Read Fulfulded Yaakuba 5 Bible Online

Yaakuba 5 - Fulfulded bible

Yaakuba 5

¹Naneeɗam jonta, onon riskuɓe! Sey on mboya, on ngooka ngam boneeji tammiiɗi wargo dow mooɗon.

²Jawdi mooɗon nyoli, mooƴu nyaami limce mooɗon.

³Peewol nyaami kaŋŋeeri e cardi mooɗon. Peewol ngo'ol laatoto seedamku dow mooɗon, ngol nyaaman ɓalli mooɗon bana yiite. On paggake jawdi nder balɗe ragareeje.

⁴On njoɓaay ngeenaari sodooɓe gese mooɗon. Nane bojji maɓɓe! Bojji sodooɓe ƴaamle mooɗon njottake haa Jawmiraawo honooɓe asama.

⁵On ngeeɗi nder jeynitaare haa duniyaaru ndu'u, on mbaɗi ko on ngiɗi, on payni ko'e mooɗon ngam nyalaade kirsol.

⁶On kiiti adiliijo, on mbari mo. Kaŋko o dartanaaki on.

⁷Deerɗiraaɓe am, munye haa to Jawmiraawo wari. Ndaare no demoowo munyrata, o ɗon reena haa gese maako ɓennda booɗɗum. O ɗon reena iyeende arannde e ɓaawoore.

⁸Munye onon boo, tiɗɗine ɓerɗe mooɗon, ngam nyalaade loraaki Jawmiraawo ɓadake.

⁹Deerɗiraaɓe am, taa ngurŋgurte hakkunde mooɗon, ngam taa Allah hiito on. Ndaa kiitoowo ɓadake wargo.

¹⁰Deerɗiraaɓe am, tokke misaalu annabi'en wolwuɓe bee innde Jawmiraawo, munye, ɓuse bone bana maɓɓe.

¹¹En ɗon mbi'a ɓe barkiɗinaaɓe ngam ɓe accaay munyugo. On nani haala munyal Ayuba ɗuuɗŋgal, on anndi boo ko Allah hokki mo haa ragare. Ngam Jawmiraawo o keewɗo enɗam e mbooɗeeŋga.

¹²Ammaa ko ɓuri ɗum fuu, deerɗiraaɓe am, taa kune sam, koo bee asama malla bee lesdi. Taa kunore koo ɗume. Sey ooho mooɗon laato ooho, aa'a mooɗon boo laato aa'a. Ngam taa on ndo'o nder kiita Allah.

¹³Woodi mo ɗon yara bone caka mooɗon na? O waɗa do'a. Woodi mo ɗon seyi na? O yima gime gettooje.

¹⁴Woodi nyawɗo caka mooɗon na? O ewno ndotti'en jama'aare nuɗɗinɓe. Ɓe ngara ɓe toro Allah ngam maako, ɓe moyta mo bee nebbam bee innde Jawmiraawo.

¹⁵Tornde bee nuɗɗinki hisnan nyawɗo oo. Jawmiraawo yamɗitinan mo, to woodi hakkeeji ɗi o waɗno boo, Jawmiraawo yaafanto mo.

¹⁶Ngam maajum mbaŋgine hakkeeji mooɗon hakkunde mooɗon, tore Allah ngam koo moy mooɗon, ngam haa on njamɗita. Tornde adiliijo woodi baawɗe ɗuuɗɗe, nde nafan masin.

¹⁷Eliya o goɗɗo bana meeɗen. O tori Allah bee tiinaare ngam taa iyeende toɓa. Duuɓi tati bee reeta nde toɓaay.

¹⁸O tori mo fahin, asama yoofi iyeende, lesdi waɗi ƴaamle.

¹⁹Deerɗiraaɓe am! To gooto mooɗon seli laawol gooŋga, sey goɗɗo lorna mo.

²⁰Anndite ɗu'um: To goɗɗo lorni hakkeejo diga laawol majjere, o hisni mo diga maayde, o heɓnanan mo yaafuye hakkeeji ɗuuɗɗi.