Read Fulfulded Yosuwa 6 Bible Online

Yosuwa 6 - Fulfulded bible

Yosuwa 6

¹Yimɓe Yeriko maɓɓi dammuɗe berniwol, ɓe pali ɗe ngam daliila Isra'iila'en. Walaa mo wurtoto berniwol, walaa mo nastata ngol boo.

²Jawmiraawo wi'i Yosuwa: “Ndaa, mi hokki ma Yeriko e laamiiɗo maagol e honooɓe maagol semmbiɗɓe fuu.

³Nyalaade fuu honooɓe ma taaro berniwol nde woore. Tokka waɗugo bana nii nyalɗe joweego.

⁴Liman'en njoweeɗiɗo njogo luwe konu joweeɗiɗi yeeso sundukru. Nyannde joweeɗiɗawre on taaro berniwol nde joweeɗiɗi, liman'en boo puufa luwe jawɗi baali.

⁵To ɓe puufi luwe, onon boo on nani hoolo maaje, sey ummaatoore fuu wooka. Bana non mahol berniwol yibban. Ummaatoore fuu wa'o, koo moy tiita yeeso muuɗum, nasta berniwol.”

⁶Yosuwa ɓii Nuuna ewni liman'en, wi'i ɓe: “Ndoonde sundukru alkawal. Njoweeɗiɗo nder mooɗon boo njogo luwe konu joweeɗiɗi ardo yeeso sundukru Jawmiraawo.”

⁷Nden o umri ummaatoore: “Njehe, taare berniwol. Yeɓre honooɓe ardo sundukru Jawmiraawo.”

⁸Fodde umroore Yosuwa, honooɓe woɗɓe ardi, ɓaawo maɓɓe liman'en njoweeɗiɗo fuufooɓe luwe yeeso Jawmiraawo caali, ɗon puufa luwe, nden liman'en roondooɓe sundukru alkawal Jawmiraawo tokki, haa timmoode boo yeɓre honooɓe luttuɓe. Tum ɓe ɗon puufa luwe.

¹⁰Ammaa Yosuwa umruno ummaatoore: “Taa ngooke, taa goɗɗo nana sawtu mon, taa mbolwe sam, haa to mi wi'i on: Ngooke! Nden on ngookan.”

¹¹Bana nii ɓe njahri sundukru Jawmiraawo, ɓe taari berniwol nde woore. Ɓe ngarti nder saŋngeere, ɓe mbaali.

¹²Jaŋngo man, Yosuwa dawi cub, liman'en boo ndoondi sundukru Jawmiraawo.

¹³Honooɓe woɗɓe ardi, ɓaawo maɓɓe liman'en njoweeɗiɗo fuufooɓe luwe ummi, ɗon puufa luwe, nden liman'en roondooɓe sundukru Jawmiraawo tokki, haa timmoode boo yeɓre honooɓe luttuɓe. Tum ɓe ɗon puufa luwe.

¹⁴Nyannde ɗiɗawre nde'e ɓe taari berniwol nde woore, nden ɓe ngarti nder saŋngeere. Ɓe mbaɗi bana nii nyalɗe joweego.

¹⁵Nyannde joweeɗiɗawre, ɓe ummi diga subaha, ɓe njehi, ɓe taari berniwol bana naane, ammaa nde joweeɗiɗi. Nyannde maajum tan ɓe taari ngol nde joweeɗiɗi.

¹⁶Nder taarannde joweeɗiɗawre, wakkati liman'en puufi luwe, Yosuwa umri ummaatoore: “Ngooke! Jawmiraawo hokki on berniwol.

¹⁷Berniwol ngol e ko woni nder maagol fuu, Jawmiraawo jeyi. Nattine ɗum kadi. Walaa mo luttata bee yoŋki, sey Rahab, debbo daakaareejo go tan, kaŋko e yimɓe wonduɓe bee maako nder suudu, ngam o nyukkini horooɓe, nelaaɓe men.

¹⁸Ammaa kakkile! Ndeente ko'e mon, taa koo'e koo ɗume nder kuuje kaɗaaɗe ngam ɗum harmi, ammaa nattine ɗe ngam taa on pooɗana Isra'iila sarru e nattere.

¹⁹Cardi e kaŋŋeeri e kuuje njamndi ɓaleeri e mboɗeeri fuu ɗum cenaaɗum ngam Jawmiraawo, ɗum nasta ndesaari maako.”

²⁰Kadiboo liman'en puufi luwe. Nde ummaatoore Isra'iila nani ɗum, nde wooki bee sawtu mawɗo, mahol yibbi. Law, Isra'iila'en mba'i, nasti berniwol, koo moy tiiti yeeso muuɗum, ɓe nyaami berniwol.

²¹Bee kaafaaje maɓɓe ɓe nattini ko woni nder maagol fuu: worɓe e rewɓe, derke'en e ndotti'en, na'i e dammooji e bamɗe fuu.

²²Yosuwa wi'i horooɓe lesdi ɗiɗo go: “Naste suudu debbo daakaareejo go, ngurtine mo, kaŋko e banndiraaɓe maako, fodde hunayeere nde on kunani mo.”

²³Sukaaɓe ɗiɗo go njehi, ɓe ngurtini Rahab e baaba mum e daada mum e deerɗiraaɓe mum e banndiraaɓe mum woɗɓe fuu, ɓe njo'ini ɓe jam yaasi saŋngeere Isra'iila.

²⁴Nden ɓe nguli berniwol e ko woni nder maagol fuu. Ammaa ɓe ndesi cardi e kaŋŋeeri e kuuje njamndi ɓaleeri e mboɗeeri nder ndesaari suudu Jawmiraawo.

²⁵Bana nii Yosuwa acciri Rahab, debbo daakaareejo bee yoŋki, non boo saare baaba maako e banndiraaɓe maako, ngam o nyukkini horooɓe, nelaaɓe Yosuwa ngam wiɗitaago Yeriko. Rahab jooɗi nder Isra'iila haa wargo hannde.

²⁶Saa'i man Yosuwa waɗi hunayeere nde'e, wi'i yimɓe: “Koo moy foondi nyiɓtaago berniwol Yeriko ngo'ol, o naalaaɗo haa Jawmiraawo. Ballinɗo caɓɓaaje maagol, ɓiɗɗo muuɗum afo maayan. Darnuɗo dammuɗe maagol, ɓiɗɗo muuɗum gaajiijo maayan.”

²⁷Jawmiraawo wondi bee Yosuwa, habaru maako saŋkiti nder lesdi fuu.