Read Fulfulded Ibraniŋke'en 12 Bible Online

Ibraniŋke'en 12 - Fulfulded bible

Ibraniŋke'en 12

¹Enen boo, ummaatoore ɗuuɗnde ɗon taari en bana ruuldere bee seedamku maare. Ngam maajum, sey en ngudina koo ɗume ko teddanta en, sey en ngudina doŋngal hakke ɗakkotooŋgal en bee semmbe. Sey en tiino timmitingo daɗa-daɗa meeɗen.

²Taa en acca sutugo Yeesu ngam nuɗɗinki meeɗen ɗon dari dow maako diga fuɗɗoode haa timmoode. Nde ɓe mbari mo haa leggal gaafaaŋgal, o munyi ɗum. O numaay dow mbustu maayde nde'e, ngam daliila seyo ngo Allah sigani mo. Jonta o ɗon jooɗi dow leeso laamu haa nyaamo Allah.

³Nume dow goɗɗo mo munyani tuurtol hakke'en! Kanjum ɗum wallan on ngam taa on tampa.

⁴Ngam nder haɓre mooɗon bee hakke on kaɓaay haa yotti maayde tawon.

⁵On ngejjiti bolle cemmbiɗinooje ɗe Allah wolwani on, onon ɓiɓɓe maako na? O wi'i: “Ɓiŋngel am, taa yawa elto Jawmiraawo. Taa tampu to o feli ma.

⁶Ngam Jawmiraawo ɗon elta yiɗaaɓe muuɗum, o ɓoccan ɓiŋngel ngel o yerdi fuu.”

⁷Munyane torra ngam daliila elto Allah. Allah ɗon elta on bana baaba eltirta ɓiyum. Woodi ɓiŋngel ngel baaba muuɗum eltataa na?

⁸To Allah eltaay on bana goɗɗo eltirta ɓiɓɓe muuɗum fuu, nden kam naa on ɓiɓɓe maako, ammaa on njaalu'en.

⁹Ciftoren baabiraaɓe meeɗen haa duniyaaru. Ɓe elti en, en teddina ɓe boo. Sakkomaa Baabiraawo meeɗen mo asama, sey en leesna ko'e meeɗen yeeso maako haa en ngeeɗa!

¹⁰Baabiraaɓe meeɗen haa duniyaaru elti en wakkati seɗɗa, bana ɗum fottani ɓe. Ammaa Allah ɗon elta en ngam haa en nafa, ngam haa en kawta bee maako nder senaare maako.

¹¹Yaake o ɗon elta en, en ɗon maata naawɗum, naa seyo. Ammaa ɓaawoɗon jaɓɓe elto man paaman ngo wooɗi, ngo laatini ɓe waɗooɓe salaaman e adilaaku.

¹²Ngam maajum ndartine juuɗe mooɗon comɗe e koppi mooɗon tampuɗi!

¹³Tokke laabi darnuɗi, ngam taa kosŋgal naawanŋgal naawnita, ammaa ngal yamɗita.

¹⁴Tiine jooɗaago nder salaaman bee yimɓe fuu. Ngeeɗe nder senaare, ngam bilaa maare walaa mo yi'ata Jawmiraawo.

¹⁵Kakkile ngam taa koo gooto mooɗon loro ɓaawo, acca mo'ere Allah. Kakkile taa koo moy mooɗon laato bana haako haaɗko, ko ɗon mawna, ko ɗon tampina yimɓe ɗuuɗɓe bee tooke maako.

¹⁶Kakkile ngam taa koo moy mooɗon laato daakaareejo malla lasbinoowo bana Isuwa mo soorri daraja afaaku mum ngam o heɓa o nyaama nde woore tan.

¹⁷On anndi ɓaawoɗon nde o yiɗi heɓugo barka, o heɓaay, o wudinaama. Ngam o waawaay sannjugo ko laati, koo nde o tefi ɗum bee bojji.

¹⁸Onon on ɓaditaaki bana no Isra'iila'en ɓaditino, haa ko on mbaawi meemugo, waato haa hooseere Sina bee yiite huɓɓanŋge malla haa nyiɓre malla haa naargewol

¹⁹malla haa hoolo luwal malla haa hoolo sawtu. Nde yimɓe nani sawtu man, ɓe tori taa ɓe meeta nanugo koo wolde woorefahin,

²⁰ngam ɓe mbaawaay munyango umroore nde'e: “Koo to ndabbaawa meemi hooseere, sey nga mbare bee kaa'e.”

²¹Laarugo ɗum kulniiɗum masin koo Muusa maa wi'i: “Mi ɗon diwna ngam kulol!”

²²Ammaa onon on ɓaditi hooseere Siyona e berniwol Allah geeto, waato Urusaliima ngol asama, bee mooɓtorde malaa'ika'en ujine ujineeje.

²³On ngari haa mooɓtorde ɓiɓɓe Allah afɓe, ɓe inɗe muuɗum'en mbinnda haa asama. On ngari haa Allah, kiitoowo yimɓe fuu, on ngari haa yoŋkiiji adili'en laatiiɓe timmididɓe.

²⁴On ngari haa Yeesu, hakkunndeejo ngam alkawal kesal, on ngari haa ƴiiƴam mbiccaaɗam ngaddanɗam habaruwol ɓurŋgol ngol ƴiiƴam Habila wooɗugo.

²⁵Kakkile, taa cale nanugo bolwanɗo jonta. Saliiɓe nanugo bolwuɗo haala Allah haa duniyaaru ngam reentingo ɓe, kisaay. Kadi noy enen en mbaawrata hisugo to en calake bolwanɗo diga asama!

²⁶Ɓooyma sawtu maako dimmbini lesdi, ammaa jonta o wi'i: “Nde woore fahin mi dimmbinan naa lesdi tan, ammaa asama boo.”

²⁷Kalimaaji “nde woore fahin” ɗon kolla en laaɓɗum no tagaaɗum fuu dimmboto, ittete ngam haa ko dimmbataako tabita.

²⁸Ngam maajum, nde en keɓan laamu ngu dimmbataako, en ngetta Allah, en njaggano mo bana ɗum fottanta mo, bee leestinaare e kulol boo,

²⁹ngam Allah meeɗen boo o yiite nyaamooye.