Read Fulfulded Kolossi'en 4 Bible Online

Kolossi'en 4 - Fulfulded bible

Kolossi'en 4

¹Onon jaagorɓe, njogore maccuɓe mon bee adilaaku e gooŋgaaku ngam on anndi onon boo on ngoodi Jawmiraawo haa asama.

²Tiine waɗugo do'a, taa come, ngette Allah tum.

³Toraneeɗam min boo, ngam haa Allah maɓɓitanammi laawol waazugo wolde muuɗum, haa mi waŋgina sirri Almasiihu. Ngam daliila sirri man mi ɗon haa fursina[2].

⁴Tore Allah o wallammi waazugo bee laaɓɗum, bana no ɗum haandani yam.

⁵Ngeeɗe nder hikma caka yimɓe ɓe nuɗɗinaay. Naftore wakkati.

⁶Sey bolle mon laato belɗe, nafooje tum ngam haa on annda no on njaaborto koo moy bana ko haani.

⁷Tikikus yeccan on kubar am fuu. O kuuwdiɗɗiraawo am nder Jawmiraawo, o deerɗiraawo giɗaaɗo, kuuwoowo koolaaɗo.

⁸Mi ɗon nela mo haa mooɗon bee anniya ngam haa o anndina on joonde amin, o de'itina ɓerɗe mon.

⁹O yahdan bee Onesimus, deerɗiraawo men giɗaaɗo, koolaaɗo, mo mooɗon. Ɓe ngeccan on ko waɗi haa ɗo fuu.

¹⁰Aristarkus, gonduɗo bee am nder fursina hoofni on. Non boo Markus, denɗiraawo Barnabas mo keɓnooɗon umrooje dow garki mum, to o yottake haa mooɗon, njaɓɓe mo booɗɗum.

¹¹Yeesu coometeeɗo Yustus hoofni on. Nder Yahuudu'en, sey kamɓe tan kuuwdata kuugal laamu Allah bee am, ɓe cuusɗini yam.

¹²Epafras hoofni on. Kaŋko boo mo mooɗon, o jaggiiɗo Yeesu Almasiihu. O ɗon torano on tum bee tiinaare, haa on ndaro booɗɗum, on laato timmuɓe, muuyo Allah boo laamano on fakat.

¹³Min bee hoore am mi ɗon seedo o ɗon torro ngam mon e ngam yimɓe Lawdikiya e yimɓe Hiyerapolis boo.

¹⁴Luka, doktaajo giɗaaɗo men e Demas koofni on.

¹⁵Koofne deerɗiraaɓe wonɓe haa Lawdikiya. Koofne Nimfa e jama'aare nuɗɗinɓe mooɓtotooɓe haa saare maako.

¹⁶To on timmini jaŋngugo bataakewol ngo'ol, sey on ndokka ngol nuɗɗinɓe Lawdikiya, kamɓe boo ɓe njaŋnga ngol. Njaŋnge boo bataakewol ngol jama'aare nuɗɗinɓe haa Lawdikiya neldata on.

¹⁷Ngecce Arkippus o tiino huuwugo kuugal Jawmiraawo ngal o halfina haa o hiɓɓina ngal booɗɗum.

¹⁸Koofŋgol ngo'ol min Pol winndi ngol bee juŋngo am. Taa ngejjite mi kaɓɓaaɗo bee callallu! Mo'ere Allah wonda bee mooɗon.