Read Fulfulded Filippi'en 2 Bible Online

Filippi'en 2 - Fulfulded bible

Filippi'en 2

¹Almasiihu semmbiɗini on na? Yiide maako suusɗini on na? Ruuhu maako hawti on na? On ɗon ngiɗindira na? On ɗon enɗindira na?

²To nonnon, nden kam timmidine seyo am: Njooɗode on narruɓe, nder yiide woore e ɓernde woore e anniya ngoota.

³Taa ngaɗe koo ɗume bee numooji kaajuɗi malla ngam mantoraago ko'e mon. Ammaa nder yaŋkinaare, ndaare woɗɓe bana ɓurɓe on.

⁴Taa goɗɗo hakkilana ko nafata hoore mum, ammaa ko nafata woɗɓe.

⁵Numo mooɗon laato bana ngo Yeesu Almasiihu:

⁶Kaŋko o Allah, bee non fuu o jooɗoraaki darnde maako,

⁷o acci ko o marno fuu, o wartiri hoore maako maccuɗo, o laati gooto caka yimɓe, yimɓe annditi mo o neɗɗo.

⁸O leestini hoore maako, o ɗowtani Allah haa yotti maayde, maayde dow leggal gaafaaŋgal.

⁹Ngam man Allah ɓaŋgti mo dow koo ɗume, hokki mo innde ɓurnde inɗe fuu.

¹⁰Nden kam bee innde Yeesu koo moy nder asama e dow lesdi e les lesdi koofo yeeso maako

¹¹e koo moy seeda: “Yeesu Almasiihu woni Jawmiraawo” ngam tedduŋgal Allah Baabiraawo.

¹²Yiɗaaɓe am, saa'i mi ɗonno wondi bee mooɗon, on ɗowtani yam foroy. Koo jonta nde mi walaaɗon boo, ɗowtaneeɗam, mbaŋgine kisndam mon nder kulol e diwŋgol,

¹³ngam Allah bee hoore mum ɗon huuwa nder muuyo mon e nder kuuɗe mon fodde anniya mum mbooɗka.

¹⁴Nder kuuɗe mon fuu taa ngurŋgurte, taa njokkire,

¹⁵ngam haa on laato laaɓɓe ɓe ngalaa aybe[2], on ɓiɓɓe Allah timmuɓe caka yimɓe faasiki'en, wonniiɓe ɓe'e. Njayne caka maɓɓe bana jayli haa duniyaaru.

¹⁶Anndine ɓe wolde ngeendam[3], haa mi heɓa mantoraago on nyannde nde Almasiihu loroyto, ngam taa kuugal am e torra am laato meere.

¹⁷Koo to ƴiiƴam am laatoto bana dokkal dufeteeŋgal dow kirsaaɗum e dewal mon nder nuɗɗinki mon, mi seyorto ɗum e mi seyodotto bee mooɗon fuu.

¹⁸Bana non ceyore ɗum onon boo, ceyode bee am.

¹⁹To Jawmiraawo Yeesu muuyi, mi tammi nelugo Timote law haa mooɗon, ngam haa o de'itinammi bee kubar mooɗon.

²⁰Mi walaa goɗɗo bana maako mo hakkiilo mum yahdi bee ngo am, mo ɗon suklani on bee gooŋga.

²¹Luttuɓe fuu ɗon cuklani ko nafata ko'e muuɗum'en, naa ko nafata Yeesu Almasiihu.

²²Onon on anndi no hoolaare maako waŋgiri. Bana ɓiɗɗo kommbi baaba mum, non o huuwdi bee am ngam Linjiila.

²³Ngam man, mi tammi nelugo mo haa mooɗon law, to mi faami bee laaɓɗum ko laatanto yam.

²⁴Mi ɗon hooli Jawmiraawo boo, mi ɓadake wargo haa mooɗon min bee hoore am.

²⁵Mi laari ɗum kaanduɗum mi lornana on deerɗiraawo am Epafrodit, kuuwdiɗɗiraawo am, balluɗo yam nder haɓre, nelaaɗo mo on nelno haa am ngam humtugo haaje am.

²⁶Ammaa o ɗon yenwa on masin, o ɓillake jamum ngam on nani o nyawɗono.

²⁷Fakat o nyawino haa o ɓadake maayugo. Ammaa Allah enɗi mo, naa kaŋko tan, ammaa min boo, ngam taa suno ɗuuɗanammi.

²⁸Ngam man mi yaawɗi lornugo mo haa mooɗon, haa on ceyo yi'ugo mo fahin, min boo saklere am usto.

²⁹Njaɓɓe mo bee seyo maŋngo nder Jawmiraawo kadi. Teddine irin yimɓe ɓe'e,

³⁰ngam o ɓadino maayugo ngam kuugal Almasiihu. O hasdi koo maayugo, ngam haa o hebbitina ko ŋakki haa ballal mooɗon ngam am.