Read Fulfulded Yaakuba 4 Bible Online

Yaakuba 4 - Fulfulded bible

Yaakuba 4

¹Haa toy kaɓe e jokkirli caka mooɗon iwata? Naa ɗum ɗon iwa haa suunooji mooɗon kaɓanɗi foroy nder terɗe mooɗon?

²On ɗon cuuna kuuje goɗɗe, ammaa on keɓaay ɗe, ngam maajum on ɗon mbara ko'e, on ɗon kaaja boo, on mbaawaay heɓugo ko on ngiɗi, on ɗon kaɓa, on ɗon njokkira. On keɓaay ko on ngiɗi, ngam on toraaki ɗum haa Allah.

³Koo to on ɗon toro mo, on keɓataa ngam numooji mooɗon kalli, on ɗon toro ngam humtugo suunooji ɓerɗe mooɗon tan.

⁴Onon yewɓe umrooje Allah! On anndaa soobrugo bee duniyaaru ɗum honugo Allah na? To on coobiri bee duniyaaru, nden kam on laatake konne'en Allah.

⁵Taa nume ko Deftere Seniinde wolwi ɗum meere, nde wi'i: “Bee yiide haajunde, Allah yiɗi Ruuhu mo o waɗi nder meeɗen.”

⁶Ammaa mo'ere nde Allah mo'ani en ɓuri ɗum. Ngam man Deftere Seniinde wi'i: “Allah ɗon dartano mawnitiiɓe, ammaa o ɗon mo'ana yaŋkiniiɓe.”

⁷Ngam man leestine ko'e mon yeeso Allah. Ndartane Sayɗaanu, nden o doggan, o daayoto on.

⁸Ɓadite Allah, kaŋko boo o ɓadititto on. Laɓɓine juuɗe mooɗon, onon hakke'en. Cene ɓerɗe mooɗon, onon sakliiɓe.

⁹Cune, ngooke, mboye. Jaleeɗe mooɗon laato bojji, seyo mooɗon laato suno.

¹⁰Njaŋkine ko'e mooɗon yeeso Jawmiraawo, nden kam o ɓaŋgtan on.

¹¹Deerɗiraaɓe am, taa mbolwindire kalluka. Koo moy wolwi kalluka dow deerɗum malla hiitake ɗum, o wolwi kalluka dow tawreeta, o hiiti ka. To a hiiti tawreeta, a laataaki ɗowtaniiɗo ka, ammaa a laati kiitoowo ka.

¹²Allah feere muuɗum woni kiitoowo, kaŋko hokki en tawreeta. Kaŋko feere maako waawi hisnugo e halkugo. An a moy, haa a hiito deerɗiraawo ma?

¹³Jonta, naneeɗam, onon wi'anɓe: “Hannde malla jaŋngo min ndillan haa berniwol kaja, min nduuma ton, min mbaɗan filu, min keɓa riba.”

¹⁴Onon wolwanɓe bana nii, on anndi ko waranta ngeendam mooɗon jaŋngo na? On ɗon bana cuurɗe, ɗe mbaŋgi seɗɗa, ɓaawoɗon law ɗe caayi.

¹⁵Haani on mbi'a: “To Jawmiraawo muuyi, to o yahri yoŋki, min mbaɗan nii bee nii.”

¹⁶Ammaa jonta on ɗon mawnito, on ɗon njuro. Irin juro ngo'o halli.

¹⁷Annduɗo waɗugo mbooɗeeŋga to waɗaay ɗum, o waɗi hakke.