Read Fulfulded Kolossi'en 3 Bible Online

Kolossi'en 3 - Fulfulded bible

Kolossi'en 3

¹Ngam maajum, nde nii on ummitake bee Almasiihu, ngele kuuje gonɗe haa asama, haa Almasiihu jooɗi haa nyaamo Allah.

²Tokke numtugo kuuje gonɗe ton, naa kuuje duniyaaru.

³Ngam on maayi, ngeendam mooɗon ɗon suuɗi bee Almasiihu haa Allah.

⁴Almasiihu woni ngeendam mooɗon. To o waŋgi, onon boo on mbaŋgan bee maako nder tedduŋgal.

⁵Sey on mbara kuuje duniyaaru gonɗe nder terɗe mooɗon, bana daakaareeku e coɓki e yiide kuuje cemtiniiɗe e kalluɗe e suuno, suuno ɗum rewugo lawru.

⁶Ngam daliila suunooji ɗi'i, ɓernuki Allah ɗon wara dow tuurtanɓe dow maako.

⁷Naane onon boo on tokkino irin suunooji ɗi'i, on ɗonno ngeeɗa nder maaji.

⁸Ammaa jonta, onon boo ngudine kuuje ɗe'e fuu: Ɓernuki e tikkere e nganyaandi e tufle e bolle laakiije, taa ɗum wurto kunnduɗe mooɗon.

⁹Taa pewpewtire, ngam on ɓorti neɗɗo mon ɓooymaajo bee kuuɗe mum,

¹⁰on ɓorni neɗɗo keso mo ɗon hesɗito fodde jaati tagoowo mo, haa o yotto anndal timmuŋgal.

¹¹Ngam man, walaa Yahuudu'en malla yimɓe ummaatooje goɗɗe, juulniiɓe malla ɓe njuulnaaki, bilki'en e tullidiɗɓe e maccuɓe e rimɓe, sey Almasiihu feere muuɗum, o ɗon nder maɓɓe fuu.

¹²Onon laatiiɓe suɓaaɓe Allah, senaaɓe e yiɗaaɓe, mare enɗam, mbaɗe mbooɗeeŋga, laate yaŋkiniiɓe, ɗelma-gikku'en e munyɓe.

¹³Munyindire, to goɗɗo mon woodi daliila wullaago deerɗum, sey ɓe njaafotira. Njaafotire bana no Jawmiraawo yaafori on.

¹⁴Dow ɗum fuu, ɓesde yiide, ngam kayre tabitinta kawtal timmuŋgal.

¹⁵Almasiihu ewni on nder salaaman haa on laato ɓanndu wooru. Salaama ka laamo nder ɓerɗe mooɗon. Ngette mo tum.

¹⁶Acce wolde Almasiihu jooɗo nder ɓerɗe mooɗon bee risku maare fuu. Ngaajindire bee hikma fuu, ndeentindire. Ngimane Allah bee yettoore nder ɓerɗe mon. Ngimane mo maŋgtooje e gime ɗe Ruuhu maako hokkata.

¹⁷Ko mbaɗoton fuu e ko mbolwoton fuu laato bee innde Jawmiraawo Yeesu. Ngam daliila maako, ngeendam mooɗon fuu laato yettoore haa Allah Baabiraawo.

¹⁸Onon rewɓe, leestane worɓe mon, bana no ɗum haandani nuɗɗinɓe Jawmiraawo.

¹⁹Onon worɓe, ngiɗe rewɓe mon, taa caatane ɓe.

²⁰Onon ɓikkoy, ɗowtane saaro'en mon nder koo ɗume fuu, ngam ɗum pottuɗum yeeso Jawmiraawo.

²¹Onon baabiraaɓe, taa tikkine ɓikkoy mon, ngam taa ɓerɗe maɓɓe caklo.

²²Onon jeyaaɓe, ɗowtane jaagorɓe mon haa duniyaaru nder koo ɗume fuu. Taa kuuwane ɓe dow gite maɓɓe tan, ngam yerdingo ɓe, ammaa ɗowtane ɓe bee ɓernde laaɓnde ngam on hulɓe Jawmiraawo.

²³Ko kuuwoton fuu kuuwe ɗum bee ngiɗa mon, bana Jawmiraawo kuuwanton, naa yimɓe.

²⁴On anndi fakat on keɓan ndonŋgu ngu Jawmiraawo warjorto on. Ngam ɗum Almasiihu, Jawmiraawo kuuwanton.

²⁵Baɗɗo halleende heɓan ngeenaari halleende muuɗum boo, ngam Allah kam senndindirtaa yimɓe.