Read Fulfulded Filippi'en 3 Bible Online

Filippi'en 3 - Fulfulded bible

Filippi'en 3

¹Deerɗam'en, ko lutti wi'eego: Ceye daliila Jawmiraawo. Winndango on haala ka'a fahin saklataa yam, ammaa ɗum tabitinan on.

²Ndeente e dawaaɗi'en! Ndeente e waɗooɓe halleende! Ndeente e samɗinanɓe juulnol.

³Enen en mari juulnol[4] gooŋɗuŋgol, naa kamɓe, enen rewanɓe Allah bee ballal Ruuhu muuɗum. En ɗon mantoro Yeesu Almasiihu naa ɓalli meeɗen.

⁴Min boo mi ɗon bee jarfu mantoraago ɓanndu am. Woɗɓe ma tammake ngoodi daliila mantoraago ko'e muuɗum'en, sakko min na?

⁵Nyannde joweetataɓre am njuulnaami. Mi goɗɗo asŋgol Isra'iila, lenyol Benyamin, mi Ibraniŋkeejo asliijo, wakeere tawreeta boo, mi Farisaajo.

⁶Wakeere tiinaare, mi toonyoowono jama'aare nuɗɗinɓe. Fodde adilaaku tawreeta boo, mi laaɓɗo.

⁷Kuuje ɗe'e fuu, ɓooyma mi laarino ɗe bana riba. Ammaa jonta mi ɗon laara ɗe bana asar, ngam daliila Almasiihu.

⁸Naa kuuje ɗe'e tan, ammaa mi ɗon laara koo ɗume fuu bana asar, ngam mi heɓi ko ɓuri ɗum fuu: Ɗum anndugo Yeesu Almasiihu, Jawmiraawo am. Ngam daliila maako ngudinmi koo ɗume fuu. Mi ɗon laara ɗum bana mbuuwri meere, ngam haa mi heɓa Almasiihu,

⁹mi hawta bee maako mi mara adilaaku ngu iwaay haa ɗowtaare am heedi tawreeta, ammaa haa Allah mo tabitini ɗum dow nuɗɗinki nder Almasiihu.

¹⁰Ngam ko ngiɗmi, ɗum anndugo Almasiihu e baawɗe Allah mo ummitini mo diga maayde e kawtal bee maako nder torraaji maako, mi laato nannduɗo bee maako nder maayde maako,

¹¹ngam haa min boo mi yotto ummitineeki maayɓe, to heɓoto.

¹²Naa mi heɓi ɗum fuu malla mi laatake timmuɗo. Ammaa mi ɗon dogga ngam haa mi naŋnga ɗum, ngam Yeesu Almasiihu boo naŋngi yam.

¹³Fakat, deerɗam'en, mi laaraay hoore am bana mi naŋngi ɗum. Ndaa ko mbaɗanmi: Mi hoo'i anniya yejjititgo ko accumi ɓaawo, mi ɗon tiito ko woni yeeso,

¹⁴mi ɗon haɓda yottaago keerol daɗa-daɗa, haa mi heɓa keɓal ewnaandu ndu Allah ewnori yam nder Yeesu Almasiihu.

¹⁵Sey en numa bana non to en limi ko'e men nder timmuɓe. Koo to woodi ko paamroton bee laawol feere, Allah laɓɓinanan on ɗum.

¹⁶Bee non fuu, nde nii en njottake darnde nde'e, njahden fodde darnde man hawtaade.

¹⁷Mbaɗe ko mi waɗata, onon deerɗam'en, cute tokkiiɓe misaaluwol ngol keɓɗon haa amin.

¹⁸Ko mbi'mi on nde ɗuuɗɗum, jonta mbi'anmi ɗum bee gonɗi: Ɗuuɗɓe laatake konne'en gaafaaŋgal Almasiihu, yahdu maɓɓe ɗon hona ngal.

¹⁹Ragare maɓɓe ɗum halkere. Deeɗi maɓɓe laati ɗowanteeɗo maɓɓe. Ɓe ɗon mantoro kuuɗe maɓɓe cemtiniiɗe. Ɓe ɗon cuklano kuuje duniyaaru tan.

²⁰Ammaa enen kam, haa asama wuro men woni. Diga ton boo Kisnoowo en, Jawmiraawo Yeesu Almasiihu mo min ndeenata iwoyta.

²¹Kaŋko o waylan ɓalli men tampuɗi leesɗi, haa ɗi laato bana ɓanndu maako marndu tedduŋgal, fodde baawɗe maako, waato baawɗe doolugo kuuje fuu ɗowtano mo.