Read Fulfulded Filippi'en 1 Bible Online

Filippi'en 1 - Fulfulded bible

Filippi'en 1

¹Min Pol e Timote, maccuɓe Yeesu Almasiihu, min ɗon mbinndana on, onon senaaɓe Yeesu Almasiihu wonɓe haa Filippi fuu e ardiiɓe e wallooɓe jama'aare nuɗɗinɓe:

²Allah, Baabiraawo men e Jawmiraawo Yeesu Almasiihu ndokka on mo'ere e salaaman.

³Koo ndeye mi siftori on, mi ɗon yetta Allah am ngam mooɗon,

⁴tum mi ɗon do'ano on fuu bee seyo nder do'aaje am fuu,

⁵ngam on mballi yam anndingo Linjiila diga nyannde aartunde haa wargo hannde.

⁶Mi anndi fakat, Allah puɗɗuɗo kuugal booɗŋgal nder mooɗon timminan ngal boo haa nyalaade nde Yeesu Almasiihu loroyto.

⁷Ɗum pottuɗum mi ɗon numana on bana nii, ngam mi yiɗi on masin. On fuu on kawti bee am nder kuugal ngal Allah mo'ani yam saa'i mi kaɓɓaaɗo nder fursina[1], saa'i mi seedani Linjiila yeeso kiita e mi tabitini ka.

⁸Allah woni ceedoowo yam, o anndi no mi yiɗiri on fuu bee yiide mawnde, iwnde haa Yeesu Almasiihu.

⁹Mi ɗon toro Allah ɗu'um: Haa yiide mon ɓesdo yeeso yeeso bee faamu e anndal koo ngale,

¹⁰nden kam on paaman ko ɓuri fottugo, on laatoto laaɓɓe, on ngalaa feloore nyannde nde Almasiihu loroyto,

¹¹on heewɓe nafuuda kuuɗe adiliije barka Almasiihu ngam teddinki Allah e maŋgtoore mum.

¹²Onon deerɗiraaɓe, mi yiɗi on paama booɗɗum: Ko heɓi yam walli maa kuugal Linjiila yahugo yeeso yeeso.

¹³Yimɓe laamorde fuu e wonɓe koo toy fuu anndi bee laaɓɗum jonta mi kaɓɓaaɗo daliila Almasiihu.

¹⁴Kaɓɓorli am cemmbiɗini ɓerɗe deerɗiraaɓe ɗuuɗɓe nder kawtal muuɗum'en bee Jawmiraawo, ɓe ɗon ɓesda waazingo wolde Allah bee tiinaare bilaa kulol.

¹⁵Gooŋga kam, woɗɓe ɗon ngaazina kubar Almasiihu ngam daliila kaajal malla ngam ɓe ngiɗi gaabotiral. Ammaa woɗɓe ɗon mbaɗa ɗum bee numo wooɗŋgo,

¹⁶ngam ɓe ngiɗi Almasiihu, ɓe anndi Allah darni yam ngam kuugal seedaago Linjiila.

¹⁷Ammaa ɓeya ɗon ngaazina kubar Almasiihu bee numooji kaajuɗi, anniyaaji maɓɓe laaɓaay. Ɓe ɗon ɗaɓɓa tullingo torraaji am nder fursina.

¹⁸Ko yaali yam! To ɓe ɗon ngaazina kubar Almasiihu koo noy, koo bee naafikaare koo bee gooŋga, min kam mi seyori ɗum. Koo yeeso ɗo boo mi seyorto ɗum,

¹⁹ngam mi anndi timmoode ɓillaaje man ɗum kisndam am, barka do'aaje mon e ballal Ruuhu Yeesu Almasiihu.

²⁰Ndaa ko ngenwanmi e ko tammiimi: Walaa ko semtintammi, ammaa bana foroy, non jonta, mi anndi fakat yimɓe teddinan Almasiihu ngam ko tammi heɓugo yam, koo bee ngeendam am koo bee maayde am boo.

²¹Min kam, Almasiihu woni ngeendam am, maayugo boo ɗum riba.

²²Ammaa to yeeɗugo nafan kuugal am, nden kam mi anndaa ko cuɓanmi.

²³Hakkiilo am senndake ɗiɗi: Mi yeli dillugo ngam wondugo bee Almasiihu, kanjum ɓurantam wooɗugo piw,

²⁴ammaa ngam daliila mooɗon, ndikka mi yeeɗa tawon.

²⁵Ngam maajum mi anndi fakat mi jooɗoto, mi wonda bee mooɗon fuu ngam haa njahon yeeso yeeso e haa ceyon nder nuɗɗinki mon.

²⁶Nden kam, to mi wari haa mooɗon fahin, seyo mooɗon nder kawtal bee Yeesu Almasiihu ɓesdan ngam daliila am.

²⁷Tan nii ngeeɗe fodde ko haandani Linjiila Almasiihu. Koo mi heɓan wargo haa mooɗon, mi yi'a on, koo mi heɓataa boo, sey mi tawa, on ɗon tabiti dow hakkiilo wooto, on ɗon kaɓda hawtaade ngam gooŋga Linjiila bee ɓernde woore.

²⁸Taa acce konne'en kulna on koo seɗɗa. Ngam maɓɓe kam, ɗum ɗon holla halkere maɓɓe, ammaa ngam mooɗon ɗum ɗon holla kisndam mon. Ɗum iwi diga Allah.

²⁹Allah mo'ani on ngam daliila Almasiihu, naa ngam haa on nuɗɗina mo tan, ammaa ngam haa on njara bone ngam maako boo.

³⁰On ɗon kawti bee am nder haɓre woore. Naane on ngi'no haɓre am nde'e. On nani koo jonta boo mi ɗon nder maare.