Read Fulfulded Yosuwa 13 Bible Online

Yosuwa 13 - Fulfulded bible

Yosuwa 13

¹Nde Yosuwa naywi masin, Jawmiraawo wi'i mo: “A ndottidi, duuɓi ma ɗuuɗi, ammaa lutti lesdi ɗuuɗndi ndi on nyaamaay tawon:

²Lesdi Filisti'en e lesdi Gesuri'en fuu,

³non boo lesdi Awwi'en gal fombina, diga maayo Sihor tiitotirŋgo bee Misra haa yotti keerol Ekuruun wakeere woyla, waato ko limete nder maral Kanaani'en. Laamiiɓe Filisti'en njowo ɗonno njooɗi haa Gaaza e Asdod e Askalon e Gaat e Ekuruun.

⁴Lutti lesdi Kanaani'en fuu diga Ara nder maral Sidoni'en haa yotti Afek haa keerol Amoori'en.

⁵Non boo lesdi Gibili'en, waato Libanon wakeere fuunaaŋge fuu, diga Ba'al-Gada les Hermoon haa yotti nastirde Hamat.

⁶Kanjum woni lesdi Sidoni'en jooɗiiɓe nder kooseeje hakkunde Libanon e Misrefot-Mayim. Min bee hoore am mi riiwan ummaatooje ɗe'e fuu yeeso Isra'iila'en. Ammaa an, sey a senndana ndi Isra'iila'en bee waɗugo kur'u, bana mi umri ma.

⁷Senndu ndi jonta, ngam haa le'i joweenayi e reeta lenyol Manassa keɓa maral maaji.”

⁸Reeta lenyol Manassa feere e le'i Ruben e Gada keɓno maral muuɗum'en ngal Muusa, jaggiiɗo Jawmiraawo hokkuno ɓe gaɗa Urdun gal fuunaaŋge,

⁹diga Aro'er haa fomoonde maayo Arnon e berniwol haa caka waadiwol man e ƴoolde Medeba haa yotti Dibon

¹⁰e gure fuu ɗe Sihon, laamiiɗo Amoori'en haa Hesbon marino, haa yotti keerol Ammooni'en.

¹¹Non boo Gile'at e lesdi Gesuri'en e Makati'en e hooseere Hermoon e Baasan fuu haa yotti Salka.

¹²Non boo maral Ook, laamiiɗo Baasan haa Astarot e Edirey, ragareejo nder Refa'en. Muusa jaalino yimɓe ɓe'e, o riiwno ɓe.

¹³Ammaa Isra'iila'en ndiiwaay Gesuri'en e Makati'en, ɓe ɗon njooɗi caka Isra'iila'en haa wargo hannde.

¹⁴Lenyol Lewi, Muusa hokkaayno ngol lesdi. Jawmiraawo wi'no mo Lewi'en keɓan geɗal haa dabbaaji guleteeɗi ngam Jawmiraawo, Allah Isra'iila. Kanjum laatoto maral maɓɓe.

¹⁵Muusa hokki lenyol Ruben geɗal lesdi fodde geɓe maagol.

¹⁶Ndaa ko woni geɗal maɓɓe haa lesdi: Diga Aro'er haa fomoonde maayo Arnon e berniwol haa caka waadiwol man e ƴoolde Medeba fuu,

¹⁷Hesbon e gure maagol gonɗe dow ƴoolde, waato Dibon e Bamot-Ba'al e Bayti-Ba'al-Me'on

¹⁸e Yahas e Kedemot e Meefa'at

¹⁹e Kiriyatayim e Sibama e Jeret-Sakar dow hooseere nder waadiwol

²⁰e Bayti-Pe'or e diirtorɗe hooseere Pisiga e Bayti-Yesimot

²¹e gure ƴoolde fuu e maral Sihon, laamiiɗo Amoori'en haa Hesbon fuu. Muusa jaalino mo, kaŋko e laamiiɓe Mediyan, waato Ewi e Rekem e Cuuru e Huuru e Reeba, lawan'en Sihon, jooɗiiɓe haa lesdi maajum.

²²Ammaa Balaama ɓii Be'or, baɗoowo hatti, Isra'iila'en mbari mo bee kaafaaje, kaŋko e mbaraaɓe woɗɓe.

²³Urdun laatake keerol yimɓe Ruben hiirnaaŋgewol. Kanjum woni geɗal yimɓe Ruben fodde ci'e maɓɓe, ɗum berniiji maɓɓe e gure maɓɓe.

²⁴Muusa hokki lenyol Gada geɗal lesdi fodde geɓe maagol.

²⁵Ndaa ko woni geɗal maɓɓe haa lesdi: Ya'ajer e berniiji Gile'at fuu e reeta lesdi Ammooni'en haa yotti Aro'er tiitotirŋgol bee Rabba.

²⁶Ɓe keɓi lesdi diga Hesbon haa Ramat-Mispe e Betonim, diga Mahanayim haa yotti keerol Debir.

²⁷Nder waadiwol boo Bayti-Haaram e Bayti-Nimra e Sukkot e Safuun, ko lutti haa maral Sihon, laamiiɗo Hesbon. Maayo Urdun laati keerol lesdi maɓɓe hiirnaaŋgewol, yahugo woyla haa yotti weendu Kinneret.

²⁸Kanjum woni geɗal yimɓe Gada fodde ci'e maɓɓe, ɗum berniiji maɓɓe e gure maɓɓe.

²⁹Muusa hokki boo reeta lenyol Manassa geɗal lesdi fodde geɓe maagol.

³⁰O marni ɓe lesdi yahugo Mahanayim e lesdi Baasan fuu, waato maral Ook, laamiiɗo Baasan e gure Ya'ir gonɗe nder lesdi man, gure cappanɗe joweego fuu.

³¹Ɓe keɓi reeta Gile'at, non boo Astarot e Edirey, berniiji laamorɗi nder maral Ook mo Baasan. Kanjum woni geɗal reeta danygol Makir ɓii Manassa fodde geɓe maagol.

³²Bana nii Muusa ronniri ɓe lesdi gaɗa Urdun haa fuunaaŋge Yeriko, saa'i o ɗonno nder yayre Mo'ab.

³³Ammaa lenyol Lewi, Muusa hokkaay ɗum geɗal lesdi. Jawmiraawo, Allah Isra'iila wi'i ɓe kaŋko woni maral maɓɓe.