Read Fulfulded Yaakuba 1 Bible Online

Yaakuba 1 - Fulfulded bible

Yaakuba 1

¹Min, Yaakuba maccuɗo Allah e Jawmiraawo men Yeesu Almasiihu, mi hoofni le'i Isra'iila sappo e ɗiɗi caŋkitiiɗi haa duniyaaru.

²Deerɗiraaɓe am, ceye masin nde jarribooje feere feere keɓi on fuu.

³Ngam on anndi poonduki nuɗɗinki mooɗon waddan munyal.

⁴Ammaa sey munyal mooɗon waŋga laaɓɗum, ngam haa on laato timmuɓe, bilaa feloore, taa koo ɗume ŋakkana on.

⁵To hikma ŋakkani gooto caka mooɗon, sey o toro Allah dokkanɗo koo moy bee caahaaki e bilaa feloore, o hokkan mo ka.

⁶Ammaa sey o toro bee nuɗɗinki, bilaa seko sam, ngam mo ɗon seka nanndi bee ƴuuge weendu ɗe henndu dimmbinta e ɓaŋgtata.

⁷Taa irin goɗɗo oo tammo heɓugo koo ɗume haa Jawmiraawo,

⁸ngam tum o cakliiɗo, nuɗɗinki maako daraaki dow gootum sam.

⁹Sey deerɗiraawo leesɗo seyo to Allah ɓaŋgti mo,

¹⁰deerɗiraawo diskuɗo boo seyo to Allah leesni mo. Ngam o saaloto bana pinndi huɗo.

¹¹To naaŋge ɓaŋgti, wuli jaw, huɗo yooran, pinndi mum caaman, mbooɗirka man fuu halkan. Bana non boo diskuɗo halkirta nder kuuɗe muuɗum.

¹²Barka laatanto goɗɗo mo munyani jarribeeki, ngam ɓaawo poondol ngo'ol, o heɓan woronnde ngeendam nde Allah iinani yiɗɓe mo.

¹³To goɗɗo jarribaama, taa o wi'a: “Allah jarribake yam.” Ngam goɗɗo waawataa jarribaago Allah haa o waɗa halleende, kaŋko boo o jarribataako goɗɗo.

¹⁴Ammaa jarraba ɗon naŋnga goɗɗo to suuno mum esti ɗum, naŋngi ɗum.

¹⁵Ɓaawoɗon, to suuno man mawni, riman hakke. To hakke mawni boo, riman maayde.

¹⁶Deerɗiraaɓe am yiɗaaɓe, taa zammbe ko'e mon!

¹⁷Caahu mbooɗŋgu e dokkal timmuŋgal fuu iwi diga dow, ɗum iwi haa Allah tagɗo jayli asama. O waylataako, nyiɓɓuki laatataako haa maako bana haa jayli man[1].

¹⁸Nder muuyo maako o hokki en ngeendam bee wolde maako gooŋgaare, ngam haa joonde meeɗen ɓura joole tagle maako fuu.

¹⁹Deerɗiraaɓe am yiɗaaɓe, paame ɗu'um: Sey koo moy fuu taaskano nanugo, ammaa taa o yaawa wolwugo, taa o yaawa tikkugo boo.

²⁰Ngam tikkere neɗɗo hiɓɓintaa adilaaku Allah.

²¹Ngam maajum, ngudine ko soɓi e kuuɗe kalluɗe fuu. Njaɓe bee yaŋkinaare wolde nde Allah aawi nder ɓerɗe mooɗon, ngam nde waawan hisnugo on.

²²Taa zammbe ko'e mooɗon bee wi'go: Nanugo wolde Allah tan he'i. Ammaa mbaɗe ko nde wi'i on.

²³Ngam koo moy nani wolde Allah, o waɗaay ko nde wi'i, o nanndi bee daarɗo yeeso mum nder daarorgal,

²⁴o yi'i no o wa'i, o dilli, law o yejjiti no o wa'no.

²⁵Ammaa to goɗɗo ɗon lincita tawreeta Allah timmuka, dimɗinanka yimɓe, o ɗon tokka jogaago ka, o yejjitittaa ko o nani, o ɗon waɗa ko ka wi'i mo, goɗɗo oo heɓan barka nder ko o waɗata fuu.

²⁶To goɗɗo ɗon numa o goɗɗo diina, ammaa o hakkilantaa ko o wolwata, diina maako laati meere, o fewani hoore maako.

²⁷Ndaa ko hollata diina gooŋgaaha e ceniika yeeso Allah Baabiraawo: Hakkilango atiime'en e rewɓe yurumɓe nder ɓillaare maɓɓe e aynugo hoore muuɗum ngam taa duniyaaru soɓna ɗum.