Read Fulfulded 1 Timote 1 Bible Online

1 Timote 1 - Fulfulded bible

1 Timote 1

¹Min Pol nelaaɗo Yeesu Almasiihu fodde umroore Allah, Kisnoowo men e Yeesu Almasiihu, laatiiɗo tammunde meeɗen,

²mi ɗon winndane Timote, ɓiɗɗo am nder nuɗɗinki bee gooŋga: Allah Baabiraawo e Jawmiraawo men Yeesu Almasiihu ndokke mo'ere e hinnuye e salaaman.

³Saa'i mi ɗonno dilla Makedoniya, mi wasi ma a jooɗo haa Efesus, ngam haa a umra yimɓe woɗɓe ɓe acca ekkitingo ekkitinolji pewooji.

⁴Sey ɓe acca suklanaago kiccaaji e defte asli ɗe timmataa sam. Ngam ɗum umminan gaabotiral meere, ɗum hebbitintaa nufayeere Allah bee nuɗɗinki.

⁵Tiitorde umroore nde'e, ɗum yiide iwnde haa ɓernde laaɓnde e numo ɓernde laaɓŋgo e nuɗɗinki ki walaa naafikaare.

⁶Woɗɓe celi laawol darnuŋgol ngo'ol, ɗon tokko haalaaji baaɗɗi.

⁷Ɓe ngiɗi laataago jaŋnginooɓe umrooje Allah, ammaa ɓe paamataa ko ɓe mbi'ata malla ko ɓe tabitinta bee semmbe.

⁸Enen kam en anndi tawreeta wooɗi, to goɗɗo ɗon huuwtinira ka bana no haandi,

⁹en anndi umrooje tawreeta mbaɗaaka ngam adili'en, ammaa ngam yewooɓe ɗe e tuurtooɓe, yedduɓe Allah e hakke'en, yimɓe ɓe teddintaa Allah e camɗintaa ceniiɗum, mbarooɓe baaba e daada e mbarooɓe ko'e fuu,

¹⁰ngam daakaare'en e luuɗu'en[1], ngam soorrooɓe maccuɓe, ngam fewooɓe e hunortooɓe fewre e waɗooɓe ko luuti ekkitinol gooŋgawol.

¹¹Ekkitinol ngo'ol iwi haa Linjiila ka Allah marɗo tedduŋgal ke'iiɗo maŋgteego halfini yam.

¹²Mi yetti Jawmiraawo men Yeesu Almasiihu mo hokki yam semmbe huuwugo kuugal am, ngam o laari yam bana koolaaɗo, o nastini yam nder kuugal maako.

¹³Min, bolwunooɗo kalluka dow maako, toonyiinooɗo yimɓe maako, mi torrino ɓe bee caatal. Ammaa o enɗi yam, ngam mi waɗno ɗum nder sooynde faamu e sooynde nuɗɗinki.

¹⁴Jawmiraawo men mo'ani yam ɗuuɗɗum masin, hokki yam nuɗɗinki e yiide iwnde haa Yeesu Almasiihu.

¹⁵Ndaa wolde hoolniinde, he'iinde jaɓeego bilaa seko: Yeesu Almasiihu wari nder duniyaaru ngam hisnugo hakke'en. Min woni tulluɗo ɓe,

¹⁶ammaa Allah enɗi yam, ngam haa Yeesu Almasiihu waŋgina munyal mum ɗuuɗŋgal bee am, min tulluɗo ɓe go, haa ɗum laato misaalu ngam nuɗɗinanɓe mo, heɓanɓe ngeendam nduumiiɗam.

¹⁷Hormu e tedduŋgal laatano Allah gooto, laamiiɗo duumiiɗo, mo maayataa, mo yi'ataake haa abada abadin. Aamiina!

¹⁸An Timote, ɓiŋngel am, mi halfini ma umroore nde'e. Siftor annabaakuuji gaɗaaɗi dow maaɗa naane, ɗi cemmbiɗine ngam haa a haɓa haɓre woonde,

¹⁹a joga nuɗɗinki ma e numo ɓernde ma laaɓŋgo. Numo ngo'o, woɗɓe ngudini ngo, nuɗɗinki maɓɓe waati.

²⁰Himeneyus e Aleksandire ɗon nder maɓɓe. Mi yoofi ɓe haa Sayɗaanu ngam haa ɓe ekkito ɓe acca wolwugo kalluka.