Read Fulfulded Ibraniŋke'en 1 Bible Online

Ibraniŋke'en 1 - Fulfulded bible

Ibraniŋke'en 1

¹Ɓooyma, bee kunnduɗe annabi'en, Allah wolwani kaakiraaɓe meeɗen nde ɗuuɗɗum bee laabi feere feere.

²Ammaa nder balɗe ragareeje ɗe'e, o wolwani en bee hunnduko Ɓiɗɗomuuɗum. Bee maako Allah tagri koo ɗume fuu, o waɗi mo donoowo kuuje fuu.

³Ɓiɗɗo oo o annoora tedduŋgal Allah, o waŋgini no Allah wa'i fuu, o ɗon jogi kuuje fuu bee wolde maako marnde baawɗe. Ɓaawo nde o laɓɓini yimɓe diga hakkeeji muuɗum'en, o jooɗi haa asama haa nyaamo Allah, marɗo maŋngu fuu.

⁴Ɓiɗɗo laati o ɓurduɗo malaa'ika'en tedduŋgal, Allah hokki mo innde ɓurnde nde maɓɓe.

⁵Ngam Allah meeɗaay wi'go haa malaa'ikaajo koo gooto: “An woni ɓiɗɗo am, hannde mi danyi ma.” O meeɗaay boo wi'go: “Mi laatoto Baabiraawo maako, kaŋko boo o laatoto ɓiɗɗo am.”

⁶Ammaa nde Allah ɓadake nelugo Ɓiɗɗo muuɗum afo haa duniyaaru, o wi'i: “Malaa'ika'en Allah fuu cujidana mo.”

⁷Ndaa ko Allah wi'i dow malaa'ika'en: “Allah ɗon laatina malaa'ika'en muuɗum keni, jaggiiɓe muuɗum boo ɗemɗe yiite.”

⁸Ammaa dow Ɓiɗɗo o wi'i: “Leeso laamu maaɗa yaa Allah, duumoto haa foroy! A ɗon laamo bee kiita ndarnuka.

⁹A yiɗi adilaaku, a wanyi halleende. Ngam man Allah, mo Allah maaɗa moyti ma bee nebbam, hokki ma seyo ko ɓuri wonduɓe bee maaɗa fuu.”

¹⁰Kadiboo o wi'i: “An yaa Jawmiraawo, a tagi duniyaaru diga fuɗɗam, asamanji, ɗum kuugal juuɗe maaɗa,

¹¹kanji ɗi kalkan, ammaa an a tabitan. Ɗi fuu ɗi kiiɗan bana limce,

¹²a taggan ɗi bana ngapaleewol, ɗi ngaylititto bana limce, ammaa an a waylitittaako, duuɓi ma njinnataa sam.”

¹³Allah meeɗaay wi'go koo moy malaa'ikaajo: “Jooɗa haa nyaamo am, haa to mi laatini konne'en ma jaaɓruɗum kosɗe ma.”

¹⁴Ɓeye ngoni malaa'ika'en? Ɓe ruuhuuji, ɓe ɗon kuuwana Allah. Allah ɗon nela ɓe ngam haa ɓe mballa heɓanɓe kisndam.