Read Fulfulded 1 Tessaloniiki'en 1 Bible Online

1 Tessaloniiki'en 1 - Fulfulded bible

1 Tessaloniiki'en 1

¹Min Pol, hawtaade bee Silas e Timote, min ɗon mbinndana on, onon jama'aare nuɗɗinɓe haa Tessaloniiki, ɓe Allah Baabiraawo e Jawmiraawo meeɗen Yeesu Almasiihu: Mo'ere e salaaman laatano on!

²Min ɗon ngetta Allah foroy ngam mooɗon, min ɗon ciftora on boo tum nder tornde amin.

³Min ɗon ciftora no on kuuwrata bee nuɗɗinki, no on tiinori nder yiide e no tammunde mooɗon nder Jawmiraawo meeɗen Yeesu Almasiihu tabitiri.

⁴Onon deerɗiraaɓe, min anndi Allah yiɗi on, o suɓi on.

⁵Saa'i min ngaazini on Linjiila, ɗum laataaki bee bolle tan, ammaa bee baawɗe Allah e ballal Ruuhu Ceniiɗo. Kadiboo min kolli on fakat ka koolniika. On anndi no min kuuwri caka mooɗon ngam hayru mooɗon boo.

⁶Onon boo, on tokki misaalu amin e misaalu Jawmiraawo. Koo nde on ɓilliiɓe masin, on njaɓi kubar maako bee seyo ngo Ruuhu Allah hokki on.

⁷Bana nii on laatori misaalu haa nuɗɗinɓe nder lesɗe Makedoniya e Akaya fuu.

⁸Naa ngam wolde Jawmiraawo saŋkiti diga mooɗon, yehi haa wonɓe nder Makedoniya e Akaya tan, ammaa koo toy fuu yimɓe nani no on nuɗɗiniri Allah. Walaa haaje min mbolwa haala man.

⁹Ngam kamɓe tokki yeccugo no on njaɓɓiri min e no on acciri labbi haa on ɗowtano Allah geeto, gooŋgaajo,

¹⁰haa ndeenon loraaki Ɓiɗɗo maako diga asama, Yeesu mo o ummitini diga maayde, kisnanɗo en tikkere Allah warannde.