Read Fulfulded 1 Piyer 1 Bible Online

1 Piyer 1 - Fulfulded bible

1 Piyer 1

¹Min Simon Piyer, nelaaɗo Yeesu Almasiihu, mi ɗon winndana on, onon suɓaaɓe Allah, laatiiɓe jananɓe saŋkitiiɓe haa lesɗe Pontus e Galaatiya e Kappadosiya e Asiya e Bitiniya.

²On laati suɓaaɓe ngam Allah Baabiraawo muuyi ɗum diga ɓooyma. Ruuhu maako seni on, haa on ɗowtano Yeesu Almasiihu, haa ƴiiƴam maako laɓɓina on. Mo'ere e salaaman ɗuuɗana on!

³Ngetten Allah, Baabiraawo Jawmiraawo meeɗen Yeesu Almasiihu! O waɗani en enɗam ɗuuɗɗam, o laatini en danyaaɓe hesɓe barka ummitineeki Yeesu Almasiihu diga maayde. Ɗum hebbini ɓerɗe meeɗen bee tammunde gooŋgaare.

⁴En ɗon tammo heɓugo ndonŋgu ngu o sigani yimɓe maako haa asama. Ngu nyolataa, ngu wonnataako, ngu ustataako boo.

⁵On ɗon nuɗɗini mo. Ngam maajum o ɗon ayna on bee baawɗe maako. Nder balɗe ragareeje, o waŋginanan on kisndam ɗam o taaskani on.

⁶Ceye masin, koo to ɗum kaanduɗum boneeji feere feereeji ɗon cuna on wakkati seɗɗa.

⁷Boneeji ɗi'i poondan nuɗɗinki mooɗon to ki gooŋgahi. Koo kaŋŋeeri wonnotoondi maa ɓe ɗon poonda ndi nder yiite, sakko nuɗɗinki mooɗon. Ki ɓuri kaŋŋeeri saman piw, sey ki foonde. Ɓaawo poondol man, on keɓan manooje e tedduŋgal e maŋngu, nyannde Yeesu Almasiihu waŋganta yimɓe fuu.

⁸Koo nde on ngi'aay mo, on ngiɗi mo. Koo nde on ngi'ataa mo jonta, on nuɗɗini mo. Ngam man on ɗon ceyo bee seyo tedduŋgo, ɗuuɗŋgo, ngo ɓuri wolweego,

⁹ngam on keɓan ko on tammoto nder nuɗɗinki mooɗon, kanjum woni kisndam yoŋkiiji mooɗon.

¹⁰Annabi'en mbaɗi annabaaku dow mo'ere nde Allah taaskitinani on diga fuɗɗam, Ruuhu Almasiihu wondi bee maɓɓe, holli ɓe Almasiihu tammi yarugo bone, ɓaawoɗon o tammi heɓugo tedduŋgal. Annabi'en go tefi faamugo haala kisndam ɗa'am masin, linyi ka bee hakkiilo ngam ɓe keɓta ndey ka waɗata e noy ka laatorto.

¹²Allah waŋginani ɓe kubaruwol ngol o halfinani ɓe, ngol laataaki ngam maɓɓe, ammaa ngam mooɗon. Nelaaɓe waazinɓe on Linjiila ngecci on gooŋgaaji ɗi'i. Ɓe ngaazi on ɗi bee baawɗe Ruuhu Ceniiɗo iwɗo diga asama. Malaa'ika'en maa ngiɗi faamugo haala ka'a.

¹³Ngam maajum, sey numooji mooɗon taaskano kuugal! Kakkile, njo'ine tammunde mooɗon fuu haa mo'ere nde keɓoton saa'i Yeesu Almasiihu waŋgata.

¹⁴Bana ɓikkoy ɗowtiikoy, taa tokke suunooji mooɗon ɗi tokkinooɗon yaake on anndaano gooŋga.

¹⁵Ammaa bana Allah ewniiɗo on o Ceniiɗo, laate onon boo on senaaɓe nder ko mbaɗoton fuu.

¹⁶Ngam Deftere wi'i: “Laate on senaaɓe ngam min mi Ceniiɗo.”

¹⁷To on ɗon mbaɗa do'a, on ɗon ewno Allah, “Baabiraawo”. Allah ɗon hiito yimɓe, o senndindirtaa ɓe, ammaa o ɗon hiito ɓe deydey kuuɗe maɓɓe. Nde nii on laatake hoɗɓe nder duniyaaru, timmine balɗe mooɗon luttuɗe nder kulol Allah.

¹⁸On coottaama diga yahdu hallundu ndu on ndoni haa kaakiraaɓe mooɗon. On anndi on coottiraaka bee kuuje ɗe saman maaje ustoto bana kaŋŋeeri malla cardi,

¹⁹ammaa on coottiraama bee ƴiiƴam caɗɗam ɗam Almasiihu, mo laati bana jawgel laaɓŋgel ngel walaa aybe[1].

²⁰Allah suɓi mo diga duniyaaru tagaaka tawon, o waŋgini mo haa mooɗon nder balɗe ragareeje ɗe'e.

²¹Ngam barka maako on nuɗɗini Allah mo ummitini mo diga maayde, teddini mo. Bana non nuɗɗinki mooɗon e tammunde mooɗon haa Allah tabitirta.

²²Jonta nde on ceni ko'e mooɗon bee ɗowtanaago gooŋga, ngiɗe deerɗiraaɓe nder nuɗɗinki bilaa naafikaare. Ngam maajum ngiɗindire bee tiinaare e ɓerɗe laaɓɗe.

²³On laati danyaaɓe hesɓe bee wolde Allah. Wolde nde'e laataaki bana aawdi nyolanndi, nde yeere, nde nyolataa e nde jinnataa.

²⁴Bana ko winnda: “Yimɓe fuu ɗon bana fuɗŋgooji, tedduŋgal maɓɓe fuu ɗon bana pinndi maaji. Fuɗŋgooji njooran, pinndi boo caaman.

²⁵Ammaa wolde Jawmiraawo duumoto.” Wolde nde'e woni kubaruwol ceynoowol ngol anndinaaɗon.