Read Fulfulded 2 Timote 1 Bible Online

2 Timote 1 - Fulfulded bible

2 Timote 1

¹Min Pol nelaaɗo Yeesu Almasiihu fodde muuyo Allah, ngam daliila iinawol ngeendam ngonɗam nder Yeesu Almasiihu.

²Mi ɗon winndane Timote, ɓiɗɗo am giɗaaɗo: Allah Baabiraawo e Jawmiraawo men Yeesu Almasiihu ndokke mo'ere e hinnuye e salaaman.

³Mi ɗon yetta Allah mo njaggantoomi bee numo ɓernde laaɓŋgo, bana kaakiraaɓe am. Mi accataa siftorgo ma nder do'aaje am jemma e naaŋge fuu.

⁴Mi siftori gonɗi ma, mi yenwi yi'ugo ma, ngam haa ɓernde am heewa seyo.

⁵Mi siftori nuɗɗinki ma ki walaa naafikaare. Aran, nuɗɗinki ki'i ɗonno nder ɓernde Lowis maama ma debbo e nder ɓernde Ewnike daada[1] ma. Mi tabitini ki ɗon nder maaɗa boo.

⁶Ngam daliila man mi ɗon siftinore: Ɓesdu hakkilango dokkal Allah ngal keɓɗa nde mballinmi juuɗe dow maaɗa.

⁷Ngam naa ruuhu kulol Allah hokki en, ammaa Ruuhu semmbe e yiide e naŋgtaare.

⁸Ngam maajum, taa semtu seedanaago Jawmiraawo men, taa semtu boo daliila am, min kaɓɓaaɗo ngam daliila maako. Ammaa munyan bone bana am ngam daliila Linjiila, bee baawɗe ɗe Allah hokki ma.

⁹Kaŋko hisni en, ewni en haa en laato yimɓe maako senaaɓe, naa ngam daliila kuuɗe men booɗɗe, ammaa ngam daliila muuyo maako e mo'ere maako nde o mo'ani en nder Yeesu Almasiihu diga zamanuuji ciwaano sam.

¹⁰Jonta mo'ere man waŋgi bee garki Yeesu Almasiihu, Kisnoowo men. Kaŋko o nattini baawɗe waade, o waŋgini ngeendam e duumaare bee Linjiila.

¹¹Ngam daliila Linjiila ka'a, Allah waɗi yam mi gooynoowo e nelaaɗo e ekkitinoowo.

¹²Ngam daliila man, mi ɗon yara boneeji ɗi'i. Ammaa ɗi cemtintaa yam, ngam mi anndi mo nuɗɗinmi. Mi ɗon hooli mo o baawɗo aynugo ko o halfini yam, haa to nyalaade kiita wari.

¹³Joga bolle gooŋgaaje ɗe nanɗa haa am, ɗe laatano ma misaalu, a tabita nder nuɗɗinki e yiide nder Yeesu Almasiihu.

¹⁴Ekkitinol booɗŋgol ngol kalfinaaɗa, joga ngol bee baawɗe Ruuhu Ceniiɗo gonɗo nder maaɗa.

¹⁵A anndi, wonɓe nder lesdi Asiya fuu acci yam, Figelus e Hermogenes boo ɗon caka maɓɓe.

¹⁶Jawmiraawo hinno saare Onesiforus, ngam o suusɗini yam nde ɗuuɗɗum. O semtiraay yam, koo nde mi kaɓɓaaɗo nder fursina[2].

¹⁷Nde o yotti Roma, o fuɗɗi tefugo yam bee tiinaare ɗuuɗnde, haa o heɓti yam.

¹⁸Jawmiraawo hokka mo hinnuye mum nder nyalaade kiita. Haa Efesus o huuwani yam kuuɗe ɗuuɗɗe, an a anndi ɗum booɗɗum.