Read Fulfulded 2 Tessaloniiki'en 2 Bible Online

2 Tessaloniiki'en 2 - Fulfulded bible

2 Tessaloniiki'en 2

¹Ko laarani loraaki Jawmiraawo meeɗen Yeesu Almasiihu e mooɓtaago meeɗen haa maako, min ɗon toro on, onon deerɗiraaɓe:

²Taa hakkiilooji mooɗon ummo law, taa kultore boo to goɗɗo wi'i on nyalaade Jawmiraawo wari. Teema goɗɗo waɗanan on annabaaku malla o waazinan on malla o wi'an minin mbinndi ɗum nder bataakewol.

³Taa goɗɗo esta on koo noy. Ngam nyalaade nde'e warataa, sonaa yimɓe ɗuuɗɓe aarta tuurtana Allah tawon, neɗɗo ɓurduɗo hallugo boo waŋga, mo hoddiranaama halkere.

⁴Kaŋko o dartanto koo ɗume ko laati ceniiɗum malla ko yimɓe cujidanta. O ɓurnan hoore maako dow man fuu. O jooɗoto maa nder haykaliiru Allah, o wi'an kaŋko woni Allah.

⁵Saa'i mi ɗonno wondi bee mooɗon, mi wi'i on ɗum. On ciftoraay na?

⁶On anndi ko haɗata neɗɗo ɓurduɗo hallugo oo jonta. Ammaa to saa'iire darnaande waɗi, o waŋgan.

⁷Baawɗe maako sirriije ɗon kuuwa koo jonta boo. Ammaa sonaa to kaɗanɗo mo sotti.

⁸Nden neɗɗo ɓurduɗo hallugo go waŋgan, mo Yeesu, Jawmiraawo meeɗen halkata bee poofɗe hunnduko mum. O halkan mo bee baŋguki mum saa'i o loroyto.

⁹Neɗɗo ɓurduɗo hallugo oo wardan bee baawɗe Sayɗaanu, o huuwan kuuɗe mawɗe e o waɗan alaamaaji e kaayeefiiji estooji.

¹⁰Bee kuuɗe kalluɗe koo ɗeye fuu, o estan majjeteeɓe. Ɓe majjeteeɓe ngam ɓe cali jaɓugo e yiɗugo gooŋga ka waawanno hisnugo ɓe.

¹¹Ngam maajum Allah nelanan ɓe baawɗe estooje haa ɓe nuɗɗina fewre.

¹²Nden koo ɓeye ɓe nuɗɗinaay gooŋga, ammaa ceyori zunuuba, ɓe hiiteteeɓe.

¹³Ammaa, minin, sey min ngetta Allah foroy daliila mooɗon, onon deerɗiraaɓe, yiɗaaɓe Jawmiraawo. Ngam Allah aarti suɓi on ngam hisnugo on.[1] On kisan boo ngam Ruuhu seni on, ngam on nuɗɗini gooŋga boo.

¹⁴Allah ewni on bee Linjiila ka min ngaazi on, haa on keɓa geɗal mooɗon haa tedduŋgal Jawmiraawo meeɗen Yeesu Almasiihu.

¹⁵Ngam maajum, deerɗiraaɓe, tabite, njoge ko min ekkitini on bee bolle amin malla bee bataakewol amin.

¹⁶Jawmiraawo meeɗen Yeesu Almasiihu bee hoore mum e Allah Baabiraawo meeɗen, mo yiɗi en, mo hokki en de'ere duumiinde e tammunde woonde bee mo'ere mum,

¹⁷nde'itina ɓerɗe mooɗon, ndokka on semmbe waɗugo e wolwugo ko wooɗi.