Read Fulfulded Yosuwa 7 Bible Online

Yosuwa 7 - Fulfulded bible

Yosuwa 7

¹Ammaa Isra'iila'en ngewi umroore Allah dow kuuje kaɗaaɗe. Akan ɓii Karmi ɓii Zabdi ɓii Zeraha, goɗɗo lenyol Yahuuda hoo'i haa kuuje man. Ngam maajum tikkere Jawmiraawo saati dow Isra'iila'en.

²Saa'i ɓe ɗon haa Yeriko, Yosuwa neli worɓe woɗɓe haa Ayu. Berniwol man daayaaki bee Baytawiina haa fuunaaŋge Baytila. O wi'i ɓe: “Kore lesdi man.” Ɓe njehi, ɓe kori Ayu.

³Nden ɓe ngarti haa Yosuwa, ɓe mbi'i mo: “Walaa haaje ummaatoore fuu yaha, sey worɓe baakin ujine ɗiɗo malla tato njaha, kona Ayu. Taa suklu ummaatoore fuu, ngam yimɓe Ayu ɗuuɗaay.”

⁴Worɓe ujine tato njehi haɓugo bee Ayu, ammaa yimɓe Ayu njaali ɓe, ɓe ndoggi.

⁵Yimɓe Ayu mbari worɓe cappanɗe tato e njoweego nder Isra'iila'en. Ɓe taasni ɓe diga dammugal Ayu haa ɓe njotti Sebariima, ɓe njaali ɓe haa diirtorde hooseere. Ɓerɗe Isra'iila'en ta'i ngam kulol, ɗe laati bana ndiyam.

⁶Yosuwa e ndotti'en Isra'iila ceeki limce muuɗum'en, cujidi yeeso sundukru Jawmiraawo, haa kiikiiɗe waɗi. Ɓe ndufi mbulwuldi dow ko'e maɓɓe ngam mettamɓeram.

⁷Yosuwa wi'i: “Kayto! Allah Jawmiraawo, ngam ɗume a eerni ummaatoore nde'e maayo Urdun? Ngam a hokka min haa Amoori'en, ɓe kalka min na? Kayto, ndikka to min njooɗino gaɗa Urdun!

⁸Jawmiraawo, ɗume mbi'anmi jonta? Ngam Isra'iila'en ndoggi yeeso konne'en muuɗum'en.

⁹To Kanaani'en e yimɓe woɗɓe nder lesdi nani ɗum, ɓe taaroto min, ɓe kalkan min fuu. An boo, ɗume mbaɗata ngam aynugo innde ma mawnde?”

¹⁰Jawmiraawo wi'i Yosuwa: “Umma! Koni kippotoɗa haa lesdi bana nii?

¹¹Isra'iila waɗi hakke. Ɓe piisti alkawal ngal kaɓɓumi bee maɓɓe dow umroore am. Ɓe koo'i nder kuuje kaɗaaɗe, ɓe ngujji ɗum, ɓe pewi dow maajum, ɓe cigi ɗum nder kuuje maɓɓe.

¹²Ngam maajum Isra'iila'en ndartantaako konne'en muuɗum'en. Ɓe ndoggan yeeso konne'en maɓɓe, ngam naaloore halkere ɗon dow maɓɓe. Mi wondataa bee mooɗon, to on ittaay hakke haram maajum caka mooɗon.

¹³Umma, sen ummaatoore, wi' ɓe: Cene ko'e mon ngam jaŋngo. Ndaa nii Jawmiraawo, Allah Isra'iila wi'i: Hakke haram ɗon caka mooɗon, onon Isra'iila'en. On ndartantaako konne'en mooɗon, sonaa to on itti hakke maajum.

¹⁴Jaŋngo fajiri on ɓadito fodde le'i mon. Lenyol ngol Jawmiraawo naŋngata ɗum, ɓadito fodde geɓe maagol. Yeɓre nde Jawmiraawo naŋngata ɗum, ɓadito fodde ci'e[7] maare. Saare nde Jawmiraawo naŋngata ɗum, ɓadito fodde worɓe maare.

¹⁵Naŋngeteeɗo ngam hakke haram, ngule mo bee yiite, kaŋko e ko o mari fuu, ngam o fiisti alkawal Jawmiraawo, o waɗi nyidduɗum nder Isra'iila.”

¹⁶Yosuwa dawi cub. O ɓadini Isra'iila'en fodde le'i muuɗum'en, lenyol Yahuuda naŋngaama.

¹⁷O ɓadini geɓe nder lenyol Yahuuda, yeɓre Zara naŋngaama. O ɓadini yeɓre Zara fodde ci'e maare, saare Zabdi naŋngaama.

¹⁸O ɓadini worɓe saare Zabdi, Akan ɓii Karmi ɓii Zabdi ɓii Zeraha nder lenyol Yahuuda naŋngaama.

¹⁹Yosuwa wi'i Akan: “Ɓiŋngel am, hul Jawmiraawo, Allah Isra'iila, wolwu gooŋga, yeccam ko mbaɗɗa, taa suuɗam koo ɗume.”

²⁰Akan jaabi: “Gooŋga, mi waɗi hakke dow Jawmiraawo, Allah Isra'iila. Ndaa ko mbaɗmi:

²¹Nder keɓal konu ngi'mi alkibbaare woonde iwnde haa Sine'ar e ceede cardi teemeɗɗe ɗiɗi e tayre kaŋŋeeri nde teddeeŋga mum woni baakin reeta kilo. Suuno waɗi yam, mi hooci ɗum. Mi iri alkibbaare man nder lesdi haa caka laymaaru am, cardi boo haa les maare.”

²²Yosuwa neli woɗɓe, ɓe ndoggani laymaaru man. Ndaa ɓe tawi alkibbaare ɗon iri nder laymaaru e cardi boo les maare.

²³Ɓe koo'i ɗum, ɓe ngaddi ɗum haa Yosuwa e Isra'iila'en fuu, ɓe ndufi ɗum yeeso Jawmiraawo.

²⁴Yosuwa e Isra'iila'en fuu koo'i Akan Jerahaajo e cardi e alkibbaare e tayre kaŋŋeeri e ɓiɓɓe maako e worɓe e rewɓe e na'i maako e bamɗe maako e dammooji maako e laymaaru maako e ko o mari fuu, ɓe njahri ɗum nder waadiwol Akor[8].

²⁵Yosuwa wi'i: “Koni ngadduɗa sarru dow amin? Hannde kam Jawmiraawo ukkan sarru ngu dow maaɗa.” Nden Isra'iila'en fuu piɗi Akan bee kaa'e haa o maayi. Ɓe piɗi boo yimɓe saare maako, ɓe nguli ɓe bee yiite.

²⁶Ɓe mbaagi waagaare kaa'e mawnde dow maɓɓe, nde lutti haa wargo hannde. Ngam maajum ɓe ewni nokkuure man waadiwol Akor, non innde maagol haa jonta. Nden Jawmiraawo acci caatal tikkere muuɗum.