Read Fulfulded 1 Piyer 3 Bible Online

1 Piyer 3 - Fulfulded bible

1 Piyer 3

¹Bana non boo onon rewɓe, leestane worɓe mooɗon. Ngam to woɗɓe maɓɓe ɗowtanaaki wolde Allah, joonde mooɗon yahran ɓe haa nuɗɗinki. Ɗum waɗan koo to on mbolwaay koo wolde,

²ngam ɓe ndaaran no joonde mooɗon laaɓrata, no on kulorta Allah.

³Taa ŋarol mon iwa haa ko gite ngi'ata waato moorɗi caɗɗi malla pawne kaŋŋeeri malla ɓornuce booɗɗe.

⁴Ndikka ŋarol mooɗon iwa diga nder ɓerɗe mooɗon, waato gikku ɗelemŋgu, de'iiŋgu. Kanjum woni pawne ɗe njinnataa, ɗum mari saman masin haa yeeso Allah.

⁵Bana nii rewɓe senaaɓe ɓooyma laatiniri ko'e maɓɓe ɓe ŋarniiɓe, ɓe njo'ini tammunde maɓɓe haa Allah, ɓe leestaniiɓe worɓe maɓɓe.

⁶Saraatu waɗi ɗum, o ɗowtani Ibrahiima, o ewni mo jaagorɗo maako. On laati ɓikkoy maako hannde to on mbaɗi mbooɗeeŋga, to on kulaay koo ɗume.

⁷Onon worɓe boo: Njooɗode bee rewɓe mon, paamotire. Anndite no semmbe maɓɓe yottaaki semmbe mooɗon. Teddine ɓe, ngam kamɓe boo ɓe keɓan hawtaade bee mooɗon ngeendam caahu. Mbaɗe ɗum ngam taa koo ɗume haɗa do'aaje mooɗon.

⁸Dow ko mi wolwi fuu, mi ɗon wi'a fahin: Sey on fuu on mara numo wooto, njurmindire, ngiɗindire bana deerɗiraaɓe, enɗindire, laate yaŋkiniiɓe.

⁹Taa lorne halleende bee halleende malla kuudi bee kuudi. Ndikka on mbarkiɗina, kanjum Allah ewnori on haa ndonon barka.

¹⁰Bana Deftere wi'i: “To goɗɗo yiɗi seyoraago ngeendam e hayru nder balɗe mum, sey o acca wolwugo kalluka, o hakkilana ɗemŋgal maako,

¹¹o acca halleende, o waɗa mbooɗeeŋga, o tiino ɗaɓɓugo salaaman.

¹²Ngam Jawmiraawo ɗon hakkilana adili'en, noppi maako ɗon keɗito gookaali maɓɓe. Ammaa o ɗoylan waɗooɓe halleende.”

¹³Moy waɗata on halleende to on tiinake waɗugo mbooɗeeŋga?

¹⁴Ammaa to on njari bone daliila adilaaku, on barkiɗinaaɓe. Taa kule ko yimɓe kulata, taa hakkiilooji mooɗon njiiɓo.

¹⁵Ammaa teddine Almasiihu nder ɓerɗe mooɗon ngam o Ceniiɗo, o Jawmiraawo mooɗon. Laate taaskiiɓe koo ndey haa on mbaawa jaabaago koo moy to ƴami on haala tammunde mooɗon.

¹⁶Ammaa njaabe ƴamɓe on bee yaŋkinaare e ne'aare e numo ɓernde laaɓŋgo. Nden ɓe cemtan ngam ɓe ngulli on bilaa daliila, ɓe mbolwi kalluka dow joonde mooɗon woonde nder kawtal bee Almasiihu.

¹⁷To ɗum laatake muuyo Allah, ndikka yarugo bone ngam kuuɗe booɗɗe dow yarugo bone ngam kuuɗe kalluɗe.

¹⁸Ngam Almasiihu bee hoore muuɗum maayi nde woore ngam hakkeeji yimɓe, nafuuda man jinnataa haa foroy. O walaa hakke, ammaa o maayi ngam marɓe hakke, ngam o yahra on haa Allah. Yimɓe mbari mo, ammaa Ruuhu Ceniiɗo yeeɗitini mo.

¹⁹Nii non o jippiri nder Ruuhu haa yoŋkiiji maɓɓaaɗi, o waazini ɗi.

²⁰Waato yoŋkiiji ɗi ɗowtanaakino Allah, koo nde o munyani ɗi nder zamanu Nuuhu, yaake Nuuhu ɗonno waɗa koommbowal[3]. Yimɓe njoweetato tan nasti koommbowal man, kisi ndiyam.

²¹Ndiyam ɗa'am laati misaalu baptisma, ɗam ɗon hisna on jonta, naa bee lootugo tuundi ɓanndu, ammaa bee jaabaago Allah bee numo ɓernde laaɓŋgo nder ummitineeki Yeesu Almasiihu

²²mo eeŋgi haa asama, jooɗi haa nyaamo Allah. O ɗon laamano malaa'ika'en e marɓe laamu e marɓe baawɗe.