa saman. Nuɗɗinki baŋginanki yiide tan mari saman.

⁷On puɗɗi laawol mon booɗɗum. Moy darni on, haɗi on ɗowtanaago gooŋga?

⁸Wasuyeewol man iwaay haa Allah ewniiɗo on.

⁹Taa ngejjite: “Ufnirɗum seɗɗa ufnan kullu fuu.”

¹⁰Ammaa ngam daliila Jawmiraawo mi ɗon hooli on, mi anndi on numataa bee hakkiilo feere. Mo fitini on o kiiteteeɗo, koo ɗum moye.

¹¹Deerɗam'en, to mi tokkitinno waazingo nafuuda juulnol haa jonta, nden kam ɓe toonyataakono yam e haala gaafaaŋgal Almasiihu boo laatataakono daliila fergere!

¹²Fitinɓe on ɓe'e, ndikka ɓe ta'a les maɓɓe fuu!

¹³Deerɗam'en, Allah ewni on haa on laato rimɓe. Tan nii taa ndimu ngu'u laato hujja ngam yeeɗugo fodde suunooji mon, ammaa sey koo moy jaggano deerɗum bee yiide.

¹⁴Tawreeta fuu mooɓi nder wolde woore: “Yiɗ keeddiɗɗiraawo ma bana no a yiɗiri hoore ma.”

¹⁵Ammaa to on ɗon ŋatindira, on ɗon nyaamindira bana dabbaaji kalluɗi, kakkile ngam taa on nattindira.

¹⁶Ndaa ko ngiɗmi wi'go: Ngeeɗe fodde Ruuhu Allah, nden kam on mbaɗataa ko suunooji neɗɗo ngiɗi.

¹⁷Ngam suunooji neɗɗo ɗon hona Ruuhu Allah, Ruuhu Allah boo ɗon hona suunooji neɗɗo. Ngam daliila konaaŋgu ngu'u on mbaawataa waɗugo ko ngiɗɗon.

¹⁸Ammaa to Ruuhu Allah ɗon ɗowa on, nden kam tawreeta walaa baawɗe dow mooɗon.

¹⁹Kuuɗe ɗe suuno neɗɗo huuwata ɗe baŋguɗe: Ɗum kuuɗe cemtiniiɗe e coɓki e daakaareeku

²⁰e dewki labbi e hiila e nganyŋgu e jokkirgol e kaajal e haa'inaare e mawnitaare e cenndol e biɗu'aakuuji

²¹e suuno e wuykere e pijirle kalluɗe e kuuɗe goɗɗe irin ɗe'e. Ko mbi'mi on diga ɓooyma, sey mi wi'a ɗum fahin: Huuwanɓe irin kuuɗe ɗe'e ndonataa laamu Allah.

²²Ammaa ko Ruuhu Allah rimata ɗum yiide e seyo e salaaman e munyal e enɗam e mbooɗeeŋga e hoolaare

²³e yaŋkinaare e naŋgtaare. Tawreeta haɗataa kuuje ɗe'e.

²⁴Koo moy laati goɗɗo Almasiihu Yeesu, tiggi ɓanndu mum bee giɗaaɗi e suunooji maaru haa gaafaaŋgal.

²⁵Ruuhu Allah hokki en ngeendam, nden kam accen Ruuhu man ɗowa en.

²⁶Taa en mawnito, taa en tikkindira, taa en kaajindira.