Read Fulfulded Ibraniŋke'en 13 Bible Online

Ibraniŋke'en 13 - Fulfulded bible

Ibraniŋke'en 13

¹Tokke yiɗindirgo ngam on deerɗiraaɓe.

²Taa ngejjite weernugo hoɗɓe. Woɗɓe mbaɗi ɗum, njaɓɓi malaa'ika'en bilaa anndugo ɓe malaa'ika'en.

³Ciftore haɓɓaaɓe nder fursina[8] bana to on kaɓɓaaɓe hawtaade bee maɓɓe. Ciftore toonyaaɓe, bana to on toonyaaɓe hawtaade bee maɓɓe.

⁴Sey yimɓe fuu camɗina teegal, te'aaɓe boo taa mbaɗa njeenu. Allah hiitoto daakaare'en e jeenooɓe.

⁵Taa cuune ceede, ammaa ceye bee ko on mari. Ngam Allah wi'i: “Mi accataa ma, mi wudintaa ma sam.”

⁶Ngam maajum en mbaawan wolwugo bee dartaare: “Jawmiraawo woni balloowo yam, mi hulataa! Ɗume neɗɗo waawata waɗugo yam?”

⁷Ciftore ardiiɓe on, wolwanɓe on wolde Allah. Ndaare timmoode ngeendam maɓɓe, tokke misaalu nuɗɗinki maɓɓe.

⁸Yeesu Almasiihu, ɗum kaŋko man keenya e hannde e haa abada, o sannjataa.

⁹Taa acce ekkitinolji hayamji koo ɗiye celna on diga laawol gooŋga. Ngam booɗɗum ɓerɗe meeɗen cemmbiɗa bee mo'ere Allah, naa bee tokkaago farillaaji dow nyaamdu. Tokkiiɓe irin farillaaji ɗi'i keɓaay nafuuda maaji sam.

¹⁰En ngoodi hirsirde nde liman'en huuwooɓe nder laymaaru Yahuudu'en keɓataa nyaamugo kirseteeɗi haa maare.

¹¹Ngam hooreejo liman'en ɗon wadda ƴiiƴam dabbaaji nder nokkuure ɓurnde senaago haa o lii'o ɗam ngam ittuki hakkeeji, ammaa ɓe ɗon ngula dabbaaji man haa yaasi saŋngeere.

¹²Ngam maajum Yeesu boo maayi yaasi dammugal berniwol, ngam haa o sena ummaatoore bee ƴiiƴam maako.

¹³Sey en ngurto, en njaha haa maako haa yaasi saŋngeere ngam haa en munyana yawaare nde o munyani.

¹⁴Ngam en ngalaa joonde tabitnde haa duniyaaru ndu'u, en ɗon ndeena joonde warannde.

¹⁵Barka Yeesu, sey en lii'ano Allah maŋgtoore tum bana dokkal, waato en ceedo innde maako bee kunnduɗe meeɗen.

¹⁶Taa ngejjite waɗugo mbooɗeeŋga. Mballindire ngam kanjum woni kirseteeɗum ɗum Allah yerdoto.

¹⁷Ɗowtane ardiiɓe on, leestane ɓe. Ngam ɓe ɗon ayna yoŋkiiji mooɗon tum, ngam ɓe njaaboto Allah dow kuuɗe maɓɓe. To on mbaɗi non, ɓe kuuwan bee seyo. To naa non, ɓe kuuwan bee mone, kanjum boo ɗum nafataa on.

¹⁸Tore Allah ngam amin. Ngam min anndi fakat ɓerɗe amin laaɓi, ngam foroy min ngiɗi waɗugo ko fotti.

¹⁹Mi ɗon ɓesda toraago on, on toro Allah ngam am, ngam haa o lornammi haa mooɗon bee jaawal.

²⁰Allah jawmu salaaman ummitini Jawmiraawo meeɗen Yeesu diga maayde — kaŋko o laati gaynaako baali mawɗo, o tabitini alkawal duumiiŋgal bee ƴiiƴam maako —

²¹Allah waawna on waɗugo ko wooɗi fuu ngam haa on mbaɗa muuyo maako. O waɗa nder meeɗen ko fottanta mo, o waɗa ɗum bee Yeesu Almasiihu. Tedduŋgal laatano Almasiihu haa abada abadin. Aamiina!

²²Onon deerɗiraaɓe, mi ɗon toro on: Njaɓe bolle am ɗe'e bee munyal, haa ɗe tiɗɗina ɓerɗe mooɗon. Wasuyeewol am ngo'ol juutaay.

²³Mi yiɗi anndingo on, deerɗiraawo meeɗen Timote yoofaama diga fursina. To o yottake ɗo law, mi yahdan bee maako to mi ɗon yaha laaroygo on.

²⁴Koofne ardiiɓe on fuu, koofne senaaɓe Allah fuu. Deerɗiraaɓe haa Italiya koofni on.

²⁵Mo'ere Allah laatano on fuu.