Read Fulfulded 1 Piyer 4 Bible Online

1 Piyer 4 - Fulfulded bible

1 Piyer 4

¹On anndi Almasiihu yari bone nder ɓanndu muuɗum. Cemmbiɗine ko'e mooɗon bee numo bana ngo Almasiihu, ngam koo moy to yari bone nder ɓanndu mum seedi bee hakke.

²Diga jonta, haa luttuɗum balɗe mooɗon haa duniyaaru, sey on njooɗo nder muuyo Allah, naa nder suunooji neɗɗo.

³Naane on njooɗino nder joonde heefeerɓe, jonta ɗum he'i. On njooɗino nder daakaareeku, suunooji, wuykere, pijirle kalluɗe, on cujidanino labbi karminaaɗi.

⁴Jonta heefeerɓe ɓe'e ɗon kayɗina ngam on kawtataa bee maɓɓe nder joonde maɓɓe hallunde e pijirle maɓɓe kalluɗe. Ngam man ɓe nasti huɗugo on.

⁵Ammaa sey ɓe njaabo Allah, taaskiiɗo hiitaago yeeɗɓe e maayɓe.

⁶Kanjum waɗi Almasiihu waazini maayɓe boo kubaruwol ceynoowol, koo to ɓe maayi daliila kiita ka yimɓe fuu kiitorte, ɓe ngeeɗa fodde Allah barka Ruuhu.

⁷Ragare kuuje fuu ɓadake. Kakkile, naŋgte ko'e mooɗon haa on mbaawa waɗugo do'a.

⁸Ko ɓuri fuu, ngiɗindire bee yiide gooŋgaare, ngam yiide ɗon yaafo hakkeeji ɗuuɗɗi.

⁹Njaɓɓindire, mbeernindire haa ci'e[4] mooɗon bee seyo.

¹⁰Sey koo moy mooɗon huuwtinira dokkal ngal Allah hokki mo, nafa woɗɓe bee maagal. Bana nii on laatorto aynooɓe dokke Allah feere feereeje.

¹¹Mo waazata, sey o waazo wolde Allah. Mo huuwanta goɗɗo, sey o huuwana mo bee semmbe ɗe Allah hokkata mo. Nder ko en mbaɗata fuu, sey en teddina Allah bee Yeesu Almasiihu. Kaŋko mari tedduŋgal e baawɗe haa foroy! Aamiina.

¹²Soobiraaɓe am, taa kayɗine boneeji naawɗi ɗi on njarata ngam foondugo on, bana to ɗum huunde kaayeefiire.

¹³Ammaa ceye ngam on ɗon kawta nder bone Almasiihu ngam haa on keewa seyo yaake tedduŋgal maako waŋgoyi.

¹⁴On barkiɗinaaɓe to ɓe kuɗi on daliila innde Almasiihu, ngam ɗum waŋgini Ruuhu Allah tedduɗo ɗon dow mooɗon!

¹⁵Taa gooto mooɗon yara bone ngam o laati mbaroowo hoore malla gujjo malla ngam o waɗi kalluɗum malla karammbaaniijo.

¹⁶Ammaa to on njari bone ngam on nuɗɗinɓe tokkiiɓe Almasiihu, taa cemte ɗum. Sey on ngetta Allah ngam on njogi innde Almasiihu.

¹⁷Wakkati kiita yottake, Allah boo aartiran bee yimɓe muuɗum. To ka fuɗɗi haa meeɗen, noy ɗum laatorto haa ɓen njaɓaay kubaruwol ceynoowol ngol Allah?

¹⁸Bana no Deftere wi'i: “To hisugo saɗani adili'en, ko tammi heɓugo halluɓe e marɓe hakke?”

¹⁹Nden kam, mo ɗon yara bone ngam Allah muuyani mo ɗum, taa acca waɗugo mbooɗeeŋga, ammaa o hokkita hoore maako haa tagɗo mo ngam o koolniiɗo.