Read Fulfulded Efesu'en 2 Bible Online

Efesu'en 2 - Fulfulded bible

Efesu'en 2

¹Naane kam on maayɓeno ngam daliila aybeeji e hakkeeji mon.

²On ngeeɗino nder maaji fodde jahargal duniyaaru ndu'u e fodde ardiiɗo laamu ngonŋgu nder hawa. Koo jonta boo o ɗon huuwa nder tuurtuɓe dow umrooje Allah.

³En fuu en laatino bana maɓɓe, en tokkino suunooji ɓalli men. En mbaɗino ko ɓalli men e hakkiilooji men ɗaɓɓi fuu. Nde non en mbaano, tikkere Allah ɗonno dow meeɗen bana dow yimɓe woɗɓe fuu.

⁴Ammaa Allah o ɗuuɗa-hinnuyeejo. Daliila yiide maako mawnde nde o yiɗiri en,

⁵koo nde en maayɓeno daliila aybeeji meeɗen, o yeeɗitini en hawtaade bee Almasiihu — bee mo'ere maako keɓruɗon kisndam.

⁶Allah ummitini en hawtaade bee Almasiihu, jo'ini en hawtaade bee maako haa asamanji,

⁷ngam hollango zamanuuji garanɗi mo'ere maako ɗuuɗnde, waato mbooɗeeŋga nga o woonani en nder Yeesu Almasiihu.

⁸Ngam bee mo'ere maako keɓruɗon kisndam ngam on nuɗɗini. Ɗum iwaay haa mooɗon, ɗum dokkal Allah.

⁹Ɗum iwaay boo haa kuuɗe mon, ngam taa goɗɗo juroro.

¹⁰Ngam Allah bee hoore mum tagi en. O tagi en nder Yeesu Almasiihu haa en kuuwa kuuɗe booɗɗe. Kanje boo, Allah aarti taaskitini ɗe haa en kuuwa ɗe.

¹¹Ciftore ɗu'um: Naane on yimɓe ummaatooje goɗɗeno fodde ɗabiya neɗɗo. Yahuudu'en, juulniiɓe ɗon mbi'a on, on saadooni'en. Juulnol maɓɓe, ɗum juulnol ɓanndu ngol yimɓe mbaɗata.

¹²Saa'i man on ngonaayno nder Almasiihu, on laataakino yimɓe ummaatoore Isra'iila, on jananɓeno, on nastaayno nder alkawalji ɗi Allah haɓɓuno bee ummaatoore mum, on keɓaayno iinawol Allah. On ɗonno njooɗi nder duniyaaru ndu'u bilaa tammunde e bilaa Allah,

¹³ammaa jonta nder kawtal bee Yeesu Almasiihu, onon daayinooɓe bee Allah go, on ɓaditinaama daliila ƴiiƴam Almasiihu.

¹⁴Ngam kaŋko woni salaaman meeɗen, o wartiri Yahuudu'en e ɓen laataakino Yahuudu'en fuu ummaatoore woore. Bee maayde maako o yibbiniri mahol cennduŋgol caka meeɗen e o timmini konnaagu caka meeɗen.

¹⁵O wili tawreeta bee umrooje mum e farillaaji mum, haa o hawta asliiji ɗiɗi ɗi'i, o laatina ɗi goɗɗo keso gooto nder maako, o tabitina salaaman,

¹⁶o sulhindira asliiji ɗiɗi ɗi'i bee Allah, nder ɓanndu wooru bee maayde maako dow leggal gaafaaŋgal, o itta konnaagu.

¹⁷O wari waazingo kubaruwol belŋgol, ngol salaaman haa mooɗon, onon daayiiɓe e ɓadiiɓe fuu.

¹⁸Ngam daliila maako en fuu en keɓi laawol yottaago Baabiraawo nder Ruuhu gooto.

¹⁹Ngam maajum jonta kam, onon yimɓe ummaatooje, naa on jananɓe malla hoɗɓe fahin, ammaa on kawti bee senaaɓe woɗɓe, on ɗon nder ummaatoore Allah, on yimɓe saare Allah boo.

²⁰On njo'inaama dow caɓɓaaje nelaaɓe e annabi'en. Yeesu Almasiihu bee hoore mum woni hayre talkumoore.

²¹Nder maako geɓe nyiɓaalo man fuu ɗon pottotira, haa ngol mawna, ngol laatano Jawmiraawo haykaliiru seniindu.

²²Nder kawtal bee maako onon boo on ɗon mahe hawtaade bee maɓɓe ngam haa nyiɓaalo ngo'o laato jooɗorde nde Ruuhu Allah jooɗoto haa muuɗum.