Read Fulfulded Ibraniŋke'en 4 Bible Online

Ibraniŋke'en 4 - Fulfulded bible

Ibraniŋke'en 4

¹Allah accani en laawol nastugo siwtaare muuɗum ngam iinawol mum ɗon tabiti. Ngam maajum sey en kula, ngam taa gooto mooɗon sooya nastugo siwtaare man.

²Ngam enen boo en nani kubaruwol ceynoowol bana yimɓe nder ladde hamaadaare go. Ɓe nani ngol, ammaa ngol nafaay ɓe, ngam ɓe njaɓaay ngol bee nuɗɗinki.

³Ammaa enen en nuɗɗini, ngam maajum en nastan siwtaare Allah, bana ko o wi'i: “Nder ɓernuki am mi huni: Fakat ɓe nastataa siwtaare am sam!” Kuuɗe Allah fuu, o timmini ɗe diga tageeki duniyaaru.

⁴Ngam ndaa ko winnda dow nyalaade joweeɗiɗawre haa aayaare woɗnde: “Nyalaade joweeɗiɗawre Allah siwti e kuuɗe muuɗum fuu.”

⁵Fahin haala ka'a winndaama nder aayaare nde'e: “Fakat ɓe nastataa siwtaare am sam.”

⁶Nde nii aartuɓe nanugo Linjiila ka'a nastaay siwtaare maako ngam sooynde nuɗɗinki, woodi woɗɓe nastanɓe siwtaare man.

⁷Ngam maajum Allah waɗi nyannde woɗnde wi'eteende “hannde” fahin. O wolwi haala maare ɓaawo duuɓi ɗuuɗɗi bee hunnduko Daawuda, o wi'i: “To on nani sawtu Allah hannde, taa caatine ko'e mooɗon.”

⁸Ngam to Yosuwa yahrino ummaatoore haa siwtaare, Allah wolwataano haala nyannde feere ɓaawoɗon.

⁹Nden kam, nyalaade siwtaare ɗon reeni ummaatoore Allah, ammaa nde waraay tawon.

¹⁰Ngam mo nasti siwtaare Allah, siwtoto boo diga kuuɗe muuɗum bana Allah siwtori diga kuuɗe muuɗum.

¹¹Ngam maajum sey en tiino nastugo siwtaare nde'e, ngam taa koo gooto meeɗen do'o bee waɗugo sooynde ɗowtaare bana kaakiraaɓe meeɗen.

¹²Ngam wolde Allah nde yeere, nde ɗon waɗa nafuuda. Nde ɓuri kaafahi koo kiye marki mbeldiiji ɗiɗi ta'anɗi. Nde ɗon ta'a haa sennda yoŋki e ruuhu e kawtirɗe i'e e mbosam. Nde ɗon hiito nufayeeje e numooji ɓernde neɗɗo.

¹³Walaa ko nyukkanto Allah. Koo ɗume fuu ɗon waŋgi haa gite maako. Doole en fuu en njaabanto ko'e meeɗen yeeso maako.

¹⁴Nde en ngoodi hooreejo liman'en mawɗo, Yeesu, Ɓiɗɗo Allah, mo yotti haa joonde Allah fakat, nden kam sey en njoga nuɗɗinki ki en ceedoto.

¹⁵Hooreejo liman'en meeɗen waawi yurmingo tampe meeɗen, ngam kaŋko boo o maatuɗo estooji koo ɗiye bana meeɗen, ammaa o waɗaay hakke.

¹⁶Ngam maajum en ɓadito bee hoolaare haa leeso laamu Allah haa mo'ere tawete, ngam heɓugo hinnuye e mo'ere e walliinde koo ndey nder wakkatiire haandunde.